ນາຍົກລັດຖະມົນຕີ ຕ້ອນຮັບຄະນະຜູ້ແທນ ສສ ມຽນມາ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນອັງຄານ, 10 ມິ.ນ 2020 10:00

ໃນວັນທີ 6 ມີນາ 2020 ທີ່ ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ, ນາຍົກລັດຖະມົນຕີ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບຂອງທ່ານ ອູ ຈໍ ຕິນ, ລັດຖະມົນຕີກະຊວງຮ່ວມມືສາກົນ ແຫ່ງ ສສ ມຽນມາ ພ້ອມດ້ວຍຄະນະ ໃນໂອກາດເດີນທາງມາເຂົ້າຮ່ວມ ກອງປະຊຸມເຈົ້າໜ້າທີ່ອາວຸໂສ ລາວ-ມຽນມາ ທີ່ຈັດຂຶ້ນຢູ່ ສປປ ລາວ.

ໃນໂອກາດດັ່ງກ່າວ, ທ່ານ ນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບ ທ່ານລັດຖະມົນຕີກະຊວງຮ່ວມມືສາກົນ ແຫ່ງ ສສ ມຽນມາ ແລະ ຊົມເຊີຍ ຕໍ່ຜົນສຳເລັດ ຂອງກອງປະຊຸມເຈົ້າໜ້າທີ່ອາວຸໂສ. ພ້ອມກັນນີ້, ທ່ານ ນາຍົກລັດຖະມົນຕີ ຍັງໄດ້ສະແດງຄວາມຂອບໃຈ ຕໍ່ລັດຖະບານ ສສ ມຽນມາ ທີ່ໄດ້ໃຫ້ການຮ່ວມມື, ຊ່ວຍເຫຼືອ ແລະ ສະໜັບສະໜູນ ສປປ ລາວ ຕະຫຼອດມາ ທັງໃນເວທີພາກພື້ນ ແລະ ສາກົນ ຊຶ່ງເປັນການປະກອບສ່ວນສໍາຄັນ ໃນການເສີມຂະຫຍາຍສາຍພົວພັນຮ່ວມມືຂອງສອງປະເທດ ໃຫ້ນັບມື້ນັບໄດ້ຮັບການພັດທະນາ. ທ່ານນາຍົກລັດຖະມົນຕີ ເຊື່ອໝັ້ນວ່າສອງປະເທດລາວ ແລະ ມຽນມາ ຈະສືບຕໍ່ຮັກສາມູນເຊື້ອ ແລະ ເພີ່ມທະວີການພົວພັນຮ່ວມມື ໂດຍ ສະເພາະ ດ້ານການເມືອງ, ຄວາມໝັ້ນຄົງ, ເສດຖະກິດ, ວັດທະນະທໍາສັງຄົມ, ການທ່ອງທ່ຽວ ແລະ ອື່ນໆ, ລວມທັງ ການສົ່ງເສີມນຳໃຊ້ຂົວ ມິດຕະພາບ ລາວ-ມຽນມາ ໃຫ້ເກີດປະໂຫຍດສູງສຸດ. 
ໃນໂອກາດດຽວກັນນີ້, ທ່ານ ອູ ຈໍ ຕິນ ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານນາຍົກລັດຖະມົນຕີ ແລະ ພາກສ່ວນທີ່ກ່ຽວຂ້ອງ ຂອງ ສປປ ລາວ, ຂອບໃຈ ຕໍ່ການສະໜັບສະໜູນ, ຊ່ວຍເຫຼືອ ແລະ ໃຫ້ກຳລັງໃຈທີ່ດີ ແກ່ພັກ, ລັດ ແລະ ປະຊົນມຽນມາ ທີ່ຜ່ານມາ ຊຶ່ງສະແດງໃຫ້ເຫັນເຖິງການພົວພັນຮ່ວມມື ທີ່ເປັນມູນເຊື້ອຂອງສອງປະເທດມາແຕ່ດົນນານ ແລະ ຫວັງວ່າການພົວພັນຮ່ວມມື ລະຫວ່າງ ສອງປະເທດ ນັບມື້ນັບຂະຫຍາຍ ຕົວເພີ່ມຂຶ້ນ  ໂດຍສະເພາະ ດ້ານເສດຖະກິດ  ແລະ ການຄ້າ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ