ທ່ານນາຍົກລັດຖະມົນຕີ ຕ້ອນຮັບຮອງນາຍົກລັດຖະມົນຕີກຳປູເຈຍ

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນພະຫັດ, 05 ມິ.ນ 2020 16:00

​​​​​ 
​​​ໃນຕອນແລງ ຂອງວັນທີ 5 ມີນາ 2020 ທີ່ ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ, ນາຍົກລັດຖະມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບ ຂອງສົມເດັດ ກຼໍລາໂຮມ ຊໍ ເຄັງ, ຮອງນາຍົກລັດຖະມົນຕີ, ລັດຖະມົນຕີກະຊວງພາຍໃນ ແຫ່ງ ຣາຊະອານາຈັກ ກໍາປູເຈຍ ພ້ອມດ້ວຍຄະນະ.
​​​ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບ ສົມເດັດ ກຼໍລາໂຮມ ຊໍ ເຄັງ ແລະ ຄະນະ ທີ່ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຢ່າງເປັນທາງການ ໃນຄັ້ງນີ້, ສະແດງຄວາມຊົມເຊີຍ ແລະ ເພິ່ງພໍໃຈຕໍ່ການພົວພັນຮ່ວມມືຂອງສອງປະເທດ ນັບມື້ນັບເລິກເຊິ່ງ ແລະ ກວ້າງຂວາງ ຊຶ່ງອັນພົ້ນເດັ່ນ ແມ່ນໄດ້ຍົກລະດັບສາຍພົວພັນເປັນຄູ່ຮ່ວມຍຸດທະສາດຮອບດ້ານ ແລະ ໝັ້ນຄົງຍາວນານ, ການເດີນທາງຢ້ຽມຢາມລັດຖະກິດ ຢູ່ ກໍາປູເຈຍ ໃນເດືອນກຸມພາ 2020 ທີ່ຜ່ານມາ ຂອງທ່ານປະທານປະເທດ ແຫ່ງ ສປປ ລາວ, ພ້ອມທັງ ຕີລາຄາສູງຕໍ່ການພົວພັນຮ່ວມມື ລະຫວ່າງ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກະຊວງພາຍໃນ ແຫ່ງ ຣາຊະອານາຈັກ ກໍາປູເຈຍ ທີ່ໄດ້ຮັບການພັດທະນາຂະຫຍາຍຕົວຢ່າງໜັກແໜ້ນ ແລະ ເຂັ້ມແຂງ, ຊຶ່ງເຫັນໄດ້ຈາກສອງຝ່າຍໄດ້ມີການແລກປ່ຽນການຢ້ຽມຢາມ ເຊິ່ງກັນ ແລະ ກັນ ເປັນປົກກະຕິ ແລະ ໄດ້ສະແດງຄວາມຊົມເຊີຍ ຕໍ່ຜົນສຳເລັດຂອງການພົບປະສອງຝ່າຍ ຂອງສອງກະຊວງໃນຄັ້ງນີ້ ຊຶ່ງສອງຝ່າຍໄດ້ເຊັນບົດບັນທຶກຮ່ວມມືເພື່ອຈັດຕັ້ງປະຕິບັດວຽກງານສຳຄັນຫຼາຍດ້ານ ໃນຂົງເຂດວຽກງານປ້ອງກັນຄວາມສະຫງົບ ຄວາມເປັນລະບຽບຮຽບຮ້ອຍປະຈຳປີ 2020 ເປັນຕົ້ນ: ການຮ່ວມມືຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມຊາຍແດນ, ການປ້ອງກັນສະກັດກັ້ນ ແລະ ຕ້ານທຸກການເຄື່ອນໄຫວການກໍ່ການຮ້າຍ ແລະ ອາຊະກໍາຂ້າມຊາດຕາມຊາຍແດນ;  ການປາບປາມ ແລະ ແກ້ໄຂບັນຫາຢາເສບຕິດ; ການຕ້ານການຄ້າມະນຸດ; ການອໍານວຍຄວາມສະດວກ ແລະ ຄວາມເປັນລະບຽບຮຽບຮ້ອຍໃນການເຂົ້າ-ອອກເມືອງ, ພ້ອມທັງ ເພີ່ມທະວີການຮ່ວມມືໃນການຕິດຕາມ ກວດກາ ແລະ ແກ້ໄຂປະກົດການຫຍໍ້ທໍ້ຕ່າງໆ ທີ່ເກີດຂຶ້ນຕາມຊາຍແດນຂອງສອງປະເທດ, ລວມທັງ ອໍານວຍຄວາມສະດວກ ໃຫ້ປະຊາຊົນໃນການແລກປ່ຽນສິນຄ້າ, ການຢ້ຽມຢາມ ແລະ ເຂົ້າຮ່ວມງານບຸນປະເພນີຕ່າງໆຂອງກັນ ແລະ ກັນ. ນອກຈາກນັ້ນ, ທ່ານ ນາຍົກລັດຖະມົນຕີ ຍັງສະເໜີໃຫ້ທັງສອງກະຊວງ ສືບຕໍ່ປຶກສາຫາລືກັນຕື່ມ ກ່ຽວກັບການຈັດຕັ້ງປະຕິບັດການແລກປ່ຽນ ໂອນຕົວນັກໂທດໃຫ້ແກ່ກັນ ແລະ ກັນ ຕາມການຕົກລົງເຫັນດີຂອງລັດຖະບານລາວ ແລະ ກຳປູເຈຍ ໃຫ້ມີຄວາມຄືບໜ້າ. ໃນຕອນທ້າຍ, ທ່ານນາຍົກ ລັດຖະມົນຕີ ໄດ້ຊົມເຊີຍຜົນ ສຳເລັດໃນການພັດທະນາເສດຖະກິດ-ສັງຄົມ ຂອງກຳປູເຈຍ ແລະ ໄດ້ຝາກຄວາມຢ້ຽມຢາມຖາມຂ່າວ ຜ່ານສົມເດັດ ກຼໍລາໂຮມ ຊໍ ເຄັງ ໄປຍັງທ່ານນາຍົກລັດຖະມົນຕີ ແຫ່ງ ຣາຊະອານາຈັກກຳປູເຈຍ ຕື່ມອີກ.
​ 
​​​​ໃນໂອກາດດຽວກັນ, ສົມເດັດ ກຼໍລາໂຮມ ຊໍ ເຄັງ ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບ ຂອງທ່ານນາ ຍົກລັດຖະມົນຕີ ແລະ ພາກສ່ວນທີ່ກ່ຽວຂ້ອງ ຂອງ ສປປ ລາວ ໃນຄັ້ງນີ້, ພ້ອມທັງ ຕີລາຄາສູງ ຕໍ່ຜົນສຳເລັດ ໃນການພັດທະນາເສດຖະກິດ-ສັງຄົມ ຂອງ ສປປ ລາວ ຊຶ່ງມີການຂະຫຍາຍຕົວ ແລະ ໄດ້ຮັບການພັດທະນາຢ່າງວ່ອງໄວ. ​


ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ