ທ່ານ ສົມດີ ດວງດີ ຊີ້ນຳວຽກງານ ຄຕຟງ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພະຫັດ, 27 ກ.ພ 2020 17:00

​ໃນຕອນເຊົ້າຂອງ ວັນທີ 25 ກຸມພາ 2020 ທີ່ ຫ້ອງປະຊຸມໃຫຍ່ຊັ້ນ IV ທະນາຄານແຫ່ງ ສປປ ລາວ ໄດ້ຈັດກອງປະຊຸມຄະນະກຳມະການແຫ່ງຊາດ ເພື່ອຕ້ານການຟອກເງິນ ແລະ ສະໜອງທຶນໃຫ້ແກ່ການກໍ່ການຮ້າຍ (ຄຕຟງ) ສະໄໝສາມັນ ຄັ້ງທີ I ປະຈໍາປີ 2020 ໂດຍການໃຫ້ກຽດເປັນປະທານຂອງ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ປະທານ ຄຕຟງ. ພ້ອມນີ້, ກໍ່ມີບັນສະມາຊິກຄະນະກຳມະການເເຫ່ງຊາດ, ຄະນະສະເພາະກິດ ຮັບຜິດຊອບການປະເມີນຜົນຮອບດ້ານ, ກອງເລຂາ ແລະ ຜູ້ຕາງໜ້າກະຊວງກ່ຽວຂ້ອງເຂົ້າຮ່ວມ. 

ກອງປະຊຸມໄດ້ປຶກສາຫາລືຫຼາຍບັນຫາ ທີ່ມີຄວາມສໍາຄັນຕິດພັນກັບ ວຽກງານຕ້ານການຟອກເງິນ ແລະ ສະໜອງທຶນໃຫ້ແກ່ການກໍ່ການຮ້າຍຂອງ ສປປ ລາວ ໂດຍສະເພາະ ການກະກຽມຄວາມພ້ອມ ເພື່ອປະເມີນຜົນຮອບດ້ານ ຂອງ ສປປ ລາວ ໃນປີ 2020-2021; ກອງປະຊຸມໄດ້ຮັບຟັງການລາຍງານຄວາມຄືບໜ້າ ໃນການຈັດຕັ້ງປະຕິບັດວຽກງານຂອງບັນດາຄະນະກໍາມະການ ຂອງ 4 ພາກສ່ວນ ທີ່ຮັບຜິດຊອບການປະເມີນຜົນຮອບດ້ານ ຊຶ່ງປະກອບມີ: ພາກສ່ວນທີຮັບຜິດຊອບວຽກງານເຜີຍແຜ່ ແລະ ເຊື່ອມຊຶມ; ພາກສ່ວນທີຮັບຜິດຊອບວຽກງານນິຕິກໍາ ແລະ ກົນໄກ; ພາກສ່ວນທີ່ຮັບຜິດຊອບວຽກງານຄຸ້ມຄອງ ແລະ ພາກສ່ວນທີຮັບຜິດຊອບວຽກງານດໍາເນີນຄະດີ. ນອກຈາກນີ້, ກອງເລຂາ ຍັງໄດ້ລາຍງານກ່ຽວກັບວາລະການປະເມີນຜົນຮອບດ້ານ ວຽກງານຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ແລະ ການປະກອບຂໍ້ມູນໃສ່ບົດລາຍງານດ້ານນິຕິກໍາ ແລະ ກົນໄກຂອງ ສປປ ລາວ ແລະ ແຜນວຽກອື່ນໆ ໂດຍສຸມໃສ່:
- ຊຸກຍູ້ພາກສ່ວນກ່ຽວຂ້ອງ ໃຫ້ຮັບຮອງນິຕິກໍາໄປຕາມແຜນ ແລະ ສະໜອງເອກະສານທີ່ກ່ຽວຂ້ອງ ໃຫ້ກອງເລຂາ ເພື່ອຄັດຕິດໃສ່ບົດລາຍງານ ແລະ ນໍາສົ່ງໃຫ້ສາກົນ ໃຫ້ທັນຕາມກໍານົດເວລາ; 
- ກະກຽມສ້າງແຜນເຮັດວຽກນໍາແຕ່ລະພາກສ່ວນ ເພື່ອຮັບປະກັນການຄົ້ນຄວ້າ ປະກອບຂໍ້ມູນໃສ່ບົດລາຍງານ ດ້ານປະສິດທິຜົນ ການຈັດຕັ້ງປະຕິບັດວຽກງານ ຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ແລະ ຕອບຄໍາຖາມກັບຜູ້ປະເມີນ ໃນເວລາມີການປະເມີນຕົວຈິງ;
​- ກະກຽມຄວາມພ້ອມຮອບດ້ານ ເພື່ອເຮັດວຽກກັບທິມປະເມີນ ທີ່ຈະມາປະເມີນ ສປປ ລາວ ໃນກາງປີ 2020 ຫາຕົ້ນປີ 2021.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ