ທ່ານ ສົມດີ ດວງດີ ຊີ້ນຳກອງປະຊຸມ ຄຄຊ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພະຫັດ, 27 ກ.ພ 2020 16:00

​ກອງປະຊຸມຄະນະກໍາມະການຄຸ້ມຄອງຫຼັກຊັບ (ຄຄຊ) ຄັ້ງທີ I ປະຈໍາປີ 2020 ໄດ້ຈັດຂຶ້ນໃນວັນທີ 24 ກຸມພາ 2020 ທີ່ນະຄອນຫຼວງວຽງຈັນ ເພື່ອພິຈາລະນາ ແລະ ຮັບຮອງເອົາບາງວຽກງານສຳຄັນຕົ້ນຕໍ ພາຍໃຕ້ການເປັນປະທານຂອງທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ປະທານ ຄຄຊ; ພ້ອມນີ້, ກໍ່ມີຄະນະກໍາມະການ ຄຄຊ ແລະ ພາກສ່ວນກ່ຽວຂ້ອງ ເຂົ້າຮ່ວມ.  

ກອງປະຊຸມ ຄຄຊ ຄັ້ງນີ້ ໄດ້ດໍາເນີນໄປທ່າມກາງທີ່ທົ່ວພັກ, ທົ່ວລັດ ພວມສຸມໃສ່ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ; ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ; ສະເພາະຂະແໜງການເງິນ ພວມສຸມໃສ່ທົບທວນ ຄືນແຜນຍຸດທະສາດການພັດທະນາລະບົບສະຖາບັນການເງິນ-ເງິນຕາຂອງ ສປປ ລາວ ໃນໄລຍະປີ 2016-2025 ແລະ ວິໄສທັດຮອດປີ 2030 ກໍ່ຄືແຜນຍຸດທະສາດໃນການພັດທະນາຕະຫຼາດທຶນ (2016-2025) ແລະ ໃນເວລານີ້, ກໍ່ຢູ່ໃນທ່າມກາງສະພາບການ ທີ່ຫຼາຍປະເທດປະເທດ ພວມເກີດການແຜ່ລະບາດ ຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ (ໂຄວິດ-19) ເຮັດໃຫ້ມີຜູ້ຄົນຕິດເຊື້ອ ແລະ ເສຍຊີວິດຈຳນວນຫຼາຍສົມຄວນ ຊຶ່ງໄດ້ສົ່ງຜົນກະທົບໂດຍກົງຕໍ່ເສດຖະກິດຂອງໂລກ ກໍ່ຄືຂອງຊາດ ເປັນຕົ້ນແມ່ນ ລາຍຮັບຈາກການຄ້າ ແລະ ການທ່ອງທ່ຽວ.
ກອງປະຊຸມ ຄຄຊ ໃນເທື່ອນີ້ ຍັງໄດ້ຮັບຟັງ ແລະ ປຶກສາຫາລື ກ່ຽວກັບຄວາມຄືບໜ້າຂອງຜົນການຈັດຕັ້ງປະຕິບັດມະຕິກອງປະຊຸມ ຄຄຊ ຄັ້ງທີ IV ປີ 2019 ຜ່ານມາ ຊຶ່ງໄດ້ປະກອບສ່ວນເຂົ້າໃນການຈັດກອງປະຊຸມຮຽບຮຽງເນື້ອໃນ (ຮ່າງ) ກົດໝາຍວ່າດ້ວຍຫຼັກຊັບ (ສະບັບປັບປຸງ) ຮ່ວມກັບພາກສ່ວນກ່ຽວຂ້ອງ; ສຳເລັດການຄົ້ນຄວ້າເອກະສານ ສະເໜີຂໍອອກຈຳໜ່າຍຮຸ້ນຂອງບໍລິສັດເປົ້າໝາຍ 1 ແຫ່ງ ທີ່ມີເປົ້າໝາຍອອກຈຳໜ່າຍຮຸ້ນ ແລະ ຈົດທະບຽນໃນຕະຫຼາດຫຼັກຊັບລາວ; ໃນກອງປະຊຸມ ຍັງພິຈາລະນາການສະເໜີ ຂໍອອກຈຳໜ່າຍຮຸ້ນຂອງບໍລິສັດ 1 ແຫ່ງ; ຂໍ້ຕົກລົງ ວ່າດ້ວຍການເອົາຮຸ້ນ ເປັນຫຼັກຊັບອ້າງອີງໃນການອອກໃບຢັ້ງຢືນສິດ DR (ສ້າງໃໝ່); ບົດສະຫຼຸບວຽກງານການເຄື່ອນໄຫວ ຂອງ ສ.ຄຄຊ ແລະ ຂອງຕະຫຼາດຫຼັກຊັບລາວ ປະຈຳ ປີ 2019 ແລະ ແຜນການເຄື່ອນໄຫວ ປະຈໍາປີ 2020.
​ທ່ານຮອງນາຍົກລັດຖະມົນຕີ, ປະທານ ຄຄຊ ໄດ້ຮຽກຮ້ອງໃຫ້ບັນດາຜູ້ເຂົ້າຮ່ວມກອງປະຊຸມ ຈົ່ງໄດ້ເຊີດຊູຄວາມຮັບຜິດຊອບສູງ ແລະ ສຸມທຸກສະຕິປັນຍາຂອງຕົນ ເຂົ້າໃນການຈັດຕັ້ງປະຕິບັດວຽກງານສໍາຄັນຕົ້ນຕໍ ກ່ຽວກັບການຈັດຕັ້ງປະຕິບັດ ແຜນຍຸດທະສາດ ໃນການພັດທະນາຕະຫຼາດທຶນ ໃຫ້ມີປະສິດທິພາບສູງ ບົນພື້ນຖານເພື່ອຜົນປະໂຫຍດລວມຂອງຊາດ.  ​

ແຫຼ່ງ: ທະນາຄານ ແຫ່ງ ສປປ ລາວ