ທ່ານນາຍົກ ຕ້ອນຮັບ ລັດຖະມົນຕີຕ່າງປະເທດຟີລິບປິນ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນພະຫັດ, 20 ກ.ພ 2020 19:00

​​ໃນຕອນບ່າຍ ຂອງວັນທີ 20 ກຸມພາ 2020 ທີ່ ຫ້ອງວ່າການສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ, ນາຍົກລັດຖະມົນຕີ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບ ຂອງທ່ານ ເຕໂຢໂດໂຣ ລັອກຊິນ ຈູເນຍ (TEODORO L. LOCSIN JR), ລັດຖະມົນຕີຕ່າງປະເທດຟີລິບປິນ ພ້ອມດ້ວຍຄະນະ ໃນໂອກາດເດີນທາງມາເຂົ້າຮ່ວມ ກອງປະຊຸມລັດຖະມົນຕີຕ່າງປະເທດ ອາຊຽນ-ຈີນ ສະໄໝພິເສດ ທີ່ຈັດຂຶ້ນຢູ່ ສປປ ລາວ.

ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ການໃຫ້ກຽດມາເຂົ້າຮ່ວມ ກອງປະຊຸມລັດຖະມົນຕີຕ່າງປະເທດ ອາຊຽນ-ຈີນ ທີ່ຈັດຂຶ້ນຢູ່ ສປປ ລາວ ໃນຄັ້ງນີ້, ພ້ອມທັງ ສະແດງຄວາມຊົມເຊີຍຕໍ່ຜົນສໍາເລັດ ໃນການເປັນເຈົ້າພາບຈັດງານມະຫາກໍາກິລາຊີເກມ ຄັ້ງທີ 30 ດ້ວຍຜົນສໍາເລັດຢ່າງຈົບງາມ, ຊຶ່ງເຈົ້າພາບຟີລິບປິນ ສາມາດເປັນເຈົ້າຫຼຽນຄໍາ. ໃນໂອກາດນີ້, ທ່ານນາຍົກລັດຖະມົນຕີ ຍັງໄດ້ຝາກຄວາມຢ້ຽມຢາມຖາມຂ່າວ ຜ່ານທ່ານລັດຖະມົນຕີຕ່າງປະເທດ ໄປຍັງທ່ານປະທານາທິບໍດີ ແຫ່ງ ສາທາລະນະລັດຟີລິບປິ່ນ ແລະ ຫວັງຢ່າງຍິ່ງວ່າ ຈະໄດ້ພົບປະກັບທ່ານປະທານາທິບໍດີ ໃນໂອກາດໄປຢ້ຽມຢາມປະເທດຟີລິບປິນຢ່າງເປັນທາງການ ເພື່ອສະສະເຫຼີມສະຫຼອງ ຄົບຮອບ 65 ປີ ສາຍພົວພັນການທູດ ລາວ-ຟີລິບປິນ, ແນໃສ່ເພື່ອສືບຕໍ່ຮັດແໜ້ນສາຍພົວພັນມິດຕະ ພາບ ແລະ ເສີມຂະຫຍາຍການຮ່ວມມື ລະຫວ່າງສອງປະເທດ ໃຫ້ໃກ້ຊິດ ແລະ ຂະຫຍາຍຕົວຍິ່ງໆຂຶ້ນ. ນອກຈາກນັ້ນ, ທ່ານນາຍົກລັດຖະມົນຕີ ຍັງໄດ້ຕີລາຄາສູງ ຕໍ່ສາຍພົວພັນ ແລະ ການຮ່ວມມື ລະຫວ່າງ ສປປ ລາວ ແລະ ສາທາລະນະລັດຟີລິບປິນ, ຊຶ່ງລ້ວນແຕ່ມີມູນເຊື້ອອັນດີງາມ, ນັບມື້ແໜ້ນແຟ້ນ ແລະ ໄດ້ຮັບໝາກຜົນເປັນກ້າວໆ. ໃນຕອນທ້າຍ, ທ່ານນາຍົກລັດຖະມົນຕີ ຍັງໄດ້ສະແດງຄວາມຂອບໃຈ ຕໍ່ລັດຖະບານຟີລິບປິນ ທີ່ໄດ້ໃຫ້ການຊ່ວຍເຫຼືອ ແກ່ ສປປ ລາວ ໃນໄລຍະຜ່ານມາ ເປັນຕົ້ນ ການພັດທະນາຊັບພະຍາກອນມະນຸດ, ການຝຶກອົບຮົມ, ເຕັກນິກວິຊາການ, ລວມທັງ ການສະໜັບສະໜູນຊ່ວຍເຫຼືອ ແລະ ອຳນວຍຄວາມສະດວກໃນດ້ານອື່ນໆ ໂດຍສະເພາະ ຂົງເຂດວຽກງານການຕ່າງປະເທດ, ພ້ອມກັນນັ້ນ ກໍ່ຫວັງຢ່າງຍິ່ງວ່າ ລັດຖະບານ ແລະ ພາກສ່ວນທີ່ກ່ຽວຂ້ອງ ຂອງຟີລິບປິນ ຈະສືບຕໍ່ໃຫ້ການຊ່ວຍເຫຼືອແກ່ ສປປ ລາວ ຕື່ມອີກ.
​ໃນໂອກາດດຽວກັນ, ທ່ານລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດຟີລິບປິນ ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານນາຍົກລັດຖະມົນຕີ ແລະ ພາກສ່ວນທີ່ກ່ຽວຂ້ອງ ຂອງ ສປປ ລາວ ໃນຄັ້ງນີ້​.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ