ຮອງນາຍົກລັດຖະມົນຕີ ເນັ້ນການນໍາໃຊ້ ໄອຊີທີ ໃຫ້ເກີດປະໂຫຍດສູງສຸດ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນສຸກ, 14 ກ.ພ 2020 15:00

​​​​​​​​​​​ກອງປະຊຸມວຽກງານໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ປະຈໍາປີ 2019 ໄດ້ອັດລົງດ້ວຍຜົນສໍາເລັດອັນຈົບງາມ ທີ່ສູນການຮ່ວມມືລາວ-ຢີ່ປຸນ (ຫຼັກ 5), ນະຄອນຫຼວງວຽງຈັນ ໃນຕອນບ່າຍຂອງວັນທີ 13 ກຸມພາ 2020 ນີ້, ໂດຍການເປັນປະທານ ແລະ ໃຫ້ກຽດໂອ້ລົມຂອງ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງີນ ມີບັນດາທ່ານລັດຖະມົນຕີ, ຮອງລັດຖະມົນຕີ, ບັນດາຂະແໜງການທີ່ກ່ຽວຂ້ອງ ພ້ອມດ້ວຍ ແຂກທີ່ຖືກເຊີນເຂົ້າຮ່ວມ.
​​​​​​​​​​ໃນກອງປະຊຸມ ທ່ານ ປອ. ທັນສະໄໝ ກົມມະສິດ ລັດຖະມົນຕີກະຊວງໄປສະນີ, ໂທລະຄົມມະນາຄົມ ແລະ ການສື່ສານ ໄດ້ລາຍງານໃຫ້ຊາບກ່ຽວກັບຜົນຂອງກອງປະຊຸມວຽກງານ ໄປສະນີ, ໂທລະຄົມມະນາຄົມ ແລະ ການສື່ສານ ໃນປີ 2019 ແລະ ທິດທາງແຜນການ ປະຈໍາປີ 2020 ຊຶ່ງຈະໄດ້ສືບຕໍ່ຈັດຕັ້ງຜັນຂະຫຍາຍແນວທາງຂອງພັກ ແລະ ແຜນພັດທະນາເສດຖະກິດ-ສັງຄົມ ເພື່ອເຮັດໃຫ້ວຽກງານດັ່ງກ່າວ ກາຍເປັນກຳລັງຂັບເຄື່ອນທີ່ແຂງແຮງ ເຂົ້າໃນການພັດທະນາເສດຖະກິດ, ສັງຄົມ, ວັດທະນະທຳ, ສິ່ງແວດລ້ອມ, ວຽກງານປ້ອງກັນຊາດ, ປ້ອງກັນຄວາມສະຫງົບ ແລະ ການເຊື່ອມໂຍງກັບພາກພື້ນ ແລະ ສາກົນ.
                   
​​​​​​​​​​ໂອກາດນີ້, ທ່ານ ສົມດີ ດວງດີ ໄດ້ໃຫ້ກຽດໂອ້ລົມ ແລະ ຊີ້ນໍາຕໍ່ກອງປະຊຸມ ເຊິ່ງກ່ອນອຶ່ນທ່ານໄດ້ສະແດງຄວາມຍ້ອງຍໍ, ຊົມເຊີຍ ຕໍ່ຜົນສໍາເລັດທີ່ຍາດມາໄດ້ ທີ່ສ່ອງແສງເຖິງຄວາມຮັບຜິດຊອບ ຂອງທຸກຂະແໜງການ ຕໍ່ວຽກງານໄອຊີທີ ເປັນຕົ້ນແມ່ນ ການເປັນເຈົ້າພາບ ຈັດກອງປະຊຸມລັດຖະມົນຕີອາຊຽນ ດ້ານໄອຊີທີ ທີ່ປະສົບຜົນສໍາເລັດຢ່າງຈົບງາມ. ພ້ອມນີ້, ທ່ານຍັງຍົກໃຫ້ເຫັນເຖິງຄວາມສໍາຄັນຂອງອິນເຕີເນັດ ເຕັກໂນໂລຊີດິຈິຕອນ ນັບມື້ນັບມີຜົນກະທົບຕໍ່ການດໍາລົງຊີວິດຂອງຄົນເຮົາ ກໍ່ຄື ການພັດທະນາປະເທດ. ສະນັ້ນ, ແຕ່ລະຂະແໜງການ ກໍ່ຄື ບັນດາອົງການຈັດຕັ້ງລັດຕ່າງໆ ຕ້ອງຖືເອົາການນໍາໃຊ້ເຕັກໂນໂລຊີດິຈິຕອນ ເປັນໃຈກາງ ເປັນເຄື່ອງມືທີ່ສຳຄັນໃນການຍົກ ສູງປະສິດທິພາບ ແລະ ປະສິດທິຜົນ ຂອງການປະຕິບັດງານ ແລະ ເພື່ອໃຫ້ບັນລຸວັດຖຸປະສົງ ບັນດາຂະແໜງການຄວນມີ ແຜນຍຸດທະສາດ ຫຼື ແຜນງານການນໍາໃຊ້ ໄອຊີທີ ໃນຂະແໜງການຂອງຕົນ ພ້ອມທັງ ມີການປະສານງານ ກັບກະຊວງ ປທສ ໃນການຈັດຕັ້ງປະຕິບັດ ເພື່ອຮັບປະກັນໃຫ້ມີການເຊື່ອມໂຍງ ລະຫວ່າງຂໍ້ມູນ ແລະ ຖານຂໍ້ມູນ ຂອງບັນດາອົງການຈັດຕັ້ງລັດ ໃຫ້ເປັນມາດຕະຖານດຽວກັນ. ຫຼີກລ່ຽງການລົງທຶນທີ່ຊໍ້າຊ້ອນ. ບັນດາຫ້ອງການຕ່າງໆ ຕ້ອງຕັ້ງໜ້າຫັນໄປສູ່ການບໍລິການແບບອອນລາຍ ເທື່ອລະກ້າວ. ບັນດາລັດວິສາຫະກິດ ຕ້ອງມີການປັບປຸງການດໍາເນີນທຸລະກິດ ໃຫ້ທັນກັບສະພາບການ, ສ້າງໃຫ້ມີນະວັດຕະກໍາໃໝ່ ການດໍາເນີນທຸລະກິດ, ຫຼຸດຕົ້ນທຶນຄ່າໃຊ້ຈ່າຍທີ່ບໍ່ຈໍາເປັນ, ຫຼີກລ່ຽງການລົງທຶນ ທີ່ບໍ່ເກີດປະໂຫຍດ, ເປີດໂອກາດໃຫ້ປະຊາຊົນ ຊອກຮູ້ຮໍ່າຮຽນສິ່ງໃໝ່ໆ ແລະ ຮັບເອົາກາລະໂອກາດ ຂອງການນໍາໃຊ້ ໄອຊີທີ ໃຫ້ເກີດປະໂຫຍດສູງສຸດ ແຕ່ໃຫ້ມີສະຕິ ແລະ ມີຈັນຍາບັນ, ຫຼີກເວັ້ນການຕົກເປັນເຫຍື່ອຂອງກຸ່ມຄົນບໍ່ດີ ທີ່ອາດຈະມີການເຜີຍແຜ່ຂໍ້ມູນຂ່າວສານ ທີ່ບໍ່ຖືກຕ້ອງ ຫຼື ຊັກຊວນໃຫ້ກະທໍາສິ່ງທີ່ຜິດຕໍ່ລະບຽບກົດໝາຍ. ພ້ອມດຽວກັນນີ້, ທ່ານຍັງໄດ້ເນັ້ນໜັກໃຫ້ ຂະແໜງການ ປທສ ສືບຕໍ່ສ້າງ ແລະ ປັບປຸງນະໂຍບາຍ ແລະ ຍຸດທະສາດທີ່ຖືກຕ້ອງ ສອດຄ່ອງກັບແນວທາງນະໂຍບາຍ ລະບຽບກົດໝາຍຂອງພັກ-ລັດຖະບານ ກໍ່ຄື ສະພາບການປ່ຽນແປງຂອງດິຈິຕອນ ໃນແຕ່ລະໄລຍະ. 

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ