ຮອງນາຍົກ ເນັ້ນໃຫ້ທຸກພາກສ່ວນໃນສັງຄົມ ມີສ່ວນຮ່ວມໃນວຽກງານຕ້ານການຄ້າມະນຸດ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນສຸກ, 14 ກ.ພ 2020 14:00

​​​​​​​​​ໃນວັນທີ 13 ກຸມພາ 2020, ທີ່ຫໍປະຊຸມແຫ່ງຊາດ, ຄະນະກໍາມະການຕ້ານການຄ້າມະນຸດລະດັບຊາດ ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານຕ້ານການຄ້າມະນຸດ ປະຈໍາປີ 2019 ແລະ ທິດທາງແຜນການປີ 2020  ພາຍໃຕ້ການເປັນປະທານຂອງ ທ່ານ  ສອນໄຊ ສີພັນດອນ, ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ປະທານຄະນະກໍາມະການຕ້ານການຄ້າມະນຸດລະດັບຊາດ, ມີບັນດາທ່ານຄະນະກໍາມະການຕ້ານການຄ້າມະນຸດລະດັບຊາດ, ຄະນະກໍາມະການຕ້ານການຄ້າມະນຸດແຂວງ ແລະ ນະຄອນຫຼວງວຽງຈັນ, ແລະ ບັນດາສະມາຊິກກອງເລຂາຄະນະກຳມະການຕ້ານການຄ້າມະນຸດ ແລະ ແຂກຖືກເຊີນ ເຂົ້າຮ່ວມຢ່າງພ້ອມພຽງ.

​​​​​​​​​ໃນກອງປະຊຸມ  ທ່ານ ພົນໂທ ວິໄລ ຫຼ້າຄຳຟອງ  ລັດຖະມົນຕີກະຊວງປ້ອງກັນຄວາມສະຫງົບ, ຮອງປະທານຄະນະກຳມະການ ຕ້ານການຄ້າມະນຸດລະດັບຊາດ (ຜູ້ປະຈຳການ) ໄດ້ລາຍງານການຈັດຕັ້ງປະຕິບັດວຽກງານ ຕ້ານການຄ້າມະນຸດ ຍາດມາໄດ້ໃນໄລຍະ 01 ປີຜ່ານມາ  ເຊີ່ງທ່ານໄດ້ຍົກໃຫ້ເຫັນຜົນສຳເລັດ ແລະ ຜົນງານຫຼາຍດ້ານ ເປັນຕົ້ນ ສາມາດສ້າງຕັ້ງຄະນະກຳມະການ ຕ້ານການຄ້າມະນຸດແຂວງ ແລະ ນະຄອນຫຼວງວຽງຈັນ ສຳເລັດ 12 ແຂວງ ແລະ ບາງແຂວງ ໄດ້ສ້າງຕັ້ງຄະນະກຳມະການ ຕ້ານການຄ້າມະນຸດຂັ້ນເມືອງສຳເລັດ ຈຳນວນໜຶ່ງ; ໄດ້ສ້າງ ແລະ ປັບປຸງ ນິຕິກໍາ ຫຼາຍສະບັບ ລວມທັງສໍາເລັດການສ້າງຄູ່ມືການປົກປ້ອງ, ການຊ່ວຍເຫຼືອ ແລະ ການສົ່ງຕໍ່ຜູ້ຖືກເຄາະຮ້າຍຈາກການຄ້າມະນຸດ, ໄດ້ສຸມໃສ່ເຮັດວຽກງານປ້ອງກັນ, ໂຄສະນາປູກຈິດສຳນຶກ ດ້ວຍຫຼາຍຮູບແບບ ເປັນຕົ້ນ ໂຄສະນາທາງໂທລະພາບ, ວິທະຍຸ, ສັງຄົມອອນລາຍ ເພື່ອເຮັດໃຫ້ສັງຄົມ ມີສະຕິລະວັງຕົວ ແລະ ປະກອບສ່ວນເຮັດວຽກງານຕ້ານການຄ້າມະນຸດ ໄດ້ກ້ວາງຂວາງ, ສາມາດນຳເອົາຜູ້ກະທຳຜິດມາລົງໂທດ,  ສາມາດປົກປ້ອງ ແລະ ຊ່ວຍເຫຼືອຜູ້ຖືກເຄາະຮ້າຍ ແລະ ກຸ່ມສ່ຽງຈາກການຄ້າມະນຸດ ໄດ້ຫຼາຍສົມຄວນ ແລະ ໄດ້ສົ່ງກັບຄືນຄອບຄົວ ແລະ ສັງຄົມ ຢ່າງປອດໄພ, ພ້ອມນັ້ນ ໄດ້ພົວພັນຮ່ວມມືກັບຕ່າງປະເທດ, ອົງການຈັດຕັ້ງສາກົນ, ອົງການຈັດຕັ້ງສາກົນທີ່ບໍ່ສັງກັດລັດຖະບານ ໃນການຈັດຕັ້ງປະຕິບັດໂຄງການ, ກິດຈະກຳ ວຽກງານຕ້ານການຄ້າມະນຸດ ໄດ້ຢ່າງເປັນປົກກະຕິ ແລະ  ມີຜົນສຳເລັດຫຼາຍດ້ານ. ແຕ່ຄຽງຄູ່ກັບຜົນງານ ແລະ ດ້ານດີ ຍັງບາງຂໍ້ຄົງຄ້າງ, ເປັນຕົ້ນ ການຈັດຕັ້ງປະຕິບັດວຽກງານຂອງເຈົ້າໜ້າທີ່, ພະນັກງານບາງຂະແໜງການ ຢູ່ບາງທ້ອງຖິ່ນ  ຍັງບໍ່ທັນເປັນລະບົບ ຈຶ່ງເຮັດໃຫ້ການຈັດຕັ້ງປະຕິບັດ ວຽກງານຄ້າມະນຸດ ຍັງບໍ່ທັນໄດ້ຫຼາຍ ເທົ່າທີ່ຄວນ; ການໂຄສະນາປູກຈິດສໍານຶກ ໃຫ້ສັງຄົມຮັບຮູ້ເຂົ້າໃຈຜົນຮ້າຍ, ຄວາມເປັນອັນຕະລາຍ ຂອງການຄ້າມະນຸດ, ລວມທັງ ການຜະລິດສື່, ສິ່ງພິມ ເພື່ອໂຄສະນາປູກຈິດສຳນຶກ ເຖິງໄດ້ເຮັດຢ່າງຕໍ່ເນື່ອງລຽນຕິດກໍ່ຕາມ ແຕ່ຍັງບໍ່ທັນຫຼາກຫຼາຍ ແລະ ບໍ່ທັນທົ່ວເຖິງ ເທົ່າທີ່ຄວນ; ການດຳເນີນຄະດີ ແລະ ບັງຄັບໃຊ້ກົດໝາຍ ຍັງເຮັດບໍ່ທັນໄດ້ດີເທົ່າທີ່ຄວນ; ການສະໜອງດ້ານເສດຖະກິດເບື້ອງຕົ້ນໃຫ້ແກ່ຜູ້ຖືກເຄາະຮ້າຍ ແລະ ການຕິດຕາມພາຍຫຼັງກັບຄືນສູ່ຄອບຄົວ-ສັງຄົມ ຍັງບໍ່ທັນໄດ້ດີ. ​
                            
​​​​​​​​​ພາຍຫຼັງຮັບຟັງການລາຍງານ, ທ່ານ ສອນໄຊ ສີພັນດອນ ໄດ້ສະແດງຄວາມຊົມເຊີຍ ຕໍ່ຄະນະກໍາມະການຕ້ານການຄ້າມະນຸດລະດັບຊາດທຸກຂັ້ນ ທີ່ໄດ້ເອົາໃຈໃສ່ປະຕິບັດໜ້າທີ່ຂອງຕົນ ມີຜົນສໍາເລັດຫຼາຍດ້ານ ໃນປີ 2019. ແຕ່ເພື່ອເຮັດໃຫ້ການຈັດຕັ້ງປະຕິບັດວຽກງານສະກັດກັ້ນ ແລະ ຕ້ານການຄ້າມະນຸດໃນປີ 2020 ມີປະສິດທິຜົນສູງ ແລະ ເພື່ອແກ້ໄຂຂໍ້ຄົງຄ້າງ ຜ່ານມາ, ທ່ານ ສອນໄຊ ສີພັນດອນ ໄດ້ມີຄຳເຫັນຊີ້ນຳ ແລະ ເນັ້ນໜັກ ໃຫ້ເອົາໃຈໃສ່ບາງດ້ານຕື່ມ, ເປັນຕົ້ນ ໃຫ້ບັນດາຄະນະກຳມະການ ຕ້ານການຄ້າມະນຸດທຸກຂັ້ນ ສຸມໃສ່ຜັນຂະຫຍາຍແຜນງານແຫ່ງຊາດ ວ່າດ້ວຍການສະກັດກັ້ນ ແລະ ຕ້ານການຄ້າມະນຸດ ໄລຍະ II ປີ 2017-2020 ແລະ ແຜນການປີ 2020 ມາເປັນແຜນງານລະອຽດ ແລະ ຈັດຕັ້ງປະຕິບັດຕາມພາລະບົດບາດຂອງຕົນ ໃຫ້ມີປະສິດທິຜົນ; ໃຫ້ສືບຕໍ່ສ້າງຕັ້ງຄະນະກຳມະການຕ້ານການຄ້າມະນຸດເມືອງ, ເທດສະບານ, ນະຄອນ ໃຫ້ສຳເລັດ; ເອົາໃຈໃສ່ວຽກງານສະໜອງ, ບຳລຸງ ແລະ ຍົກລະດັບບຸກຄະລາກອນ ຮັບຜິດຊອບວຽກງານດັ່ງກ່າວ; ສືບຕໍ່ ຄົ້ນຄ້ວາ ສ້າງເອກະສານນິຕິກຳ ທີ່ຍັງບໍ່ທັນມີ ແລະ ປັບປຸງບັນດາເອກະສານນິຕິກຳຕ່າງໆ ທີ່ບໍ່ທັນຮັດກຸມ ເພື່ອທີ່ເປັນບ່ອນອີງໃນການຈັດຕັ້ງປະຕິບັດວຽກງານ ໃຫ້ມີປະສິດທິຜົນສູງ; ເພີ່ມທະວີການໂຄສະນາປູກຈິດສໍານຶກ ໃຫ້ທົ່ວສັງຄົມ ກ່ຽວກັບຜົນຮ້າຍຂອງການຄ້າມະນຸດ, ເຮັດໃຫ້ວຽກງານຕ້ານການຄ້າມະນຸດ ເປັນຄວາມຮັບຜິດຊອບ ຂອງທົ່ວສັງຄົມ, ທຸກຊັ້ນຄົນ, ທຸກເພດ, ທຸກໄວ, ທຸກອົງການຈັດຕັ້ງ ໂດຍເອົາການໂຄສະນາ ແນວທາງນະໂຍບາຍຂອງພັກ, ກົດໝາຍ, ລະບຽບການຂອງລັດ; ສຸມໃສ່ການດໍາເນີນຄະດີ, ປ້ອງກັນສະກັດກັ້ນ ແລະ ຊ່ວຍເຫຼືອຜູ້ຖືກເຄາະຮ້າຍຈາກການຄ້າມະນຸດ, ເລີກຮື້ບັນຫາໂສເພນີ, ຮ່ວມເພດກັບເດັກ, ແກ້ໃຫ້ໄດ້ບັນດາຫົວໂປ່ໂຕການ, ມ້າງໃຫ້ໄດ້ສາຍໃຍການຈັດຕັ້ງ ຫຼື ເຄືອຂ່າຍການກໍ່ອາຊະຍາກຳ; ເພີ່ມທະວີການປະສານສົມທົບກັບພາກສ່ວນທີ່ກ່ຽວຂ້ອງ ເພື່ອຄຸ້ມຄອງ, ແກ້ໄຂບັນຫາຄົນລາວ ແຕ່ງດອງກັບຄົນຕ່າງປະເທດ ແບບບໍ່ຖືກຕ້ອງ ແລະ ຄຸ້ມຄອງບັນດາບໍລິສັດຈັດຫາງານ ໃນການເຄື່ອນຍ້າຍແຮງງານໄປຕ່າງປະເທດ ໃຫ້ຖືກຕ້ອງ ເພື່ອຫຼຸດຜ່ອນຄວາມສ່ຽງ ຂອງການຄ້າມະນຸດ; ເອົາໃຈໃສ່ຕິດຕາມ, ກວດກາ ແລະ ຄຸ້ມຄອງບັນດາໂຄງການຕ້ານການຄ້າມະນຸດ ຢູ່ສູນກາງ ແລະ ທ້ອງຖິ່ນ ໃຫ້ຈັດຕັ້ງປະຕິບັດຖືກຕ້ອງຕາມລະບຽບກົດໝາຍ; ເພີ່ມທະວີການປະສານສົມທົບກັນໃຫ້ແໜ້ນແຟ້ນ ລະຫວ່າງ ຄະນະກຳມະການຕ້ານການຄ້າມະນຸດຂັ້ນສູນກາງ ແລະ ທ້ອງຖິ່ນ ເພື່ອຮັບປະກັນການຈັດຕັ້ງປະຕິບັດວຽກງານ ມີຄວາມຄ່ອງຕົວ ແລະ ມີປະສິດທິຜົນເພີ່ມຂຶ້ນ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ