ກອງປະຊຸມປຶກສາຫາລືຄວາມຄືບໜ້າການແກ້ໄຂໄພພິບັດເມືອງສະໜາມໄຊ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນຈັນ, 10 ກ.ພ 2020 13:00

​​​​ໃນວັນທີ 3 ກຸມພາ 2020 ທີ່ຜ່ານມາ ຢູ່ສໍານັກງານນາຍົກລັດຖະມົນຕີ, ຄະນະສະເພາະກິດແກ້ໄຂໄພພິບັດລະດັບຊາດ ໄດ້ຈັດກອງປະຊຸມປຶກສາຫາລືກ່ຽວກັບ ຄວາມຄືບໜ້າການແກ້ໄຂໄພພິບັດຢູ່ເມືອງສະໜາມໄຊ, ແຂວງອັດຕະປື, ໂດຍການເປັນປະທານຂອງ ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ, ປະທານຄະນະກໍາມະການສະເພາະກິດ ແກ້ໄຂໄພພິບັດລະດັບຊາດ; ມີທ່ານລັດຖະມົນຕີ, ເຈົ້າແຂວງອັດຕະປື ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

​​​ໃນກອງປະຊຸມ, ທ່ານ ອຸ່ນຫຼ້າ ໄຊຍະສິດ, ຮອງເຈົ້າແຂວງອັດຕະປື ໄດ້ລາຍງານໃຫ້ຊາບ ກ່ຽວກັບຄວາມຄືບໜ້າບັນດາໜ້າວຽກຕ່າງ ໃນການແກ້ໄຂໄພພິບັດຢູ່ເມືອງສະໜາມໄຊ ເປັນຕົ້ນ ວຽກງານສັງຄົມສົງເຄາະ; ວຽກງານຄຸ້ມຄອງສູນ; ວຽກງານປະເມີນຜົນກະທົບ ແລະ ການຊົດເຊີຍ; ວຽກງານຟື້ນຟູພື້ນຖານໂຄງລ່າງ ແລະ ຈັດສັນອາຊີບ; ວຽກງານເຈລະຈາຮ່ວມກັບບໍລິສັດຜູ້ຮັບຜິດຊອບ ແລະ ວຽກງານງົບປະມານ.
​​​​ໂອກາດດັ່ງກ່າວ, ທ່ານ ສອນໄຊ ສີພັນດອນ ໄດ້ສະແດງຄວາມຍ້ອງຍໍຊົມເຊີີຍ ຕໍ່ຄະຮັບຜິດຊອບ ກໍ່ຄື ອໍານາດການປົກແຂວງອັດຕະປື ທີ່ໄດ້ຕິດຕາມເອົາໃຈໃສ່ແກ້ໄຂ ເຮັດໃຫ້ການແກ້ໄຂໄພພິບັດ ຢູ່ເມືອງສະໜາມໄຊ ມີຄວາມໜ້າໃນຫຼາຍດ້ານ. ພ້ອມດຽວກັນນີ້, ທ່ານ ສອນໄຊ ສີພັນດອນ ຍັງໄດ້ເນັ້ນໜັກໃຫ້ອໍານາດການປົກແຂວງອັດປື ແລະ ທຸກພາກສ່ວນທີ່ກ່ຽວຂ້ອງ ສືບຕໍ່ເອົາໃຈໃສ່ ເປັນຕົ້ນ ສຶບຕໍ່ເອົາໃຈໃສ່ວຽກປະເມີນຜົນກະທົບໃຫ້ຖືກຕ້ອງ ແລະ ແທດກັບຕົວຈິງ, ສືບຕໍ່ເຈລະຈາກັບບໍລິສັດຮັບຜິດຊອບ ໂດຍສະເພາະ ການຊົດເຊີຍໃຫ້ປະຊາຊົນທີ່ໄດ້ຮັບຜົນກະທົບ; ກວດກາ ແລະ ສະຫຼຸບການຈັດນໍາໃຊ້ງົບປະມານຈາກການຊ່ວຍເຫຼືອ ທີ່ນໍາໃຊ້ເຂົ້າໃນການຈັດຕັ້ງປະຕິບັດວຽກງານຕ່າງໆ ຢູ່ເມືອງສະໜາມໄຊ; ເອົາໃຈໃສ່ວຽກງານຄຸ້ມຄອງສູນພັກຊົ່ວຄາວ ຂອງປະຊາຊົນ ທີ່ຖືກຜົນກະທົບຈາກໄພພິບັດ ໃນໄລຍະຜ່ານມາ; ກວດກາຄືນການນໍາໃຊ້ເງິນ ຈາກການຂາຍໄມ້ທີ່ບຸກເບີກເນື້ອທີ່ ບ້ານຈັດສັນໃໝ່; ສືບຕໍ່ໃຫ້ການຊ່ວຍເຫຼືອເດັກກໍາພ້າ-ກໍາພອຍ ໃຫ້ໄດ້ສຶກສາຮໍ່າຮຽນ ແລະ ມີວິຊາສະເພາະ; ກວດກາຄືນຄວາມເສຍຫາຍດ້ານພື້ນຖານໂຄງລ່າງ ລວມທັງ ຄວາມເສຍຫາຍດ້ານສິ່ງແວດລ້ອມ. ສໍາຄັນ ໃຫ້ສືບຕໍ່ເອົາໃຈໃສ່ແກ້ໄຂບັນຫາທີ່ຍັງຄົງຄ້າງຕ່າງໆ ໂດຍມີການປະສານ ແລະ ລາຍງານໃຫ້ລັດຖະບານ ເປັນແຕ່ລະໄລຍະ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ