ກອງປະຊຸມປຶກສາຫາລື ການປ້ອງກັນ-ຄວບຄຸມ ເຊື້ອພະຍາດອັກເສບປອດສາຍພັນໃໝ່

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນຈັນ, 03 ກ.ພ 2020 19:00

​​​​​​​​​​​​​​ໃນຕອນບ່າຍ ຂອງວັນທີ 3 ກຸມພາ 2020 ທີ່ ສຳນັກງານນາຍົກລັດຖະມົນຕີ, ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການລະບາດ ຂອງພະຍາດອັກເສບປອດ ຈາກເຊື້ອຈຸລະໂຣກສາຍພັນໃໝ່ (Novel Corona Virus: NCoV) ໄດ້ດໍາເນີນກອງປະຊຸມປຶກສາຫາລື ແລະ ຕີລາຄາຄືນ ການຈັດຕັ້ງປະຕິບັດວຽກງານ ການປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດອັກເສບປອດ ໃນໄລຍະຜ່ານມາ ແລະ ກຳນົດບາງມາດຕະການໃໝ່ ໃນການຈັດຕັ້ງປະຕິບັດວຽກງານ ໃນຕໍ່ໜ້າ, ພາຍໃຕ້ການເປັນປະທານ ຂອງທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຫົວໜ້າຄະນະສະເພາະກິດ ຮັບຜິດຊອບວຽກງານດັ່ງກ່າວ ແລະ ໃຫ້ກຽດເຂົ້າຮ່ວມຊີ້ນຳ ໃນວາລະຕອນທ້າຍຂອງກອງປະຊຸມ ຈາກທ່ານ ທອງລຸນ ສີສຸລິດ, ນາຍົກລັດຖະມົນຕີ.

​​​​​​​​​​​​ກອງປະຊຸມ ໄດ້ຜ່ານຂໍ້ຕົກລົງ ຂອງນາຍົກລັດຖະມົນຕີ ສະບັບເລກທີ 09/ນຍ, ລົງວັນທີ 3 ກຸມພາ 2020 ວ່າດ້ວຍການແຕ່ງຕັ້ງຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດອັກເສບປອດ ຈາກເຊື້ອຈຸລະໂຣກສາຍພັນໃໝ່ (Novel Corona Virus: NCoV), ຊຶ່ງການອອກຂໍ້ຕົກລົງດັ່ງກ່າວ ແມ່ນເພື່ອສືບຕໍ່ເຮັດໃຫ້ການຈັດຕັ້ງປະຕິບັດວຽກງານ ທີ່ກ່ຽວຂ້ອງຮອບດ້ານໃນຕໍ່ໜ້າ ຮັບປະກັນປະສິດທິພາບ ແລະ ປະສິດທິຜົນກວ່າເກົ່າ; ໃນນັ້ນ ຄະນະດັ່ງກ່າວ ແມ່ນທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ເປັນຫົວໜ້າຄະນະ, ທ່ານລັດຖະມົນຕີກະຊວງສາທາລະນະສຸກ ເປັນຮອງຫົວໜ້າ ແລະ ປະກອບດ້ວຍຮອງລັດຖະມົນຕີກະຊວງທີ່ກ່ຽວຂ້ອງ ເປັນຄະນະ, ໂດຍມີໜ້າທີ່ ຊີ້ນຳ ແລະ ຊຸກຍູ້ ທຸກພາກສ່ວນໃນສັງຄົມ ລວມທັງ ການຈັດຕັ້ງຂອງລັດ, ອົງການປົກຄອງທ້ອງຖິ່ນ, ພາກສ່ວນເອກະຊົນ, ອົງການຈັດ ຕັ້ງສາກົນທີ່ເຄື່ອນໄຫວ ໃນ ສປປ ລາວ ເຂົ້າຮ່ວມ ແລະ ເປັນເຈົ້າການ ໃນການປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດອັກເສບປອດ, ພ້ອມທັງ ຕິດຕາມ, ກວດກາ ແລະ ປະເມີນສະພາບການຢ່າງໃກ້ຊິດ ແລ້ວລາຍງານໃຫ້ລັດຖະບານຮັບຊາບ ເປັນປົກກະຕິຕໍ່ເນື່ອງ ແລະ ທັນເວລາ; ແຕ່ງຕັ້ງຄະນະຜູ້ຊ່ວຍວຽກຂອງຕົນ ເພື່ອລົງເລິກຄົ້ນຄວ້າມາດຕະການ, ວິທີການຕ່າງໆທີ່ເໝາະສົມ ແລະ ເປັນໃຈກາງ ໃນການພົວພັນປະສານງານ ກັບຂະແໜງການທີ່ກ່ຽວຂ້ອງ, ອຳນາດການປົກຄອງແຕ່ລະຂັ້ນ, ບັນດາປະເທດໃຫ້ຄຽງ, ຄູ່ຮ່ວມພັດທະນາ ແລະ ທຸກພາກສ່ວນໃນສັງຄົມ ໃນການປ້ອງກັນ, ຄວບຄຸມ ແລະ ແກ້ໄຂ ພະຍາດອັກເສບປອດ. 
​​​​​​​​​​​​ໃນໂອກາດດຽວກັນ, ກອງປະຊຸມ ຍັງໄດ້ປຶກສາຫາລືກັນ ໃນການແຕ່ງຕັ້ງຄະນະຮັບຜິດຊອບວຽກງານໃນແຕ່ລະດ້ານ ເປັນຕົ້ນ ຄະນະຮັບຜິດຊອບ ວຽກງານໂຄສະນາປະຊາສຳພັນ, ກອງເລຂາ, ຄະນະວິຊາການ-ການແພດ, ຄະນະປະສານງານ ແລະ ອື່ນໆ. ນອກຈາກນັ້ນ ກອງປະຊຸມ ຍັງໄດ້ຮັບຟັງການລາຍງານ ກ່ຽວກັບການກະກຽມ ແລະ ຈັດຕັ້ງປະຕິບັດວຽກງານ ທີ່ຢູ່ໃນຄວາມຮັບຜິດຊອບຂອງຂະແໜງການຕົນ, ໃນນັ້ນ ຜູ້ລາຍງານ ຍັງຍົກເອົາບາງບັນຫາ ທີ່ຍັງບໍ່ທັນຈະແຈ້ງ ຂຶ້ນມາປຶກສາຫາລື ເພື່ອຄວາມເປັນເອກະພາບໃນການຈັດຕັ້ງປະຕິບັດວຽກງານ ເປັນຕົ້ນ ການຄຸ້ມຄອງຄົນເຂົ້າ-ອອກເມືອງ ຕາມດ່ານຕ່າງໆ, ການກະກຽມສະຖານທີ່ ເພື່ອຮອງຮັບຜູ້ສົງໃສ-ຜູ້ຕິດເຊື້ອ ແລະ ຜູ້ເຂົ້າປິ່ນປົວ (ຫາກມີກໍລະນີກວດພົບການຕິດເຊື້ອພະຍາດ), ການຊ່ວຍເຫຼືອນັກສຶກສາລາວ ທີ່ຍັງອາໄສຢູ່ໃນເຂດທີ່ມີການແຜ່ລະບາດ ຂອງເຊື້ອພະຍາດ ທີ່ສປ ຈີນ, ການຄຸ້ມຄອງລາຄາ ອຸປະກອນການແພດ, ການປ້ອງກັນ, ການປິ່ນປົວ...; ການໂຄສະນາໃຫ້ຂໍ້ມູນ ແລະ ຄວາມຮູ້ແກ່ສັງຄົມ ໃນການປ້ອງກັນ ເຊື້ອພະຍາດ; ການຕ້ານ ແລະ ສະກັດກັ້ນ ຫາງສຽງບໍ່ດີໃນສັງຄົມ; ການກວດກາ ເປົ້າໝາຍຜູ້ມີຄວາມສ່ຍງຕິດເຊື້ອ; ວຽກງານການພົວພັນຕ່າງປະເທດ, ການສະເໜີຂໍການຊ່ວຍເຫຼືອ ຈາກອົງການຈັດຕັ້ງທີ່ກ່ຽວຂ້ອງ ແລະ ອື່ນໆ.
​​​​​​​​​​​​​ກອງປະຊຸມຍັງໃຫ້ຮູ້ຕື່ມອີກວ່າ: ປະຈຸບັນ ຢູ່ ສປປ ລາວ ຍັງບໍ່ທັນພົບຜູ້ຕິດເຊື້ອພະຍາດພະຍາດ ອັກເສບປອດສາຍພັນໃໝ່ (ໂຄໂລນາ Corona) ເທື່ອ. ສຳລັບນັກສຶກສາລາວ ທີ່ຍັງອາໄສຢູ່ ສປ ຈີນ ແມ່ນມີທັງໝົດ 242 ຄົນ, ໃນນັ້ນ ນັກສຶກສາທີ່ຍັງອາໄ​ສຢູ່ແຂວງຫູເປີ່ຍ ມີຈຳນວນ 37 ຄົນ, ຊຶ່ງທຸກຄົນ ແມ່ນມີສຸຂະພາບແຂງແຮງດີ, ໄດ້ຮັບການຊ່ວຍເຫຼືອ ແລະ ເອົາໃຈໃສ່ ເປັນຢ່າງດີ ຈາກພາກສ່ວນກ່ຽວຂ້ອງ ຂອງ ສປ ຈີນ ແລະ ສປປ ລາວ.
ໃນຕອນທ້າຍ, ທ່ານນາຍົກລັດຖະມົນຕີ ໄດ້ມີຄຳເຫັນໂອ້ລົມ ແລະ ເນັ້ນໜັກຕໍ່ກອງປະຊຸມ ໂດຍຊີ້ນຳໃຫ້ພາກສ່ວນ ແລະ ຂະແຫນ​ງການທີ່ກ່ຽວຂ້ອງ ເອົາໃຈໃສ່ເຮັດວຽກໂຄສະນາເຜີຍແຜ່ (ອອກຂ່າວ) ໃຫ້ຄວາມຮູ້ ກ່ຽວກັບການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງເຊື້ອພະຍາດອັກເສບປອດສາຍພັນໃໝ່ນີ້ ໃຫ້ແກ່ສັງຄົມໄດ້ຮັບຊາບ ຢ່າງເປັນປົກກະຕິ, ກວ້າງຂວາງ ແລະ ທັນສະພາບການກວ່າເກົ່າ, ພ້ອມກັນນັ້ນ ໃນໄລຍະປະຈຸບັນ ແມ່ນໃຫ້ສຸມໃສ່ ໂຄສະນາແຜ່ແຜ່ວຽກງານດັ່ງກ່າວ ເປັນບຸລິມະສິດສຳຄັນກວ່າຂ່າວອື່ນໆ (ເລີ່ມຕົ້ນດ້ວຍຂ່າວວຽກງານນີ້), ໃນນັ້ນ ດ້ານເນື້ອໃນ ແມ່ນໃຫ້ສຸມໃສ່ໂຄສະນາເຜີຍແຜ່ວຽກງານ ການເຄື່ອນໄຫວຂອງ ສປປລາວ ພວກເຮົາເປັນສຳຄັນ, ທັງເປັນຂໍ້ມູນທີ່ຖືກຕ້ອງ ແລະ ແທດກັບຕົວຈິງ, ຊຶ່ງຜ່ານມາ ການເຄື່ອນໄຫວຂອງພາກສ່ວນຕ່າງໆ ຂອງສປປລາວ ໃນວຽກງານດັ່ງກ່າວນີ້ ແມ່ນຫຼວງຫຼາຍ ແລະ ເລີ່ມເຮັດມາແຕ່ຫົວທີ ເປັນຢ່າງດີ, ແຕ່ການເຜີຍແຜ່ ຍັງບໍ່ທັນສົມຄູ່. ຄຽງຄູ່ກັນນັ້ນ ກໍ່ໃຫ້ເອົາໃຈໃສ່ຕ້ານ ແລະ ສະກັດກັ້ນ ຫາງສຽງບໍ່ດີ, ຂໍ້ມູນທີ່ບໍ່ຖືກຕ້ອງ ແລະ ບິດເບືອນຄວາມຈິງ ໃນສື່ອອນລາຍ ໃຫ້ມີປະສິດທິພາບ ແລະ ປະສິດທິຜົນກວ່າເກົ່າ.​ ນອກຈາກນີ້ ທ່ານນາຍົກລັດຖະມົນຕີ ຍັງໄດ້ຊີ້ນຳ: ໃນກໍລະນີກວດພົບຜູ້ຕິດເຊື້ອ ຢູ່ນະຄອນຫຼວງວຽງຈັນ ແມ່ນໃຫ້ກຳນົດເອົາໂຮງໝໍມິດຕະພາບ ພາກຂະຫຍາຍ ແລະ ໂຮງໝໍ 103 ເປັນບ່ອນປິ່ນປົວ, ສ່ວນຢູ່ບັນດາແຂວງ ແມ່ນກຳນົດເອົາໂຮງໝໍປະຈຳແຂວງ. ອີກດ້ານໜຶ່ງ, ທ່ານໄດ້ຊີ້ນຳໃຫ້ກະຊວງສາທາລະນະສຸກ ຮີບຮ້ອນປະສານສົມທົບກັບຜູ້ປະກອບການ ເພື່ອດຳເນີນການຜະລິດຜ້າອັດປາກ ໃຫ້ມີຄຸນນະພາບ, ສາມາດຕອບສະໜອງຄວາມຕ້ອງການຂອງສັງຄົມ ຢ່າງພຽງພໍ ແລະ ທັນການ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ