ທ່ານນາຍົກ ຊີ້ນຳວຽກງານການພັດທະນາຊັບພະຍາກອນມະນຸດ

ຜູ້ຂຽນ: ອານິຄົມ ວົງເດືອນ

ວັນພະຫັດ, 30 ມ.ກ 2020 15:00

​​​​​​​​​​​ກອງປະຊຸມ ຄະນະກໍາມາທິການແຫ່ງຊາດ ເພື່ອການພັດທະນາຊັບພະຍາກອນມະນຸດ (ຄຊ ພຊ) ຄັ້ງທີ VIII ໄດ້ຈັດຂຶ້ນໃນວັນທີ  29  ມັງກອນ 2019 ທີ່ໂຮງແຮມດອນຈັນພາເລດ, ນະຄອນຫຼວງວຽງຈັນ  ໂດຍການເປັນປະທານຂອງທ່ານ ນາງ ແສງເດືອນ ຫຼ້າຈັນທະບູນ, ລັດຖະມົນຕີກະຊວງສຶກສາທິການ ແລະ ກິລາ, ປະທານ ຄຊພຊ​ ແລະ ໃຫ້ກຽດເຂົ້າຮ່ວມໂອ້ລົມ ແລະ ໃຫ້ຊີ້ນໍາກອງປະຊຸມ ຈາກທ່ານ ທອງລຸນ ສີສຸລິດ, ນາຍົກລັດຖະມົນຕີ; ມີບັນດາທ່ານລັດຖະມົນຕີ, ຮອງລັດຖະມົນຕີ ພ້ອມດ້ວຍ ແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນກອງປະຊຸມ ທ່ານ ນາງ ແສງເດືອນ ຫຼ້າຈັນທະບູນ ໄດ້ລາຍງານໃຫ້ຊາບ ກ່ຽວກັບການຈັດຕັ້ງຜັນຂະຫຍາຍ ຍຸດທະສາດການພັດທະນາຊັບພະຍາກອນມະນຸດແຫ່ງຊາດ ຮອດປີ 2025 ປະຈໍາປີ 2019  ຊຶ່ງຄະນະກໍາມາທິການໄດ້ທົບທວນຄືນ ການຈັດຕັ້ງປະຕິບັດມະຕິກອງປະຊຸມ ຄັ້ງທີ VII ຂອງ ຄຊພຊ ແລະ ສະຫຼຸບຕີລາຄາການຈັດຕັ້ງປະຕິບັດ ຍຸດທະສາດການພັດທະນາຊັບພະຍາກອນມະນຸດ ໃນປີ 2019  ພ້ອມທັງ ວາງທິດທາງແຜນການຈັດຕັ້ງປະຕິບັດ ໃນປີ 2020.  
​​​​​​​​​​​ໃນໂອກາດນີ້, ທ່ານນາຍົກລັດຖະມົນຕີ ໄດ້ເນັ້ນໃຫ້ ຄຊພຊ ເອົາໃຈໃສ່ ໃນການຈັດຕັ້ງປະຕິບັດຍຸດທະສາດ ການພັດທະນາຊັບພະຍາກອນມະນຸດ ຂັ້ນສູນກາງ  ແລະ  ຂັ້ນແຂວງ; ຮີບຮ້ອນປັບປຸງແກ້ໄຂ ແລະ ຕ້ອງໄດ້ເພີ່ມຄວາມເອົາໃຈໃສ່ຊີ້ນໍາ-ນໍາພາການຈັດຕັ້ງປະຕິບັດ ໃຫ້ເປັນຮູບປະທໍາ ເປັນຕົ້ນ ສືບຕໍ່ເອົາໃຈໃສ່ປະຕິຮູບການສຶກສາ ໃຫ້ເປັນລະບົບ ແລະ ຕໍ່ເນື່ອງ; ຍົກລະດັບຄວາມຮູ້ ຄວາມສາມາດໃຫ້ພະນັກງານຄູ-ອາຈານ; ການສ້າງຄົນ ຕ້ອງສາມາດຕອບສະໜອງໄດ້ ຕາມຄວາມຮຽກຮ້ອງຕ້ອງການ ຂອງຕໍາແໜ່ງງານ ທີ່ກຳນົດໄວ້, ການສ້າງຄົນ ຕ້ອງໃຫ້ຖືກຕາມເປົ້າໝາຍ ແລະ ສອດຄ່ອງກັບແຜນພັດທະນາເສດຖະກິດ-ສັງຄົມ. ພ້ອມດຽວກັນນັ້ນ, ໃຫ້ເອົາໃຈໃສ່ໃນການຫັນຄ່ານິຍົມ ໃນການສຶກສາຮໍ່າຮຽນຂອງຄົນໃນສັງຄົມໃຫ້ດີ ໂດຍສະເພາະ ການຫັນຄ່ານິຍົມ ໃນການຮຽນສາຍອະຊີວະສຶກສາ ແລະ ສາຍວິຊາຊີບໃຫ້ຫຼາຍຂຶ້ນ ເພື່ອຕອບສະໜອງ ກັບ ຕະຫຼາດແຮງງານ, ການພັດທະນາຊັບພະຍາກອນມະນຸດ ຕ້ອງເລີ່ມຈາກຊັ້ນອານຸບານຂຶ້ນມາ ເພື່ອສ້າງຄົນໃຫ້ມີຄວາມຮູ້ຄວາມສາມາດ, ມີຈັນຍາບັນຈັນຍາທໍາ, ເປັນເຈົ້າ, ເປັນຄົນທີ່ມີລະບຽບວິໃນ ແລະ ເປັນຄົນທີ່ມີຄວາມຮັບຜິດຊອບ, ເຊິ່ງການພັດທະນາດັ່ງກ່າວ ຕ້ອງເລີ່ມຈາກຄອບຄົວ ແລະ ສັງຄົມ; ປະຈຸບັນ ພວກເຮົາ ຍັງມີຂໍ້ຈໍາກັດໃນການຮຽນຮູ້ບົດຮຽນໃໝ່ຂອງໂລກ, ສະນັ້ນ, ພວກເຮົາຕ້ອງນໍາໃຫ້ທັນ ຕ້ອງຮູ້ໝູນໃຊ້ບົດຮຽນ ຈາກພາຍນອກ ມາໝູນໃຊ້ໃຫ້ຖືກຕ້ອງກັບສະພາບຕົວຈິງ ຢູ່ປະເທດເຮົາ, ສັງຄົມລາວ ຕ້ອງເປັນສັງຄົມ ແຫ່ງການແບ່ງປັນ, ຕ້ອງເປັນສັງຄົມ ທີ່ຊ່ວຍເຫຼືອເຊິ່ງກັນ ແລະ ກັນ. ສໍາຄັນ ພວກເຮົ າຕ້ອງສ້າງຄົນລຸ້ນໃໝ່ ໃຫ້ມີສະຕິຕໍ່ຕົນເອງ, ຕໍ່ສັງຄົມ, ປະເທດຊາດ ແລະ ສ້າງຄົນລາວ ໃຫ້ມີກຽດສັກສີ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ