ທ່ານາຍົກລັດຖະມົນຕີ ພົບປະໂອ້ລົມພະນັກງານ ສະຖາບັນຄົ້ນຄວ້າເສດຖະກິດແຫ່ງຊາດ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນອັງຄານ, 21 ມ.ກ 2020 18:00

​​​​​​​​​ໃນຕອນບ່າຍ ຂອງວັນທີ 21 ມັງກອນ 2020 ທ່ານ ທອງລຸນ ສີສຸລິດ, ນາຍົກລັດຖະມົນຕີ ໄດ້ພົບປະໂອ້ລົມພະນັກງານ  ຂອງສະຖາບັນຄົ້ນຄວ້າເສດຖະກິດແຫ່ງຊາດ ຢູ່ທີ່ສະຖາບັນດັ່ງກ່າວ, ໂດຍມີການນຳ ແລະ ພະນັກງານ ພາຍໃນສະຖາບັນຄົ້ນຄວ້າເສດຖະກິດແຫ່ງຊາດ ໃຫ້ການຕ້ອນຮັບຢ່າງອົບອຸ່ນ. 

​​​​​​​​​ໃນໂອກາດນີ້, ທ່ານນາຍົກລັດຖະມົນຕີ ໄດ້ຮັບຟັງການລາຍງານໂດຍຫຍໍ້ ຈາກທ່ານ ລີເບີ ລີບົວປາວ, ຮັກສາການຫົວໜ້າສະຖາບັນຄົ້ນຄວ້າເສດຖະກິດແຫ່ງຊາດ ກ່ຽວກັບການຈັດຕັ້ງປະຕິບັດວຽກງານ ຂອງສະຖາບັນຄົ້ນຄວ້າເສດຖະກິດແຫ່ງຂາດ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ, ຊຶ່ງເຫັນວ່າ: ດ້ານການຈັດຕັ້ງ: ສະຖາບັນຄົ້ນຄວ້າເສດຖະກິດແຫ່ງຊາດ ປະກອບມີ 4 ສູນຄົ້ນວ້າ ແລະ 1 ຫ້ອງການ, ມີພະນັກງານທັງໝົດ 102 ທ່ານ. ໃນນັ້ນ, ມີນັກຄົ້ນຄວ້າລະດັບປະລິນຍາເອກ 9 ທ່ານ, ຍິງ 2 ທ່ານ, ປະລິນຍາໂທ 38 ທ່ານ, ຍິງ 13 ທ່ານ, ປະລິນຍາຕີ 50 ທ່ານ, ຍິງ 22 ທ່ານ; ດ້ານວຽກງານວິຊາສະເພາະ: ສາມາດເຮັດສຳເລັດໜ້າທີ່ການເມືອງໃນການຄົ້ນຄວ້າ, ທີ່ພົ້ນເດັ່ນ ເປັນຕົ້ນ ໄດ້ມີບົດລາຍງານ ຕີລາຄາສະພາບພົ້ນເດັ່ນເສດຖະກິດມະຫາພາກ ແລະ ບາງສິ່ງທ້າທາຍເພື່ອແກ້ໄຂໃນຕໍ່ໜ້າ ເປັນແຕ່ລະໄລຍະ; ໄດ້ຮ່ວມກັບຂະແໜງການກ່ຽວຂ້ອງ ສຳເລັດການສ້າງຍຸດທະສາດການເຕີບໂຕສີຂຽວຂອງ ສປປ ລາວ; ສຳເລັດການຄົ້ນຄວ້າກ່ຽວກັບສະພາບ ແລະ ໂຄງສ້າງລາຄາສິນຄ້າທີ່ຈຳເປັນ; ໄດ້ຮ່ວມກັບອົງການໄຈກ້າຂອງປະເທດຍີ່ປຸ່ນ ສຳເລັດຄົ້ນຄວ້າດ້ານນະໂຍບາຍ ກ່ຽວກັບການສ້າງສະຖຽນລະພາບດ້ານການເງິນ ຢູ່ ສປປ ລາວ; ໄດ້ສຳເລັດການຄົ້ນຄວ້າກ່ຽວກັບການປັບປຸງລັດວິສາຫະກິດ ແລະ ສະຫະກອນໃນຮູບແບບໃໝ່; ການພັດທະນາເຂດເສດຖະກິດພິເສດຢູ່ ສປປ ລາວ ແລະ ຫົວຂໍ້ຍ່ອຍອື່ນໆ. ສຳລັບທິດທາງແຜນການໃນຕໍ່ໜ້າ, ສະຖາບັນຄົ້ນຄວ້າເສດຖະກິດແຫ່ງຊາດ ຈະສຸມໃສ່ສືບຕໍ່ຄົ້ນຄວ້າບັນດາຫົວຂໍ້ສຳຄັນທີ່ລັດຖະບານມອບໝາຍໃຫ້ ເປັນຕົ້ນ ສືບຕໍ່ຄົ້ນຄວ້າຫົວຂໍ້ປະເມີນການແກ້ໄຂຄວາມທຸກຍາກໄລຍະຜ່ານມາ ແລະ ທິດທາງການແກ້ໄຂໃນຕໍ່ໜ້າຕາມທິດຍືນຍົງ; ການພັດທະນາຂະແໜງພະລັງງານ ແລະ ບໍ່ແຮ່ ຕາມທິດຍືນຍົງ; ການຢຸດຕິການຖາງປ່າເຮັດໄຮ່; ຕັດໄມ້ທຳລາຍປ່າ ແລະ ການສົ່ງອອກໄມ້ທ່ອນ; ການສ້າງແຜນແມ່ບົດຄຸ້ມຄອງການທ່ອງທ່ຽວເມືອງວັງວຽງ ຕາມທິດຍືນຍົງ ແລະ ວຽກອື່ນໆ ຕາມຄວາມຈຳເປັນຂອງການພັດທະນາເສດຖະກິດ-ສັງຄົມ ແລະ ຄວາມຮຽກຮ້ອງຕ້ອງການຂອງລັດຖະບານ ໃນໄລຍະຕໍ່ໜ້າ.
​​​​​​​​​ໃນໂອກາດດຽວກັນ, ທ່ານນາຍົກລັດຖະມົນຕີ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຄວາມບຸກໜ້າບືນຕົວ, ຄວາມພະຍາຍາມ ຂອງຄະນະພັກ, ຄະນະນຳ ແລະ ພະນັກງານທົ່ວສະຖາບັນຄົ້ນຄວ້າເສດຖະກິດແຫ່ງຊາດ ທີ່ໄດ້ເປັນເຈົ້າການ, ມີຄວາມສາມັກຄີ ເປັນຈິດໜຶ່ງໃຈດຽວກັນ ໃນການປະຕິບັດໜ້າທີ່ວຽກງານທີ່ໄດ້ຮັບມອບໝາຍ ແລະ ໃຫ້ສະຖາບັນຈົ່ງສືບຕໍ່ຮັກສາ ແລະ  ສີມຂະຫຍາຍມູນເຊື່ອອັດີງາມດັ່ງກ່າວນີ້, ນອກຈາກນີ້ ທ່ານນາຍົກລັດຖະມົນຕີ ຍັງໄດ້ເນັ້ນໜັກໃຫ້ເຫັນເຖິງບົດບາດສຳຄັນຂອງວຽກການຄົ້ນຄວ້າ ຕໍ່ກັບການພັດທະນາເສດຖະກິດ-ສັງຄົມແຫ່ງຊາດ ເພາະຜົນການຄົ້ນຄວ້າແຕ່ລະໄລຍະ ຖືເປັນເອກະສານສຳຄັນນຳໃຊ້ເຂົ້າໃນການວາງແຜນ ກໍ່ຄືການພັດທະນາເສດຖະກິ-ສັງຄົມຂອງຊາດ ໃຫ້ມີລັກສະນະວິທະຍາສາດ, ມີປະສິດທິພາບ, ປະສິດທິຜົນສູງ ແນໃສ່ເຮັດໃຫ້ເສດຖະກິດເຕີບໂຕມີຄຸນນະພາບ ແລະ ຍືນຍົງ ຕາມແນວທາງ ແລະ ນະໂຍບາຍຂອງພັກ ແລະ ລັດຖະບານ ໄດ້ກຳນົດໄວ້.

​​​​​​​​​​ອັນສຳຄັນ, ເພື່ອເປັນການຮັບປະກັນໃຫ້ແກ່ການປະຕິບັດໜ້າທີ່ການເມືອງ ຂອງສະຖາບັນຄົ້ນຄວ້າເສດຖະກິດແຫ່ງຊາດ ໃຫ້ກາຍເປັນເສນາທິການວຽກຄົ້ນຄວ້າບັນຫາທາງດ້ານເສດຖະກິດ ທີ່ມີຄຸນະພາບ ແລະ ປະສິດທິຜົນສູງສຸດ, ທ່ານນາຍົກລັດຖະມົນຕີ ໄດ້ເນັ້ນໜັກໃຫ້ສະຖາບັນ ເອົາໃຈໃສ່ຕໍ່ບາງບັນຫາຕື່ມອີກ ເປັນຕົ້ນ ໃຫ້ພະນັກງານທຸກຄົນ ມີຄວາມອຸ່ນອຸ່ຽນທຸ່ນທ່ຽງ, ຕັ້ງໜ້າປະຕິບັດໜ້າທີ່ການເມືອງຂອງຕົນ ໃຫ້ມີຜົນສຳເລັດ ຕາມທີ່ພັກ-ລັດ ມອບໝາຍໃຫ້; ໃຫ້ເປັນເຈົ້າການ ໃນການຄົ້ນຄວ້າ ຫົວຂໍ້ຕ່າງໆ ທີ່ຈະເປັນປະໂຫຍດ ໃຫ້ແກ່ການພັດທະນາເສດຖະກິດແຫ່ງຊາດ, ໂດຍມີການຈັດລຽງບູລິມະສິດ ຂອງຫົວຂໍ້ຢ່າງຄັກແນ່ ແລະ ຄົ້ນຄວ້າຢ່າງມີຈຸດສຸມແທ້ໆ; ຕ້ອງເປັນເຈົ້າການພັດທະນາຕົນເອງ ໃນການຍົກລະດັບທາງດ້ານຄວາມຮູ້ຄວາມສາມາດ ໃຫ້ກາຍເປັນນັກວິທະຍາສາດ ໃຫ້ຫຼາຍຂຶ້ນ ທາງດ້ານຈຳນວນ ແລະ ຄຸນນະພາບ; ນອກຈາກນັ້ນ, ທ່ານນາຍົກລັດຖະມົນຕີ ຍັງໄດ້ຍົກເອົາບັນຫາ ແລະ ຫົວຂໍ້ຈຳນວນໜຶ່ງ ເພື່ອໃຫ້ພະນັກງານ ກໍ່ຄືສະຖາບັນຄົ້ນຄວ້າເສດຖະກິດແຫ່ງຊາດ ໄດ້ນຳໄປພິຈາລະນາ, ຫາກເຫັນບັນຫາໃດ ຈະເປັນປະໂຫຍດແກ່ປະເທດຊາດ ແລະ ປະຊາຊົນ ກໍ່ກຳນົດເຂົ້າໃນແຜນການຄົ້ນຄວ້າໃນຕໍ່ໜ້າ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ