ທ່ານນາຍົກລັດຖະມົນຕີ ໂອ້ລົມຕໍ່ກອງປະຊຸມສະມາຄົມນັກທຸລະກິດໜຸ່ມ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນສຸກ, 13 ທ.ວ 2019 16:00

​​​ໃນຕອນບ່າຍ ຂອງວັນທີ 11 ທັນວາ 2019 ທີ່ໂຮງແຮມດອນຈັນພາເລດ, ທ່ານ ທອງລຸນ ສີສຸລິດ, ນາຍົກລັດຖະມົັນຕີ ໄດ້ໃຫ້ກຽດພົບປະໂອ້ລົມ ຕໍ່ກອງປະຊຸມນັກທຸລະກິດໜຸ່ມ ທົ່ວປະເທດ, ໂດຍມີທ່ານ ອາລຸນໄຊ ສູນນະ ລາດ, ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນປະຕິວັດລາວ; ລັດຖະມົນຕີ-ຮອງລັດຖະມົນຕີ ກະຊວງ-ອົງການທີ່ກ່ຽວຂ້ອງ; ຄະນະບໍລິຫານງານ ສະມາຄົມນັກທຸລະກິດໜຸ່ມແຫ່ງຊາດລາວ, ພ້ອມດ້ວຍ ນັກທຸລະກິດໜຸ່ມ, ຊາວໜຸ່ມນັກສຶກສາ ຈາກຄະນະເສດຖະສາດ ແລະ ບໍລິຫານທຸລະກິດ, ມະຫາວິທະຍາໄລແຫ່ງຊາດ ເຂົ້າຮ່ວມ.

​​ໃນໂອກາດດັ່ງກ່າວ, ທ່ານນາຍົກລັດຖະມົນຕີ ແລະ ຜູ້ເຂົ້າຮ່ວມ ໄດ້ຮັບຟັງການລາຍງານຫຍໍ້ ກ່ຽວກັບສະພາບການຈັດຕັ້ງປະຕິບັດວຽກງານ ຂອງສະມາຄົມນັກທຸລະກິດໜຸ່ມແຫ່ງຊາດລາວ ໃນໄລຍະຜ່ານມາ ຈາກທ່ານ ຄໍາແສນ ສີສະວົງ, ປະທານສະມາຄົມນັກທຸລະກິດໜຸ່ມແຫ່ງຊາດ, ຊຶ່ງເຫັນໄດ້ຜົນສຳເລັດອັນພົ້ນເດັ່ນ ແລະ ການເຕີບໃຫຍ່ຂະຫຍາຍຕົວ ໃນຂະບວນການພັດທະນາທຸລະກິດ ຂອງນັກທຸລະກິດໜຸ່ມ, ລວມທັງ ການປະກອບພັນທະ, ການປະກອບສ່ວນ ທາງດ້ານເຫື່ອແຮງ, ສະຕິປັນຍາ ແລະ ທ່າແຮງດ້ານຕ່າງໆ ຂອງພາກທຸລະກິດ ເຂົ້າໃນພາລະກິດລວມຂອງຊາດ ໂດຍສະເພາະ ການປົກປັກຮັກສາ ແລະ ພັດທະນາປະເທດຊາດ. ຫຼັງຈາກນັ້ນ, ທ່ານ ອາລຸນໄຊ ສູນນະລາດ ກໍ່ໄດ້ລາຍງານ ແລະ ຢັ້ງຢືນຄືນ ຜົນງານການປະກອບສ່ວນ ຂອງຊາວໜຸ່ມລາວ ໂດຍສະເພາະ ການພັດທະນາຕົນເອງ ທາງດ້ານຄວາມຮູ້ຄວາມສາມາດ, ການຊ່ວຍເຫຼືອສັງຄົມ ໃນຂະບວນການ ແລະ ເຫດການສຳຄັນຕ່າງໆ ຢູ່ໃນຂອບເຂດທົ່ວປະເທດ ກໍ່ຄືການປະຕິບັດພາລະບົດບາດ, ສິດ ແລະ ໜ້າທີ່ ຂອງຊາວໜຸ່ມປະຊາຊົນປະຕິວັດລາວ ໃນຖານະທີ່ເປັນແຂນຂວາຂອງພັກ ເພື່ອພ້ອມກັນປົກປັກຮັກສາ ແລະ ພັດທະນາປະເທດຊາດຂອງພວກເຮົາ ໃຫ້ນັບມື້ຈະເລີນກ້າວໜ້າ ຢ່າງບໍ່ຢຸດຢັ້ງ.
​​​ໃນໂອກາດທີ່ມີຄວາມສຳຄັນນີ້, ທ່ານນາຍົກລັດຖະມົນຕີ ໄດ້ໃຫ້ກຽດໂອ້ລົມ ແລະ ໃຫ້ໂອກາດ ແກ່ຜູ້ເຂົ້າຮ່ວມ ແລກປ່ຽນຄວາມຄິດເຫັນ ຕໍ່ວຽກງານການພັດທະນາຊາວໜຸ່ມ ຕິດພັນກັບການພັດທະນາ ແລະ ດຳເນີນທຸລະກິດ, ຊຶ່ງຄຳເຫັນໂອ້ລົມ ຂອງທ່ານນາຍົກລັດຖະມົນຕີ ແມ່ນໄດ້ຕີລາຄາສູງ ແລະ ຊົມເຊີຍ ຕໍ່ຜົນງານການປະກອບສ່ວນ ຂອງສະມາຄົມນັກທຸລະກິດໜຸ່ມແຫ່ງຊາດ ກໍ່ຄືຊາວໜຸ່ມລາວ ໃນທົ່ວປະເທດ ໃນໄລຍະທີ່ຜ່ານມາ. ພ້ອມກັນນັ້ນ ກໍ່ຍົກໃຫ້ເຫັນມູນເຊື້ອອັນດີງາມ ຂອງຊາວໜຸ່ມລາວຮຸ່ນກ່ອນ, ລວມທັງ ນະໂຍບາຍ ຂອງພັກ-ລັດຖະບານ ຕໍ່ຊາວໜຸ່ມ, ຕໍ່ການຊຸກຍູ້ສົ່ງເສີມການລົງທຶນ, ການພັດທະນາວິສາຫະກິດ ແລະ ອື່ນໆ. ໃນໂອກາດດຽວກັນ, ທ່ານນາຍົກລັດຖະມົນຕີ ກໍ່ໄດ້ເນັ້ນໜັກ ໃຫ້ພາກສ່ວນທີ່ກ່ຽວຂ້ອງ ເອົາໃຈໃສ່ຕື່ມບາງບັນຫາ ເປັນຕົ້ນ ສູນກາງຊາວໜຸ່ມຕ້ອງໄດ້ສືບຕໍ່ຊີ້ນໍາ-ນໍາພາຊ່ວຍເຫຼືອຢ່າງໃກ້ຊິດ, ສືບຕໍ່ເຜີຍແຜ່ພາລະບົດບາດຂອງ ສະມາຄົມນັກທຸລະກິດໜຸ່ມ, ຍົກໃຫ້ສັງຄົມເຫັນຜົນງານຄວາມສໍາຄັນຂອງຜູ້ປະກອບການຕໍ່ການພັດທະນາ; ສະມາຄົມນັກທຸລະກິດໜຸ່ມແຕ່ລະຂັ້ນ ຕ້ອງໄດ້ສຸມໃສ່ການພັດທະນາອົງກອນໃຫ້ມີຄວາມເຂັ້ມແຂງຮອບດ້ານ ໃຫ້ສົມກັບຄຳວ່າ ເປັນນັກທຸລະກິດປະຕິວັດ ປະກອບສ່ວນຢ່າງຕັ້ງໜ້າໃນການພັດທະນາປະເທດຊາດ; ສືບຕໍ່ສົ່ງເສີມຫົວຄິດປະດິດສ້າງຂອງຊາວໜຸ່ມ ໃຫ້ເກີດມີຜະລິດຕະພັນໃໝ່ໆ, ການບໍລິການໃໝ່ໆ ສາມາດສົ່ງອອກ ແລະ ແຂ່ງຂັນໄດ້ໄດ້; ສືບຕໍ່ເອົາໃຈໃສ່ໃນການເຕົ້າໂຮມຄວາມສາມັກຄີ ຂອງຜູ້ປະກອບການ ໃນຂອບເຂດທົ່ວປະເທດ ໃຫ້ກາຍເປັນຄູ່ຮ່ວມມື, ສ້າງຄວາມເຂັ້ມແຂງ ໃນການແຂ່ງຂັນໃນທຸກລະດັບ ໄດ້ເປັນກ້າວໆ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ