ທ່ານນາຍົກລັດຖະມົນຕີ ຕ້ອນຮັບທ່ານຮອງນາຍົກລັດຖະມົນຕີ ແຫ່ງ ສສ ຫວຽດນາມ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນພຸດ, 11 ທ.ວ 2019 19:00

​ໃນຕອນເຊົ້າ ຂອງວັນທີ 11 ທັນວາ 2019 ທີ່ ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ ໄດ້ຕ້ອນຮັບ ການເຂົ້າຢ້ຽມຂອງທ່ານ ເຈືອງ ຮ່ວາ ບີ່ງ, ຮອງນາຍົກລັດຖະມົນຕີ ຜູ້ປະຈຳການລັດຖະບານ ແຫ່ງ ສສ ຫວຽດນາມ ພ້ອມດ້ວຍຄະນະ ໃນໂອກາດທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ລະຫວ່າງວັນທີ 10-12 ທັນວາ 2019 ເພື່ອເສີມຂະຫຍາຍສາຍພົວພັນມິດຕະພາບອັນດີງາມ ລະຫວ່າງ ສປປ ລາວ ແລະ ສສ ຫວຽດນາມ.

ໃນໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ການເດີນທາງມາຢ້ຽມຢາມ ແລະ ເຄື່ອນໄຫວເຮັດວຽກ ຢູ່ ສປປ ລາວ ໃນຄັ້ງນີ້, ຊຶ່ງເປັນການປະກອບສ່ວນອັນສຳຄັນ ເຂົ້າໃນການເພີ່ມພູນຄູນສ້າງ ສາຍພົວພັນ ແລະ ການຮ່ວມມື ອັນດີງາມ ທີ່ມີມາແຕ່ດົນນານແລ້ວນັ້ນ ໃຫ້ນັບມື້ຈະເລີນງອກງາມ ແລະ ແຕກດອກອອກຜົນ ເປັນກ້າວໆ ເວົ້າລວມ, ເວົ້າສະເພາະ ກໍ່ແມ່ນການກະກຽມດ້ານຕ່າງໆ ໃຫ້ແກ່ການຈັດກອງປະຊຸມພົບປະ ຂອງສອງກົມການເມືອງ ແລະ ກອງປະຊຸມ ຄະນະກຳມະການຮ່ວມມືທະວີພາຄີ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ທີ່ຈະຈັດຂຶ້ນຢູ່ ສສ ຫວຽດນາມ ໃນຕົ້ນປີ 2020 ພ້ອມກັນນັ້ນ ກໍ່ສະແດງຄວາມຊົມເຊີຍ ຕໍ່ການພົບປະສອງຝ່າຍ ລະຫວ່າງ ທ່ານ ບຸນທອງ ຈິດມະນີ, ຮອງນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ເຈືອງ ຮ່ວາ ບີ່ງ, ຮອງນາຍົກລັດຖະມົນຕີ ຜູ້ປະຈຳການລັດຖະບານ ແຫ່ງ ສສ ຫວຽດນາມ ໃນຕອນແລງ ຂອງວັນທີ 10 ທັນວາ 2019 ຊຶ່ງເຫັນວ່າ ມີຜົນສຳເລັດເປັນຢ່າງດີ ໂດຍສະເພາະ ແມ່ນການຕີລາຄາຜົນການຮ່ວມມືສອງຝ່າຍໃນໄລຍະຜ່ານມາ ແລະ ແຜນການຮ່ວມມືກັນໃນຕໍ່ໜ້າ ໃນຂົງເຂດວຽກງານດ້ານຕ່າງໆ ເປັນຕົ້ນ ທາງດ້ານການເມືອງ, ວຽກງານປ້ອງກັນຊາດ-ປ້ອງກັນຄວາມສະຫງົບ, ການພົວພັນພາກພື້ນ ແລະ ສາກົນ, ການແລກປ່ຽນບົດຮຽນ ແລະ ຂໍ້ມູນຂ່າວສານ, ການແລກປ່ຽນການຢ້ຽມຢາມ ຂອງຄະນະຜູ້ແທນຂັ້ນສູງ, ຂົງເຂດວຽກງານຍຸຕິທຳ, ການຊອກຄົ້ນອັດຖິ ຂອງທະຫານອາສາສະໝັກຫວຽດນາມ ທີ່ເສຍຊີວິດຢູ່ ສປປ ລາວ ໃນເມື່ອກ່ອນ, ການຊຸກຍູ້ບັນດາໂຄງການບຸລິມະສິດ ທີ່ຮັບໃຊ້ວຽກງານຍຸດທະສາດ ແລະ ອື່ນໆ. ໃນໂອກາດນີ້, ທ່ານຍັງໄດ້ສະແດງຄວາມຂອບໃຈ ຕໍ່ການນຳ ພັກ-ລັດ ຫວຽດນາມ ທີ່ໄດ້ໃຫ້ການຊ່ວຍເຫຼືອ ແກ່ ສປປ ລາວ ໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ, ການປະຕິບັດໂຄງການຍຸດທະສາດ ແລະ ອື່ນໆ. ນອກຈາກນັ້ນ, ທ່ານຍັງໄດ້ສະແດງຄວາມຊົມເຊີຍ ຕໍ່ຜົນສຳເລັດ ຂອງ ສສ ຫວຽດນາມ ໃນການເຂົ້າຮ່ວມແຂ່ງຂັນກິລາຊີເກມ ຄັ້ງທີ 30 ທີ່ປະເທດຟີລິບປິ່ນ ເປັນເຈົ້າພາບ, ຊຶ່ງອັນພົ້ນເດັ່ນ ແມ່ນກິລາບານເຕະ ທັງທິມຊາຍ ແລະ ຍິງ ສາມາດຍາດໄດ້ຫຼຽນຄຳ, ພ້ອມກັນນັ້ນ ຫວຽດນາມ ກໍ່ຈັດຢູ່ໃນອັນດັບທີ 2 ຂອງຕາຕະລາງ ສະຫຼຸບຫຼຽນລາງວັນ ໃນການແຂ່ງຂັນກິລາຊີເກມຄັ້ງນີ້.

​ໃນໂອກາດດຽວກັນ, ທ່ານ ເຈືອງ ຮ່ວາ ບີ່ງ ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ແລະ ສະໜິດສະໜົມ ຂອງທ່ານນາຍົກລັດຖະມົນຕີ ແລະ ພາກສ່ວນທີ່ກ່ຽວຂ້ອງ ຂອງ ສປປ ລາວ ໃນຄັ້ງນີ້, ພ້ອມທັງ ລາຍງານໃຫ້ທ່ານນາຍົກລັດຖະມົນຕີ ໄດ້ຮັບຊາບ ເປັນຕົ້ນ ຜົນສຳເລັດ ຂອງການພົບປະສອງຝ່າຍ ກັບທ່ານ ບຸນທອງ ຈິດມະນີ, ຮອງນາຍົກລັດຖະມົນຕີ ແຫ່ງ ສປປ ລາວ, ຜົນສຳເລັດ ຂອງການພັດທະນາເສດຖະກິດ-ສັງຄົມ ທີ່ພົ້ນເດັ່ນ, ລວມທັງ ຄວາມຫຍຸ້ງຍາກ ແລະ ຂໍ້ຈຳກັດ ໃນການພັດທະນາເສດຖະກິດ-ສັງຄົມ ແຫ່ງ ສສ ຫວຽດນາມ ໃນປີ 2019, ນອກຈາກນັ້ນ ກໍ່ຈະສືບຕໍ່ ສະໜັບສະໜູນ ແຜນການ ແລະ ໂຄງການ ໃນການຮ່ວມມືສອງຝ່າຍ ຫວຽດນາມ-ລາວ ໃຫ້ນັບມື້ກວ້າງຂວາງ, ເລີກເຊິ່ງ ແລະ ມີປະສິດທິຜົນສູງ ເພື່ອປະກອບສ່ວນ ເຂົ້າໃນການເພີ່ມທະວີການພົວພັນຮ່ວມມືຮອບດ້ານ ຂອງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ມີການເຕີບໃຫຍ່ຂະຫຍາຍຕົວ ຢ່າງບໍ່ຢຸດຢັ້ງ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ