ຮອງນາຍົກລັດຖະມົນຕີ ລາວ ແລະ ຫວຽດນາມ ພົບປະສອງຝ່າຍ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພຸດ, 11 ທ.ວ 2019 11:00

​​​​​​​​ໃນຕອນບ່າຍຂອງວັນທີ 10 ທັນວາ 2019, ທີ່ ສຳນັກງານນາຍົກລັດຖະມົນຕີ, ທ່ານ ບຸນທອງ ຈິດມະນີ, ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບ ແລະ ພົບປະກັບ ສະຫາຍ ເຈືອງ ຮ່ວາ ບີ່ງ, ຮອງນາຍົກລັດຖະມົນຕີ ຜູ້ປະຈຳການລັດຖະບານ ແຫ່ງ ສສ ຫວຽດນາມ ພ້ອມດ້ວຍຄະນະ ເນື່ອງໃນໂອກາດທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 10-12 ທັນວາ 2019, ເພື່ອເສີມຂະຫຍາຍສາຍພົວພັນມິດຕະພາບອັນດີງາມ ລະຫວ່າງ ສປປ ລາວ ແລະ ສສ ຫວຽດນາມ. 

​​​​​​​​ໃນການພົບປະຄັ້ງນີ້,  ທ່ານຮອງນາຍົກລັດຖະມົນຕີ ບຸນທອງ ຈິດມະນີ  ໄດ້ສະແດງຄວາມຍິນດີຕ້ອນຮັບ ແລະ ຂອບໃຈດ້ວຍຄວາມອົບອຸ່ນ ທີ່ໄດ້ນໍາເອົາໄມຕີຈິດມິດຕະພາບ ຄວາມສາມັກຄີຮັກແພງອັນສະໜິດສະໜົມຂອງ ພັກ-ລັດ ແລະ ປະຊາຊົນຫວຽດນາມອ້າຍນ້ອງ ມາຍັງ ພັກ-ລັດ ແລະ ປະຊາຊົນລາວ, ເຊິ່ງການມາຢ້ຽມຢາມລາວໃນຄັ້ງນີ້ ຈະເປັນການປະກອບສ່ວນອັນສຳຄັນເຂົ້າໃນການເພີ່ມທະວີ ແລະ ເສີມຂະຫຍາຍມູນເຊື້ອອັນດີງາມແຫ່ງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ອ້າຍນ້ອງ ທີ່ມີມາແຕ່ດົນນານ ໃຫ້ມີຄວາມແໜ້ນແຟ້ນ ແລະ ມີປະສິດທິຜົນສູງຂຶ້ນກວ່າເກົ່າ, ສອງຝ່າຍໄດ້ພ້ອມກັນທົບທວນຄືນການຮ່ວມມືສອງຝ່າຍໃນໄລຍະຜ່ານມາ ແລະ ປຶກສາຫາລືການປະຕິບັດທິດທາງແຜນການການຮ່ວມມືໃນຕໍ່ໜ້າ ເປັນຕົ້ນ ການຮ່ວມມືດ້ານປ້ອງກັນຊາດ-ປ້ອງກັນຄວາມສະຫງົບ, ດ້ານຍຸຕິທຳ, ດ້ານການຄ້າ, ການລົງທຶນ, ວຽກງານກວດກາ ແລະ ຕ້ານການສໍ້ລາດບັງຫຼວງ, ພ້ອມທັງ ປຶກສາຫາລືກັນດ້ານການເມືອງການຕ່າງປະເທດ ເຊິ່ງສືບຕໍ່ໄດ້ຮັບການເພີ່ມທະວີຢ່າງຕໍ່ເນື່ອງ, ມີຄວາມໄວ້ເນື້ອເຊື່ອໃຈ ແລະ ສະໜັບສະໜູນເຊິ່ງກັນ ແລະ ກັນ. ພ້ອມນັ້ນ, ສອງຝ່າຍຍັງໄດ້ແຈ້ງສະພາບການທີ່ພົ້ນເດັ່ນ ໃນການພັດທະນາເສດຖະກິດ-ສັງຄົມ ຂອງແຕ່ລະປະເທດໃຫ້ກັນຊາບ ແລະ ແລກປ່ຽນທັດສະນະຕໍ່ບັນຫາພາກພື້ນ ແລະ ສາກົນ ຕື່ມອີກ. ນອກຈາກນີ້, ສອງຝ່າຍຍັງໄດ້ເອົາໃຈໃສ່ຊຸກຍູ້ການພົວພັນຮ່ວມມືດ້ານເສດຖະກິດ ລະຫວ່າງ ສອງປະເທດໃຫ້ນັບມື້ນັບເພີ່ມຂຶ້ນ ທັງປະລິມານ ແລະ ຄຸນນະພາບ ໂດຍຝ່າຍລາວໄດ້ສະເໜີໃຫ້ມີການຊຸກຍູ້ນັກລົງທຶນຈາກຫວຽດນາມ ເຂົ້າມາລົງທຶນຢູ່ລາວໃຫ້ຫຼາຍຂຶ້ນ ເປັນຕົ້ນ ໃນຂະແໜງການກະສິກຳທັນສະໄໝ, ການບິນ, ສາທາລະນະສຸກ, ການປຸງແຕ່ງໄມ້, ການຜະລິດເປັນສິນຄ້າສົ່ງອອກ ແລະ ອື່ນໆ. ຫວຽດນາມ ເປັນຄູ່ຄ້າທີ່ສຳຄັນຂອງ ສປປ ລາວ ຮ່ວມກັນ ເຊິ່ງມູນຄ່າການຄ້າ ລາວ-ຫວຽດນາມໃນ 10 ເດືອນຕົ້ນປີ 2019 ສາມາດບັນລຸໄດ້ 936 ລ້ານໂດລາ, ເພີ່ມຂຶ້ນ 12,7% ທຽບໃສ່ໄລຍະດຽວກັນຂອງປີ 2018.
​​​​​​​​ໃນຕອນທ້າຍ, ທ່ານຮອງນາຍົກລັດຖະມົນຕີ ບຸນທອງ ຈິດມະນີ ກໍ່ໄດ້ຕີລາຄາສູງຕໍ່ຜົນສໍາເລັດຂອງການພົບປະໃນຄັ້ງນີ້, ເຊິ່ງໄດ້ສ້າງພື້ນຖານອັນໜັກແໜ້ນ ທັງເປັນການຊີ້ນໍາ ແລະ ຊຸກຍູ້ໃຫ້ບັນດາພາກສ່ວນກ່ຽວຂ້ອງຂອງທັງສອງຝ່າຍ ນໍາໄປຈັດຕັ້ງຜັນຂະຫຍາຍໃຫ້ເກີດດອກອອກຜົນຍິ່ງໆຂຶ້ນ, ຊຸກຍູ້ການຮ່ວມມືດ້ານເສດຖະກິດ ລະຫວ່າງ ສອງປະເທດ ໃຫ້ນັບມື້ນັບມີປະສິດທິຜົນດີຂຶ້ນ ສົມຄູ່ກັບການຮ່ວມມືດ້ານການເມືອງທີ່ດີເລີດໃນປະຈຸບັນ.
​​​​​​​​ໃນຂະນະດຽວກັນນີ້, ທ່ານຮອງນາຍົກລັດຖະມົນຕີ ເຈືອງ ຮ່ວາ ບີ່ງ ກໍ່ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງ ລັດຖະບານ ແລະ ປະຊາຊົນລາວ ໃຫ້ແກ່ການເດີນທາງມາຢ້ຽມຢາມ ສປປ ລາວ ໃນຄັ້ງນີ້, ພ້ອມທັງ ສະແດງຄວາມຍິນດີສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມແຫ່ງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ແຕກດອກອອກຜົນຍິ່ງໆຂຶ້ນ.​

ແຫຼ່ງ: ກະຊວງການຕ່າງປະເທດ