ທ່ານຮອງນາຍົກລັດຖະມົນຕີ ຕ້ອນຮັບຜູ້ແທນຄະນະກຳມະການຊົນເຜົ່າ ແຫ່ງຊາດຈີນ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນສຸກ, 06 ທ.ວ 2019 16:00

​​​​​ໃນຕອນແລງ ຂອງວັນທີ 5 ທັນວາ 2019 ທີ່ ສຳນັກງານນາຍົກລັດຖະມົນຕີ, ທ່ານ ບຸນທອງ ຈິດມະນີ, ຮອງນາຍົກລັດຖະມົນຕີ, ປະທານອົງການກວດກາລັດຖະບານ, ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ໄດ້ໃຫ້ກຽດຕ້ອນຮັບທ່ານ SUN Xueyu, ຮອງລັດຖະມົນຕີ, ຮອງປະທານຄະນະກຳມະການຊົນເຜົ່າແຫ່ງຊາດຈີນ ພ້ອມດ້ວຍຄະນະ ໃນໂອກາດມາຢ້ຽມຢາມ ແລະ ເຂົ້າຮ່ວມກອງປະຊຸມປຶກສາຫາລື ກ່ຽວກັບການຮ່ວມມືສອງຝ່າຍ ໃນການຈັດຕັ້ງປະຕິບັດວຽກງານຊົນເຜົ່າ ຮ່ວມກັບກະຊວງພາຍໃນ ແຫ່ງ ສປປ ລາວ ໃນລະຫວ່າງ ວັນທີ 5-8 ທັນວາ 2019.

​​​​​ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ການເດີນທາງມາຢ້ຽມຢາມ ແລະ ເຮັດວຽກຮ່ວມກັບກະຊວງພາຍໃນ ແຫ່ງ ສປປ ລາວ ໃນຄັ້ງນີ້, ພ້ອມທັງ ຕີລາຄາສູງ ຕໍ່ສາຍພົວພັນອັນດີງາມ ແລະ ເປັນມູນເຊື້ອ ຂອງສອງຊາດ ລາວ-ຈີນ ທີ່ມີມາແຕ່ດົນນານແລ້ວນັ້ນ ນັບມື້ໄດ້ຮັບການພັດ ທະນາຢ່າງຮອບດ້ານ, ໂດຍສະເພາະ ການຮ່ວມມືຕ່າງຝ່າຍຕ່າງມີຜົນປະໂຫຍດ ແມ່ນໄດ້ຮັບໝາກຜົນເປັນໜ້າເພິ່ງພໍໃຈ ແລະ ເປັນໄປຕາມທິດນຳທີ່ວ່າ: ໝັ້ນຄົງຍາວນານ, ເພື່ອນບ້ານທີ່ເປັນມິດ, ໄວ້ເນື້ອເຊື່ອໃຈກັນ, ຮ່ວມມືຮອບດ້ານ ແລະ ບົນຈິດໃຈ 4 ດີ ຄື: ບ້ານໃກ້ເຮືອນຄຽງທີ່ດີ, ເພື່ອນທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ ຢ່າງແທ້ຈິງ. ນອກຈາກນີ້, ທ່ານຮອງນາຍົກລັດຖະມົນຕີ ຍັງໄດ້ນຳສະເໜີໃຫ້ຊາບ ກ່ຽວກັບນະໂຍບາຍອັນຖືກຕ້ອງ ແລະ ຄວາມພະຍາຍາມ ຂອງລັດຖະບານ ຕໍ່ວຽກງານຊົນເຜົ່າ, ວຽກງານສາສະໜາ ແລະ ອື່ນໆ, ລວມທັງ ຜົນສຳເລັດ ແລະ ຂໍ້ຈຳກັດບາງດ້ານ ໃນການພັດທະນາ ແລະ ຄຸ້ມຄອງ ວຽກງານຊົນເຜົ່າ ແລະ ສາສະໜາ ຕິດພັນກັບການປົກປັກຮັກສາຮີດຄອງປະເພນີອັນດີງາມ, ການພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງປະຊາຊົນລາວບັນດາເຜົ່າ.
​​​​​​ໃນໂອກາດດຽວກັນ, ທ່ານ SUN Xueyu ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານຮອງນາຍົກລັດຖະມົນຕີ ໃນຄັ້ງນີ້, ພ້ອມທັງ ນຳສະເໜີໃຫ້ທ່ານຮອງນາຍົກລັດຖະມົນຕີ ໄດ້ຮັບຊາບຕື່ມ ກ່ຽວກັບບົດຮຽນ, ປະສົບການ ແລະ ຜົນສຳເລັດອັນພົ້ນເດັ່ນບາງດ້ານ ໃນການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊົນຈີນ ໃນໄລຍະຜ່ານມາ ກໍ່ຄືທິດທາງແຜນການຕໍ່ໜ້າ ຂອງລັດຖະບານ ແຫ່ງ ສປຈີນ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ