ທ່ານນາຍົກລັດຖະມົນຕີ ຕ້ອນຮັບຜູ້ແທນກອງປະຊຸມໂຕະມົນ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນສຸກ, 29 ພ.ຈ 2019 18:00

​​​​​ໃນຕອນບ່າຍ ຂອງວັນທີ 29 ພະຈິກ 2019 ທີ່ ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ, ນາຍົກລັດຖະມົນຕີ ໄດ້ໃຫ້ກຽດຕ້ອນຮັບ ແລະ ໂອ້ລົມ ຕໍ່ຜູ້ແທນກອງປະຊຸມໂຕະມົນ, ຊຶ່ງນຳໂດຍທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ; ມີທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ; ບັນດາລັດຖະມົນຕີ, ຮອງລັດຖະມົນຕີກະຊວງທີ່ກ່ຽວຂ້ອງ, ບັນດາທ່ານເອກອັກຄະລັດຖະທູດ, ບັນດາຄູ່ຮ່ວມພັດທະນາ ແລະ ຜູ້ຕາງໜ້າອົງການຈັດຕັ້ງສາກົນ.

​​​​ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ຮັບຟັງການລາຍງານຫຍໍ້ ກ່ຽວກັບຜົນຂອງກອງປະຊຸມໂຕະມົນ ປະຈຳປີ 2019 ທີ່ຈັດຂຶ້ນຢູ່ແຂວງຫຼວງພະບາງ ໃນລະຫວ່າງວັນທີ 25-26 ພະຈິກ 2019 ຈາກທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ, ປະທານກອງປະຊຸມໂຕະມົນ ປະຈຳປີ 2019. ຫຼັງຈາກນັ້ນ, ທ່ານນາຍົກລັດຖະມົນຕີ ໄດ້ກ່າວສະແດງຄວາມຍິນດີຕ້ອນຮັບຄະນະຜູ້ແທນ ແລະ ຊົມເຊີຍ ຕໍ່ຜົນສຳເລັດ ຂອງກອງປະຊຸມໂຕະມົນ ປະຈຳປີ 2019, ພ້ອມທັງ ສະແດງຄວາມຂອບໃຈ ຕໍ່ການສະໜັບສະໜູນ ແລະ ຊ່ວຍເຫຼືອ ຂອງບັນດາປະເທດເພື່ອນມິດ ແລະ ອົງການຈັດຕັ້ງສາກົນ ໃນໄລຍະຜ່ານມາ. ນອກນັ້ນ ຍັງໄດ້ຍົກໃຫ້ເຫັນ ຄວາມພະຍາຍາມເອົາໃຈໃສ່ ຂອງພັກ, ລັດຖະບານລາວ ແລະ ພາກສ່ວນທີ່ກ່ຽວຂ້ອງ ໃນການນໍາພາປະຊາຊົນລາວບັນດາເຜົ່າ ປົກປັກຮັກສາ ແລະ ພັດທະນາປະເທດຊາດ ໃຫ້ນັບມື້ດີຂຶ້ນເປັນກ້າວໆ ໂດຍສະເພາະ ແມ່ນການພັດທະນາເສດຖະກິດ, ການແກ້ໄຂຄວາມທຸກຍາກຂອງປະຊາຊົນ ແລະ ອື່ນໆ ເພື່ອນຳພາປະເທດຊາດ ຫຼຸດພົ້ນອອກຈາກສະຖານະພາບດ້ອຍພັດທະນາ ສຳເລັດຕາມຄາດໝາຍທີ່ວາງໄວ້. ໃນຂະນະດຽວກັນ, ທ່ານນາຍົກລັດຖະມົນຕີ ຍັງໄດ້ຍົກໃຫ້ເຫັນສະພາບຄວາມຫຍຸ້ງຍາກ, ຂໍ້ຈຳກັດ ແລະ ສິ່ງທ້າທາຍຕ່າງໆ ທີ່ມີຕໍ່ການພັດທະນາປະເທດຊາດ ກໍ່ຄືການແກ້ໄຂຄວາມທຸກຍາກຂອງປະຊາຊົນ. ໃນຕອນທ້າຍ, ທ່ານນາຍົກລັດຖະມົນຕີ ຍັງມີຄຳເຫັນ ຈະນຳເອົາຂໍ້ສະເໜີ ແລະ ຄຳຄິດຄຳເຫັນຕ່າງໆ ຂອງຜູ້ແທນກອງປະຊຸມໂຕະມົນ ໄປຄົ້ນຄວ້າ ແລະ ປັບປຸງວຽກງານໃນຕໍ່ໜ້າ ໃຫ້ດີຂຶ້ນກວ່າເກົ່າ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ