ທ່ານນາຍົກລັດຖະມົນຕີ ຕ້ອນຮັບຄະນະຜູ້ແທນຈາກ ສປ ຈີນ

ຜູ້ຂຽນ: ​ອາ​ນິ​ຄົມ ວົ​ງເດືອນ

ວັນຈັນ, 18 ພ.ຈ 2019 10:00

​​
ໃນຕອນເຊົ້າຂອງວັນທີ 16 ພະຈິກ 2019 ທີ່ສໍານັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ລູ້ ຕົ່ງຝູ ປະທານສະພາບໍລິຫານ ກຸ່ມລັດວິສາຫະກິດລົດໄຟ ແຫ່ງຊາດຈີນ ພ້ອມຄະນະ ໃນໂອກາດທີ່ເດີນທາງ ມາຢ້ຽມຢາມ ແລະ ເຮັດວຽກຢູ່ ສປປ ລາວ ຢ່າງເປັນທາງການ ແຕ່ວັນທີ 15-18 ພະຈິກ 2019 ນີ້.
ໃນການເຂົ້າຢ້ຽມຂໍ່ານັບ ໃນຄັ້ງນີ້, ທ່ານ ລູ້ ຕົ່ງຝູ ໄດ້ລາຍງານຄວາມຄືບໜ້າ ກ່ຽວກັບໂຄງການກໍ່ສ້າງທາງລົດໄຟ ລາວ-ຈີນ ເຊິ່ງມາຮອດປັດຈຸບັນ ໂຄງການກໍ່ສ້າງສໍາເລັດ 81% ໃນນັ້ນ ມີໜ້າວຽກຍ່ອຍ ຄື: ວຽກໂຍທາໄດ້ 81% ພື້ນຖານໂຄງລ່າງໄດ້ 87% ກໍ່ສ້າງຂົວໄດ້ 55,4% ແລະ ເຈາະອຸມົງໄດ້ 80,3%, ການຈັດຕັ້ງປະຕິບັດໂຄງການ ມີຄວາມຄືບໜ້າດີ ຍ້ອນໄດ້ຮັບການສະໜັບສະໜູນ ຈາກລັດຖະບານ, ອົງການປົກຄອງທ້ອງຖິ່ນ ກໍ່ຄື ປະຊາຊົນລາວ. ກຸ່ມບໍລິສັດ ຈະສືບຕໍ່ເອົາໃຈໃສ່ ຈັດຕັ້ງປະຕິບັດໂຄງການ ໃຫ້ສຳເລັດຕາມແຜນການທີ່ວາງໄວ້. ເມື່ອເສັ້ນທາງລົດໄຟລາວ-ຈີນ ໄດ້ເປີດໃຊ້ບໍລິການ ຈະເຮັດໃຫ້ ສປປ ລາວ ທີ່ເປັນປະເທດ ບໍ່ມີເສັ້ນທາງອອກສູ່ທະເລ ກາຍເປັນປະເທດມີເສັ້ນທາງລົດໄຟເຊື່ອມຕໍ່ກັບບັນດາປະເທດໃນໂລກ.
ພ້ອມກັນນີ້, ສອງຝ່າຍ ກໍ່ໄດ້ປຶກສາຫາລືກ່ຽວກັບແຜນວຽກໃນຕໍ່ໜ້າ ແລະ ບາງບັນຫາ ໂດຍສະເພາະ ກ່ຽວກັບການບໍລິຫານ ແລະ ການໃຫ້ບໍລິການ ພາຍຫຼັງໂຄງການທາງລົດໄຟລາວ-ຈີນ ສໍາເລັດ ແລະ ເປີດນຳໃຊ້, ການສ້າງ ແລະ ພັດທະນາບຸກຄະລາກອນ ເພື່ອຄຸ້ມຄອງໂຄງການ ເຊິ່ງຝ່າຍຈີນ ຍິນດີຈະໃຫ້ການຊ່ວຍເຫຼືອ ໃນການຝຶກແອບບຸກຄະລາກອນ ທາງດ້ານເຕັກນິກວິຊາການ ແລະ ການບໍລິການ ໂດຍຈະຈັດຢູ່ຄຸນໝິງ ເລີ່ມແຕ່ປີ 2020, ການພັດທະນາ ໂຄງການປິ່ນອ້ອມໂຄງການທາງລົດໄຟລາວ-ຈີນ ແລະ ດຶງດູດນັກລົງທຶນເຂົ້າມາພັດທະນາ, ການຊຸກຍູ້ໃຫ້ ສປປ ລາວ ເຂົ້າເປັນສະມາຊິກອົງການຮ່ວມມືລົດໄຟສາກົນ, ບັນຫາດ່ານເຂົ້າ-ອອກ ແລະ ຈຸດກວດກາ ແລະ ບັນຫາອື່ນໆ.
ໃນໂອກາດນີ້, ທ່ານ ນາຍົກລັດຖະມົນຕີ ໄດ້ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຂອງທ່ານ ລູ້ ຕົ່ງຝູ ພ້ອມທັງ ຊົມເຊີຍຕໍ່ຄວາມຄືບໜ້າ ຂອງການກໍ່ສ້າງເສັ້ນທາງລົດໄຟລາວ-ຈີນ ເຊິ່ງໂຄງການ ນີ້ ໄດ້ປະກອບສ່ວນໃນການເສີມຂະຫຍາຍ ສາຍພົວພັນຮ່ວມມື ລະຫວ່າງ ສອງພັກ-ສອງລັດ ແລະ ໄດ້ກາຍເປັນສັນຍາລັກ ຂອງການຮ່ວມມື ລະຫວ່າງ 2 ປະເທດ, ພ້ອມທັງສະແດງຄວາມຂອບໃຈ ມາຍັງລັດຖະບານ ສປ ຈີນ ທີ່ໄດ້ໃຫ້ການສະໜັບສະໜູນ ໂຄງການດັ່ງກ່າວ ໄດ້ຮັບການກໍ່ສ້າງ ແລະ ມີຄວາມຄືບໜ້າມາຮອດ ປັດຈຸບັນ. ໂຄງການກໍ່ສ້າງເສັ້ນທາງລົດໄຟ ລາວ-ຈີນ ກໍ່ເປັນໜຶ່ງໃນການຈັດຕັ້ງປະຕິບັດ ຕາມແນວທາງນະໂຍບາຍ “ໜຶ່ງແລວ ໜຶ່ງເສັ້ນທາງ” ຂອງທ່ານ ສີ ຈິ້ນຜິງ ປະທານປະເທດ ສປ ຈີນ ເຊິ່ງໄດ້ປະກອບ ສ່ວນອັນສໍາຄັນ ເຂົ້າໃນການພັດທະນາ ເສັ້ນທາງຄົມມະນາຄົມຂົນສົ່ງ ຂອງສອງປະເທດ ໃຫ້ມີບາດກ້າວຂະຫຍາຍຕົວຍິ່ງໆຂຶ້ນ. ລັດຖະບານ ຈະສືບຕໍ່ໃຫ້ການຮ່ວມມື, ສະໜັບສະໜູນ ແລະ ແກ້ໄຂ ບັນຫາທີ່ຍັງ​ຄ້າງຄາ ເພື່ອໃຫ້ການກໍ່ສ້າງເສັ້ນທາງລົດໄຟ ສຳເລັດຕາມແຜນ ແລະ ສາມາດເປີດບໍລິການ ໄດ້ໃນທ້າຍປີ 2021.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ