ການນຳຂັ້ນສູງ ໃສ່ບາດບຸນນະມັດສະການພະທາດຫຼວງວຽງຈັນ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນອັງຄານ, 12 ພ.ຈ 2019 19:00


ເພື່ອສືບສານ ແລະ ຮັກສາຮີດຄອງປະເພນີອັນດີງາມຂອງຊາດລາວເຮົາ ທີ່ໄດ້ຮັບການສືບທອດມາແຕ່ດົນນານ, ໃນຕອນເຊົ້າ ຂອງວັນທີ 11 ພະຈິກ 2019 ການນຳຂັ້ນສູງຂອງ ພັກ, ລັດ, ສະພາແຫ່ງຊາດ, ອົງການຈັດຕັ້ງມະຫາຊົນ, ອະດີດການນຳ, ຄອບຄົວການນຳ ພ້ອມດ້ວຍມວນຊົນ ຈຳນວນຫຼວງຫຼາຍ ໄດ້ພ້ອມພາກັນໃສ່ບາດ ເນື່ອງໃນໂອກາດບຸນນະມັດສະການ ພະທາດຫຼວງວຽງຈັນ ປະຈຳປີ 2019, ຊຶ່ງກົງກັບເດືອນ 12 ເພັງ 15 ຄໍ່າ ພສ 2562.
 
​ການໃສ່ບາດ ບຸນນະມັດສະການ ພະທາດຫຼວງວຽງຈັນ ປະຈຳປີ 2019 ມີການນຳ, ອະດີດການນຳ ແລະ ຄອບຄົວການນຳຂັ້ນສູງ ເຂົ້າຮ່ວມຈຳນວນຫຼາຍທ່ານ ເປັນຕົ້ນ: ທ່ານ ນາງ ປານີ ຢາທໍ່ຕູ້, ປະທານສະພາແຫ່ງຊາດ; ທ່ານ ພັນຄຳ ວິພາວັນ, ຮອງປະທານປະເທດ; ທ່ານ ຄຳພັນ ພົມມະທັດ, ຫົວໜ້າຄະນະໂຄສະນາອົບຮົມສູນກາງພັກ; ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ; ທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ; ທ່ານ ສິນລະວົງ ຄຸດໄພທູນ, ເຈົ້າຄອງນະຄອນຫຼວງວຽງຈັນ; ທ່ານ ອາຊາງ ລາວລີ, ອະດີດຮອງນາຍົກລັດຖະມົນຕີ; ທ່ານ ສົມສະຫວາດ ເລັ່ງສະຫວັດ, ອະດີດຮອງນາຍົກລັດຖະມົນຕີ ແລະ ທ່ານອື່ນໆ ເຂົ້າຮ່ວມ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ