ພາກລັດ ແລະ ພາກທຸລະກິດ ຮ່ວມປຶກສາຫາລື ເພື່ອປັບປຸງສະພາບແວດລ້ອມການດໍາເນີນທຸລະກິດ ໃນ ສປປ ລາວ

ຜູ້ຂຽນ: ນ. ວິລະສະຕີ ສົມບູນຂັນ ແລະ ວັນ​ທອງ ລັດ​ຕະ​ນະ​ວິ​ໄລ

ວັນອັງຄານ, 12 ພ.ຈ 2019 18:00

​ກອງປະຊຸມທຸລະກິດລາວ ຄັ້ງທີ 12 ໄດ້ຈັດຂຶ້ນໃນຕອນເຊົ້າ ຂອງວັນທີ 12 ພະຈິກ 2019 ທີ່ ຫໍປະຊຸມແຫ່ງຊາດ, ນະຄອນຫຼວງວຽງຈັນ, ພາຍໃຕ້ການເປັນປະທານ ຂອງທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ; ໂດຍການໃຫ້ກຽດເຂົ້າຮ່ວມ ແລະ ໂອ້ລົມ ຂອງທ່ານ ທອງລຸນ ສີສຸລິດ, ນາຍົກລັດຖະມົນຕີ; ມີຜູ້ເຂົ້າຮ່ວມຈາກຂະແໜງການຕ່າງໆ ຂອງພາກລັດ, ບັນດາຜູ້ປະກອບການພາຍໃນ ແລະ ຕ່າງປະເທດ, ບັນດາທ່ານທູຕານຸທູດ ແລະ ຜູ້ຕາງໜ້າ ອົງການຈັດຕັ້ງສາກົນຕ່າງໆ ຫຼາຍກວ່າ 500 ຄົນ.

ໃນໂອກາດກ່າວເປີດກອງປະຊຸມ, ທ່ານສົມດີ ດວງດີ ໄດ້ເນັ້ນໜັກເຖິງຄວາມສຳຄັນ ຂອງການປັບປຸງສະພາບແວດລ້ອມ ການດຳເນີນທຸລະກິດ ຕໍ່ການສົ່ງເສີມການລົງທຶນ ຂອງທຸລະກິດພາຍໃນ ແລະ ຕ່າງປະເທດໃນຂະແໜງການ ທີ່ບໍ່ເອື່ອຍອີງໃສ່ຊັບພະຍາກອນທຳມະຊາດ ໂດຍສະເພາະແມ່ນ ຂະແໜງອຸດສາຫະກຳປຸງແຕ່ງ, ທ່ອງທ່ຽວ ແລະ ການປຸງແຕ່ງຜະລິດຕະພັນກະສິກຳ. 
ກອງປະຊຸມທຸລະກິດລາວຄັ້ງນີ້, ຖືກຈັດຂຶ້ນ ເພື່ອລາຍງານໝາກຜົນ ແລະ ຄວາມຄືບໜ້າຂອງການປຶກສາຫາລື ລະຫວ່າງ ພາກລັດ ແລະ ພາກທຸລະກິດ ພາຍໃຕ້ກົນໄກກອງປະຊຸມທຸລະກິດລາວ ໃນໄລຍະໜຶ່ງປີຜ່ານມາ. ນັບແຕ່ກອງປະຊຸມທຸລະກິດລາວຄັ້ງທີ 11, ໜ່ວຍງານປຶກສາຫາລືພາກທຸລະກິດ ແລະ ຂະແໜງການກ່ຽວຂ້ອງ ຂອງພາກລັດ ໄດ້ກໍານົດບັນຫາບູລິມະສິດ ທັງໝົດ 23 ບັນຫາສະເພາະ ເຊິ່ງຕິດພັນກັບຂົງເຂດຕ່າງໆ ເຊັ່ນ ຂົງເຂດສ່ວຍສາອາກອນ, ການອໍານວຍຄວາມສະດວກໃຫ້ແກ່ການນໍາເຂົ້າ ແລະ ສົ່ງອອກ, ການກໍ່ຕັ້ງທຸລະກິດ, ການສົ່ງເສີມການທ່ອງທ່ຽວທີ່ຍືນຍົງ ແລະ ຂົງເຂດອື່ນໆ ແລະ ໄດ້ພ້ອມກັນຄົ້ນຄວ້າແກ້ໄຂມາໂດຍຕະຫຼອດ, ມາຮອດປະຈຸບັນ ແກ້ໄຂແລ້ວ 7 ບັນຫາ ແລະ ມີຄວາມຄືບໜ້າໃນການແກ້ໄຂ 16 ບັນຫາ, ເຊິ່ງກອງປະຊຸມຄັ້ງນີ້ ກໍ່ໄດ້ປຶກສາຫາລືກ່ຽວກັບທິດທາງໃນການແກ້ໄຂ 16 ບັນຫາບູລິມະສິດ ທີ່ຍັງຄົງຄ້າງດັ່ງກ່າວ.
ນອກຈາກນີ້, ກອງປະຊຸມຍັງໄດ້ກ່າວເຖິງຄວາມໝາຍ ແລະ ຄວາມສໍາຄັນ ຂອງເວທີການປຶກສາຫາລື ພາຍໃຕ້ກົນໄກກອງປະຊຸມທຸລະກິດລາວ ເປັນເວທີທີ່ຍົກໃຫ້ເຫັນບັນຫາ ແລະ ການແກ້ໄຂບັນຫາ ທີ່ມີຜົນກະທົບຕໍ່ພາກທຸລະກິດໃນ ສປປ ລາວ ຢ່າງແທ້ຈິງ. ຜູ້ຕາງໜ້າຈາກພາກທຸລະກິດ ຍັງໄດ້ກ່າວຊົມເຊີຍລັດຖະບານ ໃນການເອົາໃຈໃສ່ ຮັກສາຄວາມຍືນຍົງການເຕີບໂຕຂອງເສດຖະກິດ ໂດຍຜ່ານມາດຕະການປັບປຸງຕ່າງໆ ເພື່ອສະໜັບສະໜູນ ໃຫ້ມີການດໍາເນີນທຸລະກິດ ໃນຫຼາກຫຼາຍຂະແໜງການ, ປະກອບສ່ວນໃຫ້ແກ່ການຂະຫຍາຍໂຕ ຂອງເສດຖະກິດຂອງປະເທດ. 

​ໃນຕອນທ້າຍ, ທ່ານນາຍົກລັດຖະມົນຕີ  ໄດ້ຊີ້ນຳ ແລະ ຕົກລົງແກ້ໄຂບັນຫາຈຳນວນໜຶ່ງ ແລະ ຊີ້ນຳໃຫ້ຂະແໜງການກ່ຽວຂ້ອງ ນຳເອົາບັນຫາທີ່ຍັງຄ້າງຄາ ໄປແກ້ໄຂໃຫ້ສຳເລັດໂດຍໄວ. ໃນໂອກາດນີ້, ທ່ານນາຍົກລັດຖະມົນຕີ ຍັງໄດ້ກ່າວໂອ້ລົມ ໂດຍໄດ້ກ່າວເຖິງຄວາມສຳຄັນ ຂອງພາກທຸລະກິດ ແລະ ຄວາມພະຍາຍາມ ຂອງລັດຖະບານ ໃນການເອົາໃຈໃສ່ແກ້ໄຂບັນຫາ ເພື່ອຊຸກຍູ້ສົ່ງເສີມ ແລະ ອຳນວຍຄວາມສະດວກ ໃຫ້ແກ່ການດຳເນີນທຸລະກິດ. ໄລຍະຜ່ານມາ ລັດຖະບານ ກໍ່ໄດ້ອອກນິຕິກຳຫຼາຍສະບັບ ແຕ່ດ້ານພຶດຕິໄນ ຍັງບໍ່ທັນຄືບໜ້າເທົ່າທີ່ຄວນ. ສະນັ້ນ, ລັດຖະບານ ຈະສືບຕໍ່ຈັດຕັ້ງປະຕິບັດ ໂດຍເນັ້ນໃສ່ຄຸນນະພາບ ໃນການບໍລິຫານວຽກງານ ແລະ ຄວາມໂປ່ງໃສ ໃນການຮັບໃຊ້ປະຊາຊົນ, ມີການຄຸ້ມຄອງຕິດຕາມກວດກາ ຢ່າງໃກ້ຊິດ, ໃຫ້ບັນດາຂະແໜງການ ຊ່ວຍແກ້ໄຂຂໍ້ຫຍຸ້ງຍາກຂອງພາກ ທຸລະກິດ ແລະ ສ້າງກາລະໂອກາດ ໃນການດຳເນີນທຸລະກິດ ເພື່ອໃຫ້ສາມາດແຂ່ງຂັນໄດ້ ໃນຍຸກ 4.0, ຍຸກແຫ່ງການແຂ່ງຂັນ, ຍຸກປັນຍາປະດິດ... ລັດຖະບານ ຈະສືບຕໍ່ມຸ່ງໝັ້ນ ໃນການພັດທະນາປະເທດ ໂດຍການມີສ່ວນຮ່ວມ ຂອງພາກທຸລະກິດ (ທຸລະກິດລັດ ແລະ ທຸລະກິດເອກະຊົນ ທັງພາຍໃນ ແລະ ຕ່າງປະເທດ), ມຸ່ງໝັ້ນຈະຮ່ວມມືກັບ ບັນດາປະເທດເພື່ອນມິດ, ຄູ່ຮ່ວມພັດທະນາ ແລະ ທຸກພາກສ່ວນ ເພື່ອສືບຕໍ່ສົ່ງເສີມ ແລະ ສ້າງກຳລັງແຮງ ໃຫ້ແກ່ການດຳເນີນທຸລະກິດ ຢູ່ ສປປ ລາວ ໃຫ້ນັບມື້ດີຂຶ້ນເປັນກ້າວໆ. ໃນໂອກາດດຽວກັນ,  ທ່ານນາຍົກລັດຖະມົນຕີ ຍັງຮຽກຮ້ອງໃຫ້ພາກທຸລະກິດ ສືບຕໍ່ປັບປຸງ ແລະ ພັດທະນາຕົນເອງ ໃຫ້ມີຄວາມເຂັ້ມແຂງ, ມີການແຂ່ງຂັນ ຢ່າງເປັນມິດ ເພື່ອສ້າງຄວາມເຂັ້ມແຂງ ເຊິ່ງກັນ ແລະ ກັນ ແລະ ຮ່ວມມືກັນ ບົນພື້ນຖານ ຕ່າງຝ່າຍຕ່າງມີຜົນປະໂຫຍດ, ຮຽກຮ້ອງໃຫ້ພາກທຸລະກິດ ລົງເລິກຊ່ວຍປະຊາຊົນ ແລະ ສົ່ງເສີມປະຊາຊົນ ໃຫ້ມີການຜະລິດຫຼາຍຂຶ້ນ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ