ທ່ານ ນາຍົກລັດຖະມົນຕີ ຕ້ອນຮັບປະທານາທິບໍດີ ຮົງກາຣີ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນຈັນ, 28 ຕ.ລ 2019 10:00

​​ໃນຕອນເຊົ້າ ຂອງວັນທີ 25 ຕຸລາ 2019 ທີ່ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບ ທ່ານ  ຢາໂນສ ອາແດຣ, ປະທານາທິບໍດີ ແຫ່ງ ສາທາລະນະລັດ ຮົງກາຣີ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມລັດຖະກິດ ຢູ່ ສປປ ລາວ ຕາມການເຊື້ອເຊີນ ຂອງທ່ານ  ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ.

​​ໃນໂອກາດນີ້, ທ່ານ ນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການມາຢ້ຽມຢາມຂອງ ທ່ານ ປະທານາທິບໍດີ ຢາໂນສ ອາແດຣ ພ້ອມດ້ວຍຄະນະຜູ້ແທນຂັ້ນສູງ ຂອງ ສ. ຮົງກາຣີ ໃນຄັ້ງນີ້, ຊຶ່ງເປັນການປະກອບສ່ວນອັນສຳຄັນ ເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ຂອງສອງປະເທດ ລາວ-ຮົງກາຣີ ໃຫ້ນັບມື້ແຕກດອກອອກຜົນຍິ່ງຂຶ້ນ. ການພົວພັນຮ່ວມມືຂອງສອງປະເທດ ໃນໄລຍະ 50 ກວ່າປີຜ່ານມາ ແມ່ນນັບມື້ໄດ້ຮັບ ການເສີມຂະຫຍາຍໃນຫຼາຍດ້ານ ເປັນຕົ້ນ ທາງດ້ານການເມືອງ, ການທູດ, ການພົບປະແລກປ່ຽນ ການຢ້ຽມຢາມ ຂອງການນໍາຂັ້ນສູງ, ການຮ່ວມມື ດ້ານກະສິກຳ, ການສຶກສາ ແລະ ການສະໜອງ ເງິນກູ້ບໍ່ມີດອກເບ້ຍ. ທ່ານ ນາຍົກລັດຖະມົນຕີ ໄດ້ສະແດງຄວາມຂອບໃຈ ມາຍັງລັດຖະບານ ສ. ຮົງກາຣີ ທີ່ໄດ້ ສະໜອງເງິນກູ້ບໍ່ມີດອກເບ້ຍ (Tied Aid Credit) ໃຫ້ແກ່ ສປປ ລາວ ທີ່ມີມູນຄ່າເກືອບ 200 ລ້ານໂດລາ ສຳລັບ 4 ໂຄງການ ຊຶ່ງລ້ວນແລ້ວ ແຕ່ເປັນໂຄງການ ທີ່ມີຄວາມສຳຄັນ. ພ້ອມນີ້ ກໍ່ໄດ້ສະແດງຄວາມຂອບໃຈຕໍ່ລັດຖະບານ ສ. ຮົງກາຣີ ທີ່ໄດ້ໃຫ້ການຊ່ວຍເຫຼືອ ສປປ ລາວ ໃນການສ້າງຊັບພະຍາກອນມະນຸດ ຊຶ່ງປະຈຸບັນ ມີນັກສຶກສາລາວ ກໍາລັງສຶກສາຮໍ່າຮຽນຢູ່ ຮົງກາຣີ ຈໍານວນ 185 ຄົນ ແລະ ໄດ້ສະເໜີໃຫ້ສືບຕໍ່ໃຫ້ການຊ່ວຍເຫຼືອ ກໍ່ຄື ສ້າງເງື່ອນໄຂ ໃຫ້ແກ່ນັກສຶກສາລາວ ໄດ້ສຶກສາຄົ້ນຄວ້າ ແລະ ລົງເລິກ ໃນຂະແໜງທີ່ຮົງກາຣີ ມີທ່າແຮງ, ມີບົດຮຽນ ແລະ ປະສົບການ ເປັນຕົ້ນ ອຸດສາຫະກຳ, ກະສິກຳ, ສິ່ງແວດລ້ອມ, ລວມທັງ ການຄຸ້ມຄອງແຫຼ່ງນໍ້າ, ຄຸ້ມຄອງປ່າໄມ້ ແບບຍືນຍົງ ເພື່ອນຳເອົາບົດຮຽນ ແລະ ປະສົບການດັ່ງກ່າວ ມານຳໃຊ້ເຂົ້າໃນການພັດທະນາ ສປປ ລາວ. ນອກຈາກນັ້ນ, ທ່ານ ນາຍົກລັດຖະມົນຕີ ແຫ່ງ ສປປ ລາວ ຍັງຫວັງຢ່າງຍິ່ງວ່າ ຈະໄດ້ມີໂອກາດ ຕ້ອນຮັບການມາຢ້ຽມຢາມ ສປປ ລາວ ຢ່າງເປັນທາງການ ຂອງທ່ານ ນາຍົກລັດຖະມົນຕີ ແຫ່ງ ສ. ຮົງກາຣີ ໃນເວລາທີ່ເໝາະສົມ.
                                  
​​ໃນໂອກາດດຽວກັນ, ທ່ານປະທານາທິບໍດີ ແຫ່ງ ສ ຮົງກາຣີ ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານນາຍົກລັດຖະມົນຕີ ແລະ ພາກສ່ວນທີ່ກ່ຽວຂ້ອງ ຂອງ ສປປ ລາວ, ພ້ອມທັງ ແລກປ່ຽນຄວາມຄິດຄວາມເຫັນ ຕໍ່ບັນຫາຈຳນວນໜຶ່ງ ທີ່ສອງຝ່າຍມີຄວາມສົນໃຈ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ