ນາຍົກລັດຖະມົນຕີ ຕ້ອນຮັບປະທານສະຫະພັນບານເຕະນາໆຊາດ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນຈັນ, 21 ຕ.ລ 2019 16:00

​ໃນຕອນເຊົ້າ ຂອງວັນທີ 19 ຕຸລາ 2019 ທີ່ ສໍານັກງານາຍົກລັດຖະມົນຕີ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບຂອງ ທ່ານ ຈີອານນີ ອິນຟານຕີໂນ (Gianni Infantino) ປະທານສະຫະພັນບານເຕະນາໆຊາດ ຫຼື FIFA ພ້ອມຄະນະ.

​ໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ກ່າວສະແດງຄວາມຍິນດີຕ້ອນຮັບ ແລະ ຍ້ອງຍໍຊົມ ເຊີຍຕໍ່ທ່ານປະທານ FIFA ພ້ອມດ້ວຍຄະນະ ທີ່ໄດ້ເດີນທາງມາຢ້ຽມຢາມ ສປປ ລາວ ໃນຄັ້ງນີ້  ແລະ ເປັນຄັ້ງທຳອິດ ພາຍຫຼັງທີ່ທ່ານໄດ້ຖືກເລືອກຕັ້ງເປັນປະທານ FIFA ອີກຄັ້ງໜຶ່ງ ເຊິ່ງເປັນການປະກອບສ່ວນອັນສຳຄັນ ໃນການພົວພັນຮ່ວມມືທີ່ດີ ລະຫວ່າງ ສະຫະພັນບານເຕະນາໆຊາດ ແລະ ສປປ ລາວ ເວົ້າລວມ, ເວົ້າສະເພາະ ກໍ່ແມ່ນການພົວພັນຮ່ວມມື ກັບ ສະຫະພັນບານເຕະແຫ່ງຊາດລາວ. ພ້ອມກັນນີ້ ກໍ່ໄດ້ສະແດງຄວາມຂອບໃຈຕໍ່ FIFA ທີ່ໄດ້ໃຫ້ການຊ່ວຍເຫຼືອ ໃນການພັດທະນາກິລາບານເຕະຢູ່ລາວ ດ້ວຍຫຼາຍຮູບການ ໃນໄລຍະທີ່ຜ່ານມາ. ກິລາບານເຕະຢູ່ ສປປ ລາວ ເຖິງວ່າໄດ້ຮັບການພັດທະນາ ແຕ່ກໍ່ຍັງຕ້ອງໄດ້ປັບປຸງຫຼາຍດ້ານ ທາງດ້ານທັກສະການຫຼີ້ນ, ລະບຽບວິໄນ, ຄວາມໂປ່ງໃສ… ຫວັງວ່າຈະໄດ້ຮັບການເອົາໃຈໃສ່ສືບຕໍ່ຊ່ວຍເຫຼືອຈາກ FIFA ເພື່ອພັດທະນາທີມກິລາບານເຕະຂອງ ສປປ ລາວ ທຽບເທົ່າກັບບັນດາປະເທດອາຊຽນ ກໍ່ຄື ສາກົນໃນຕໍ່ໜ້າ. ນອກຈາກນີ້ ກໍ່ຫວັງວ່າ FIFA ຈະສະ ໜັບສະໜູນອາຊຽນ (ASEAN) ໃນການເປັນເຈົ້າພາບຈັດງານແຂ່ງຂັນເຕະບານໂລກ ໃນອະນາຄົດ.
                           
ສໍາລັບການເຄື່ອນໄຫວຢ້ຽມຢາມລາວ ຂອງປະທານ FIFA ໃນຄັ້ງນີ້, ທ່ານປະທານ ພ້ອມດ້ວຍຄະນະ ຍັງໄດ້ໄປຢ້ຽມຢາມໂຄງການຕ່າງໆ ທີ່ FIFA ໄດ້ໃຫ້ການຊ່ວຍເຫຼືອ ສະໜັບສະໜູນລາວ ໃນໄລຍະທີ່ຜ່ານມາ ເປັນຕົ້ນ ໂຄງການກໍ່ສ້າງຫໍພັກນັກກິລາຊາຍ ແລະ ຫ້ອງອາຫານ, ໂຄງການອາຄານພະແນກເຕັກນິກວິທະຍາ ແລະ ພັດທະນາເດີ່ນຟຸດຊໍໃນຮົ່ມ, ອາຄານຫໍພັກນັກກິລາຍິງ, ສະໜາມຫຍ້າທຽມຢູ່ສູນຝຶກຫ້ວຍຫົງ, ອາຄານຫ້ອງການບໍລິຫານ, ຫໍພັກນັກກິລາ ແລະ ຄູຝຶກທີ່ສະໜາມກິລາແຫ່ງຊາດ, ນອກນັ້ນ FIFA ໄດ້ຊ່ວຍງົບປະມານບໍລິຫານສະຫະພັນບານເຕະແຫ່ງຊາດລາວ ກໍ່ຄື ສະຫະພັນບານເຕະປະເທດອື່ນໆ ທີ່ເປັນສະມາຊິກ ລວມມູນຄ່າການຊ່ວຍເຫຼືອ ທັງໝົດ 3 ລ້ານກວ່າໂດລາສະຫະລັດ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ