ການຄົ້ນຄວ້າ ຕ້ອງຕອບສະໜອງການພັດທະນາປະເທດ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນຈັນ, 14 ຕ.ລ 2019 11:00

​ໃນຕອນບ່າຍ ວັນທີ 11 ຕຸລາ 2019 ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ໄດ້ໃຫ້ກຽດໂອ້ລົມ ຕໍ່ກອງປະຊຸມວຽກງານວິທະຍາສາດ ແລະ ເຕັກໂນໂລຊີ ທົ່ວປະເທດ ຄັ້ງທີ III ຢູ່ຫໍປະຊຸມແຫ່ງຊາດ, ມີທ່ານ ສຈ.ປອ. ບໍ່ວຽງຄຳ ວົງດາລາ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ບັນດາທ່ານ ຮອງລັດຖະມົນຕີ, ຮອງເຈົ້າແຂວງ-ຮອງເຈົ້າຄອງ ນະຄອນຫຼວງວຽງຈັນ, ຫົວໜ້າພະແນກ ວິທະຍາສາດ ແລະ ເຕັກໂນໂລຊີ ປະຈຳແຂວງ ແລະ ນະຄອນຫຼວງວຽງຈັນ ພ້ອມດ້ວຍ ພະນັກງານ ພາຍໃນກະຊວງ ວິທະຍາສາດ ແລະ ເຕັກໂນໂລຊີ ທັງໝົດເຂົ້າຮ່ວມ.

ໃນໂອກາດດັ່ງກ່າວ, ກອງປະຊຸມໄດ້ຮັບຟັງການລາຍງານໂດຍຫຍໍ້ ກ່ຽວກັບສະພາບການຈັດຕັ້ງປະຕິບັດວຽກງານວິທະຍາສາດ ແລະ ເຕັກໂນໂລຊີ ໄລຍະ 2016-2019 ທີ່ຜ່ານມາ ແລະ ທິດທາງແຜນພັດທະນາວຽກງານວິທະຍາສາດ ແລະ ເຕັກໂນໂລຊີ 2 ປີຕໍ່ໜ້າ 2020-2021 ຈາກທ່ານ ສຈ.ປອ. ບໍ່ວຽງຄຳ ວົງດາລາ. ຈາກນັ້ນ, ທ່ານ ສອນໄຊ ສີພັນດອນ ກໍ່ໄດ້ໃຫ້ກຽດໂອ້ລົມຕໍ່ກອງປະຊຸມ, ຊຶ່ງທ່ານໄດ້ກ່າວຍ້ອງຍໍຊົມເຊີຍ ຕໍ່ຜົນງານທີ່ຂະແໜງວິທະຍາສາດ ແລະ ເຕັກໂນໂລຊີ ສາມາດຍາດມາໄດ້ໃນໄລຍະທີ່ຜ່ານມາ ຊຶ່ງໄດ້ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງປະເທດເຮົາ. ແຕ່ເຖິງຢ່າງໃດກໍ່ດີ ຖ້າສົມທຽບໃສ່ຄວາມຮຽກຮ້ອງຕ້ອງການອັນຈຳເປັນ ຂອງວຽກງານ ແລະ ໜ້າທີ່ການເມືອງໃນໄລຍະໃໝ່ແລ້ວ ເຫັນວ່າ ຍັງມີຫຼາຍດ້ານຕ້ອງໄດ້ປັບປຸງ ເປັນຕົ້ນ: ບຸກຄະລາກອນທີ່ມີຄວາມຮູ້ວິຊາສະເພາະ ແລະ ເຕັກນິກ, ການລົງທຶນຂອງລັດ ແລະ ເອກະຊົນ ຕໍ່ວຽກງານວິທະຍາສາດ ແລະ ເຕັກໂນໂລຊີ ຍັງຈຳກັດ, ບໍ່ສາມາດເຄື່ອນໄຫວ ຕາມຄວາມຮຽກຮ້ອງຕ້ອງການຂອງສັງຄົມ ໄດ້ທັງໝົດ… ສະນັ້ນ ຈຶ່ງຮຽກຮ້ອງໃຫ້ ພວກຕ້ອງໄດ້ສືບຕໍ່ບຸກບືນ, ປັບປຸງວຽກງານວິທະຍາສາດ ແລະ ເຕັກໂນໂລຊີ ໃຫ້ເຂັ້ມແຂງຂຶ້ນກວ່າເກົ່າ, ໂດຍໄດ້ເນັ້ນໜັກ ໃຫ້ເອົາໃຈໃສ່ຕື່ມບາງດ້ານ ຄື:
1. ສືບຕໍ່ເພີ່ມທະວີສ້າງຄວາມຮັບຮູ້ ແລະ ຄວາມເຂົ້າໃຈ ຂອງສັງຄົມທາງດ້ານວິທະຍາສາດ ແລະ ເຕັກໂນໂລຊີ ໃຫ້ກວ້າງຂວາງ ແລະ ເລິກເຊິ່ງ ໂດຍສະເພາະ ບົດບາດ ແລະ ຄວາມສຳຄັນ ຂອງວິທະທະຍາສາດ ແລະ ເຕັກໂນໂລຊີ ດ້ວຍຫຼາຍຮູບການ, ຊຸກຍູ້ສົ່ງເສີມການເຄື່ອນໄຫວຂອງສັງຄົມ ບົນພື້ນຖານຄວາມຮູ້, ວິທະຍາການທີ່ກ້າວໜ້າ ແລະ ສ້າງພື້ນຖານໃຫ້ແກ່ການສ້າງສັງຄົມພູມປັນຍາ ເທື່ອລະກ້າວ.
2. ປັບປຸງກົງຈັກການຈັດຕັ້ງ, ກົນໄກການຄຸ້ມຄອງ ວຽກງານວິທະຍາສາດ ແລະເຕັກໂນໂລຊີ, ສ້າງນະໂຍບາຍ-ນິຕິກຳ ໃຫ້ເປັນລະບົບ ແລະ ສາມາດຊຸກຍູ້ສົ່ງເສີມ ການເຄື່ອນໄຫວວຽກງານວິທະຍາສາດ ແລະ ເຕັກໂນໂລຊີ ໃຫ້ມີປະສິດ ທິພາບ ແລະ ປະສິດທິຜົນສູງຂຶ້ນ;
3. ພັດທະນາຊັບພະຍາກອນມະນຸດ ທາງດ້ານວິທະຍາສາດ ແລະ ເຕັກໂນໂລຊີ ໃຫ້ເປັນກຳລັງແຮງທີ່ໜັກແໜ້ນ ແລະ ເຂັ້ມແຂງໃຫ້ການພັດທະນາ;
4. ຄົ້ນຄວ້າ ແລະ ພັດທະນາ ນໍາໃຊ້ວິທະຍາສາດ ແລະ ເຕັກໂນໂລຊີ ເພື່ອຊຸກຍູ້ການພັດທະນາເສດຖະກິດ-ສັງຄົມ, ທັງເປັນເຄື່ອງມືໃນການປົກປັກຮັກສາ ແລະ ຟື້ນຟູສິ່ງແວດລ້ອມ ຕາມທິດພັດທະນາສີຂຽວ ແລະ ຍືນຍົງ ແລະ ນຳໃຊ້ເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ;
5. ຄຸ້ມຄອງ ແລະ ພັດທະນາ ການບໍລິການ ດ້ານວິທະຍາສາດ ແລະ ເຕັກໂນໂລຊີ ເພື່ອຮັບໃຊ້ສັງຄົມ ຢ່າງມີປະສິທິພາບ ແລະ ມີຄຸນນະພາບ ຢ່າງທົ່ວເຖິງ.
​ພ້ອມກັນນັ້ນ, ການຄົ້ນຄວ້າ-ພັດທະນາ ວຽກງານວິທະຍາສາດ ແລະ ເຕັກໂນໂລຊີ ຈະຕ້ອງຕອບສະໜອງການພັດທະນາເສດຖະກິດ-ສັງຄົມ ຂອງປະເທດເຮົາຢ່າງແທ້ຈິງ; ຕ້ອງຊຸກຍູ້ສົ່ງເສີມໃຫ້ມີນັກຄົ້ນຄວ້າວິທະຍາສາດໜຸ່ມ, ຜູ້ມັກການຄົ້ນຄວ້າ ຫຼາຍຂຶ້ນ; ມີການລະດົມທຶນຂອງທົ່ວສັງຄົມ ແລະ ມີການພົວພັນຮ່ວມມື ກັບພາກເອກະຊົນ ຫຼາຍຂຶ້ນ ໂດຍສະເພາະ ການຮ່ວມມືລົງທຶນໃສ່ໃນການຄົ້ນຄວ້າ ແລະ ພັດທະນາ; ນໍາໃຊ້ຜົນສໍາເລັດຂອງການຄົ້ນຄວ້າ ແລະ ການພັດທະນາວິທະຍາສາດ ແລະ ເຕັກໂນໂລຊີ, ນະວັດຕະກຳໃໝ່ ເຂົ້າໃນການຈັດຕັ້ງປະຕິບັດ ບັນດາໂຄງການລົງທຶນ ທີ່ເປັນຍຸດທະສາດລະດັບຊາດ; ສຸມໃສ່ພັດທະນາພື້ນຖານໂຄງລ່າງ ແລະ ການບໍລິການວິທະຍາສາດ ແລະ ເຕັກໂນໂລຊີ ໃນຂົງເຂດກະສິກໍາ, ອຸດສະຫະກໍາ ແລະ ການບໍລິການ, ສົ່ງເສີມວິສາຫະກິດຂະໜາດນ້ອຍ ແລະ ຂະໜາດກາງ ແລະ ເສດຖະກິດພູມບັນຍາ ທີ່ຕິດພັນກັບຂະແໜງການທີ່ມີທ່າແຮງ ຕາມທິດພັດທະນາແບບຍືນຍົງ ແລະ ສີຂຽວ, ລວມທັງ ເອົາໃຈໃສ່ນໍາໃຊ້ເຕັກໂນໂລຊີທັນສະໄໝ ເຂົ້າໃນຂະແໜງການຕ່າງໆ ເຊັ່ນ: ຂະແໜງການເງິນ, ທະນາຄານ, ການສຶກສາ ແລະ ສາທາລະນະສຸກ ເພື່ອຫັນເປັນທັນສະໄໝ ໃຫ້ທັນກັບຍຸກສະໄໝໃໝ່.​


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ