ຄູຕ້ອງສ້າງຕົນເອງໃຫ້ມີຄວາມຮູ້ກວ່າເກົ່າ ແລະ ທັນກັບຍຸກສະໄໝ

ຜູ້ຂຽນ: ​ອາ​ນິ​ຄົມ ວົ​ງເດືອນ

ວັນຈັນ, 07 ຕ.ລ 2019 10:00

​​ໃນຕອນບ່າຍຂອງວັນທີ 4 ຕຸລາ 2019 ທີ່ ມະຫາວິທະຍາໄລແຫ່ງຊາດ ໄດ້ຈັດຕັ້ງພິທີໂຮມຊຸມນຸມ ເພື່ອສະເຫຼີມສະຫຼອງ ແລະ ຂ່ຳນັບຮັບຕ້ອນວັນຄູແຫ່ງຊາດ ທີ່ຈະໝູນວຽນມາບັນຈົບຄົບຮອບ 25 ປີ (7 ຕຸລາ 1994 - 7 ຕຸລາ 2019). ໂດຍການໃຫ້ກຽດເຂົ້າຮ່ວມ ແລະ ໂອ້ລົມ ຂອງ ທ່ານ ທອງລຸນ ສີສຸລິດ, ນາຍົກລັດຖະມົນຕີ, ມີບັນດາທ່ານລັດຖະມົນຕີ, ຮອງລັດຖະມົນຕີ, ພະສົງ, ຜູ້ຊົງຄຸນວຸດທິ, ຜູ້ອາວຸໂສ, ຄູອາຈານ ແລະ ນັກຮຽນນັກສຶກສາ ເຂົ້າຮ່ວມ.

​ໂອກາດດັ່ງກ່າວ, ທ່ານ ນາງ ແສງເດືອນ ຫຼ້າຈັນທະບູນ, ລັດຖະມົນຕີກະຊວງສຶກສາທິການ ແລະ ກິລາ ໄດ້ຂຶ້ນກ່າວໃນພິທີ ແລະ ຍົກໃຫ້ເຫັນຄວາມໝາຍ, ຄວາມສໍາຄັນ ແລະ ປະຫວັດຄວາມເປັນມາຂອງວັນຄຸແຫ່ງຊາດ 7 ຕຸລາ ລວມທັງການພັດທະນາການສຶກສາ ໃນໄລຍະ 25 ປີ ຜ່ານມາ, ເປັນຕົ້ນ ດ້ານການສຶກສາກ່ອນໄວຮຽນ: ເຊິ່ງເປັນວຽກງານສຳຄັນອັນໜຶ່ງຂອງລະບົບການສຶກສາແຫ່ງຊາດ, ສະນັ້ນ ຈຶ່ງໄດ້ມີການຂະຫຍາຍໂຮງລ້ຽງເດັກ ແລະ ໂຮງຮຽນອະນຸບານ ຢູ່ບັນດາຕົວເມືອງ ແລະ ບ່ອນທີ່ມີຊຸມຊົນໜາແໜ້ນ ມີຈຳນວນໂຮງຮຽນເພີ່ມຂຶ້ນຈາກ 685 ແຫ່ງ ເປັນ 3.432 ແຫ່ງໃນປີ 2019, ພ້ອມກັນນັ້ນ ຈຳນວນຄູ ເພີ່ມຈາກ 1.962 ຄົນ ເປັນ 7.955 ຄົນ ແລະ ນັກຮຽນກໍເພີ່ມຂຶ້ນຈາກ 31.677 ຄົນ ເປັນ 240.384 ຄົນ; ວຽກງານປະຖົມສຶກສາ: ໄດ້ເອົາໃຈໃສ່ຂະຫຍາຍພື້ນຖານໂຄງລ່າງ, ສະໜອງຄູສອນ ແລະ ອຸປະກອນຮັບໃຊ້ການຮຽນ-ການສອນຕ່າງໆ ເຮັດໃຫ້ຈຳນວນໂຮງຮຽນເພີ່ມຂຶ້ນຈາກ 7.591 ແຫ່ງ ເປັນ 8.854 ແຫ່ງ, ຈຳນວນຄູສອນ ເພີ່ມຈາກ 24.568 ຄົນ ເປັນ 33.533 ຄົນ ແລະ ຈຳນວນນັກຮຽນເພີ່ມຂຶ້ນຈາກ 724.114 ຄົນ ເປັນ 770.659 ຄົນ; ວຽກງານມັດທະຍົມສຶກສາ: ໄດ້ມີການປະຕິຮູບຫຼາຍດ້ານ ບໍ່ວ່າຈະເປັນດ້ານຈຳນວນປີຮຽນ, ຫຼັກສູດການຮຽນ-ການສອນ ແລະ ພື້ນຖານໂຄງລ່າງຕ່າງໆ ໂດຍມີໂຮງຮຽນມັດທະຍົມ ເພີ່ມຂຶ້ນ ຈາກ 834 ແຫ່ງ ເປັນ 1.792 ແຫ່ງ, ມີຄູສອນ ເພີ່ມຂຶ້ນຈາກ 10.505 ຄົນ ເປັນ 32.334 ຄົນ ແລະ ມີນັກຮຽນເພີ່ມຂຶ້ນຈາກ 153.733 ຄົນ ເປັນ 659.850 ຄົນ. ໄປຄຽງຄູ່ກັບການສຶກສາໃນລະບົບໂຮງຮຽນ, ກະຊວງສຶກສາທິການ ແລະ ກິລາ  ຍັງໄດ້ເຮັດໜ້າທີ່ສະໜອງການສຶກສາໃຫ້ແກ່ຜູ້ທີ່ບໍ່ມີໂອກາດໄດ້ເຂົ້າຮຽນໃນໂຮງຮຽນອີກດ້ວຍ ໂດຍ ໄດ້ເປີດບັ້ນການບຳລຸງ ຈົບຊັ້ນປະຖົມສຶກສາມາ ຮອດປີ 2015 ຈຶ່ງໄດ້ປະກາດ ຈົບຊັ້ນປະຖົມບຳລຸງໃນທົ່ວປະເທດ ແລະ ມາຮອດປີ 2019 ທົ່ວປະເທດ ໄດ້ປະກາດຈົບຊັ້ນມັດທະຍົມຕອນຕົ້ນ ບຳລຸງສຳເລັດ ແລ້ວ 133 ເມືອງ ໃນ 148 ເມືອງ; ວຽກງານການສຶກສາສາຍອາຊີວະສຶກສາ ແລະ ອົບຮົມວິຊາຊີບ ເຖິງວ່າຍັງບໍ່ສາມາດຕອບສະໜອງໄດ້ ຕາມຄວາມຕ້ອງການຂອງຜູ້ປະກອບການ ແລະ ຕະຫຼາດແຮງງານໄດ້ທາງດ້ານປະລິມານ ແລະ ຄຸນນະພາບ, ແຕ່ກໍເຫັນວ່າຜູ້ສະໝັກເຂົ້າຮຽນ ໄດ້ມີຈໍານວນເພີ່ມຂຶ້ນໃນແຕ່ລະປີ; ວຽກງານການສຶກສາສົງ: ຄຽງຄູ່ກັບການເຜີຍແຜ່ພຸດທະສາດສະໜາໃຫ້ແກ່ພຸດທະຊາສະນິກກະຊົນແລ້ວ, ພະສົງຍັງໄດ້ເຮັດໜ້າທີ່ເປັນຄູສອນໜັງສື ແລະ ອຸທິດຕົນປະກອບສ່ວນໃນພາລະກິດສາທາລະນະປະໂຫຍດ ແລະ ພາລະກິດລວມຂອງບ້ານເມືອງ ເຊິ່ງຈຳນວນໂຮງຮຽນສົງໄດ້ເພີ່ມຂຶ້ນ ຈາກ 6 ແຫ່ງ ເປັນ 55 ແຫ່ງ ຢູ່ໃນ 13 ແຂວງ. ວຽກງານກິລາ-ກາຍຍະກໍາ: ນອກຈາກການສອນວິຊາພະລະສຶກສາ ແລະ ວິຊາສິລະປະສຶກສາໃນໂຮງຮຽນສາມັນຕາມຫຼັກສູດ ແລ້ວ ຍັງໄດ້ຊຸກຍູ້ສົ່ງເສີມຂະບວນການເຄື່ອນໄຫວກິດຈະກໍາ ແຂ່ງຂັນກິລາ, ສິລະປະວັນນະຄະດີຕ່າງໆ ທັງພາຍໃນ ແລະ ຕ່າງປະເທດ ໃນນີ້ ໄດ້ເຂົ້າຮ່ວມງານແຂ່ງຂັນໂອແລມປິກ-ພາລາແລມປິກ ຍາດມາໄດ້ ຫຼຽນຄຳ 15 ໜ່ວຍ, ຫຼຽນເງິນ 27 ໜ່ວຍ ແລະ ຫຼຽນທອງແດງ 99 ໜ່ວຍ; ວຽກງານຄົ້ນຄວ້າ: ນອກຈາກໄດ້ພັດທະນາຕົນເອງ ແລະ ໄດ້ປະກອບສ່ວນອັນສໍາຄັນເຂົ້າໃນການພັດທະນາຊັບພະຍາກອນມະນຸດ, ຄູຍັງໄດ້ເຮັດໜ້າທີ່ໃນການຄົ້ນຄວ້າວິທະຍາສາດ, ບໍລິການທາງດ້ານວິຊາການໃຫ້ແກ່ສັງຄົມ ແລະ ປະກອບ ສ່ວນເຂົ້າໃນພາລະກິດປົກປັກຮັກສາ ແລະ ອານຸລັກວັດທະນະທໍາ ຂອງຊາວລາວບັນດາເຜົ່າຕື່ມອີກ. 

​ໃນໂອກາດນີ້, ທ່ານ ທອງລຸນ ສີສຸລິດ, ນາຍົກລັດຖະມົນຕີ ໄດ້ສະແດງຄວາມຍ້ອງຍໍ ແລະ ຮູ້ບຸນຄຸນບັນດາຄູ ອາຈານ ແລະ ຊົມເຊີຍຜົນງານທີ່ຂະແໜງການສຶກສາທິການ ແລະ ກິລາ ສາມາດຍາດມາໄດ້ ໃນໄລຍະທີ່ຜ່ານມາ ອັນເປັນການປະກອບ ສ່ວນສໍາຄັນເຂົ້າໃນການພັດທະນາເສດຖະກິດ-ສັງຄົມຂອງຊາດ ຕະຫຼອດມາ ໂດຍສະເພາະແມ່ນ ການພັດທະນາຊັບພະຍາກອນມະນຸດທີ່ມີຄວາມຮູ້ຄວາມສາມາດຢ່າງຕໍ່ເນື່ອງ ເພື່ອຮັບໃຊ້ສັງຄົມ. ໃນຍຸກແຫ່ງການປົກປັກຮັກສາ ແລະ ພັດທະນາປະເທດຊາດໃນປະຈຸບັນ, ການສຶກສາ ຍິ່ງສືບຕໍ່ມີຄວາມສຳຄັນ, ສະນັ້ນ ເພື່ອເຮັດໃຫ້ວຽກງານດັ່ງກ່າວສືບຕໍ່ມີການພັດທະນາຢ່າງບໍ່ຢຸດຢັ້ງ, ທ່ານ ນາຍົກລັດຖະມົນຕີ ໄດ້ເນັ້ນໜັກໃຫ້ຂະແໜງການສຶກສາທິການ ແລະ ກິລາ ຄູ-ອາຈານ ໃຫ້ສືບຕໍ່ເອົາໃຈໃສ່ ເປັນຕົ້ນ ຕໍ່ກັບລະບົບການສືກສາ: ຕ້ອງສືບຕໍ່ປັບປຸງ ປະຕິຮູບ ລະບົບການສຶກສາ ໃຫ້ທັນຍຸກທັນສະໄໝ ແລະ ຄວາມຮຽກຮ້ອງຕ້ອງການທີ່ແທ້ຈິງຂອງຍຸກສະໄໝປະຈຸບັນ ຊຶ່ງແມ່ນຍຸກແຫ່ງການເຊື່ອມໂຍງ, ຍຸກແຫ່ງໂລກາພິວັດ, ຍຸກແຫ່ງການປະຕິວັດ ວິທະຍາສາດ 4.0 ຫຼື ຍຸກແຫ່ງການໃຊ້ປັນຍາປະດິດ (Artificial Intelligence ຫຼື AI) ເພື່ອແກ້ໄຂສິ່ງທ້າທາຍ ໂດຍສະເພາະການຄຸ້ມຄອງຄຸນນະພາບການສຶກສາ ເພື່ອສ້າງໃຫ້ຜູ້ທີ່ ຮຽນຈົບແລ້ວ ມີວຽກເຮັດງານທຳ, ການຫັນປ່ຽນຄ່ານິຍົມໃນການເລືອກຮຽນວິຊາຕ່າງໆ, ການຫັນປ່ຽນວິທີສິດສອນ  ດ້ວຍລະບົບສຶກສາທາງໄກ, ການນຳໃຊ້ທຶນຊ່ວຍເຫຼືອ ແລະ ກູ້ຢືມ, ເງິນງົບປະມານ ແລະ ໂຄຕ້າຄູ ທີ່ມີຈຳກັດ ຢ່າງມີຈຸດສຸມ, ມີບູລິມະສິດ ແລະ ມີປະສິດທິຜົນຢ່າງແທ້ຈິງ. ຕໍ່ກັບຄູ-ອາຈານ: ຄູຕ້ອງເປັນຜູ້ໃຫ້ (ໃຫ້ຄວາມຮູ້ວິຊາ, ໃຫ້ຄວາມ ສາມາດ, ໃຫ້ແບບຢ່າງ, ຕົວແບບຂອງອະລິຍະບົດ ຂອງການດຳລົງຊີວິດ), ຕ້ອງເປັນຜູ້ຮອບຮູ້ ດ້ານຄວາມ ຮູ້ວິຊາ ພັດທະນາຕົນເອງ ໃຫ້ທັນຍຸກທັນສະໄໝ ເພື່ອເອົາຄວາມຮູ້ທີ່ມີ ທັງປະຈຸບັນ ທັງອັນໃໝ່ ຖ່າຍທອດໃຫ້ ແກ່ຜູ້ຮຽນ, ຕ້ອງຮູ້ ແລະ ກ້າສະແດງອອກ, ເປັນນັກສະແດງ ເປັນຕົວລະຄອນ ທີ່ຊວນເຊື່ອໃຫ້ນັກຮຽນສຸມຈິດສຸມໃຈ ໃນສິ່ງທີ່ຄູກຳລັງສິດສອນ, ສິ່ງສຳຄັນ ຄູເປັນຄົນຂອງພັກ ຕ້ອງຢຶດໝັ້ນ ແລະ ກຳໄດ້ແນວທາງ ນະໂຍບາຍຂອງພັກ. ພ້ອມກັນນີ້, ກໍ່ຮຽກຮ້ອງໃຫ້ກະຊວງສຶກສາທິການ ແລະ ກິລາ ທົບທວນຄືນ ຄໍາເຫັນແນະນໍາ 10 ຂໍ້ທີ່ໄດ້ສະເໜີຕໍ່ຜູ້ບໍລິຫານການສຶກສາ ໃນກອງປະຊຸມຄັ້ງທີ VI ຂອງຄະນະກໍາມະການແຫ່ງຊາດ ເພື່ອພັດທະນາຊັບພະຍາກອນມະນຸດ ຄັ້ງວັນທີ 28 ທັນວາ 2018, ອັນໃດໄດ້ເຮັດແລ້ວ, ອັນໃດກຳລັງເຮັດ ແລະ ຍັງມີຄວາມຫຍຸ້ງຍາກ ກໍ່ໃຫ້ລາຍງານ ລັດຖະບານ ເພື່ອມີທິດຊີ້ນຳ ແກ້ໄຂ. ພ້ອມທັງ ຂໍຮຽກຮ້ອງໃຫ້ທຸກຂະແໜງການ ທຸກກາານຈັດຕັ້ງຂອງພັກ, ລັດ, ອົງການມະຫາຊົນນັກທຸລະກິດ ຜູ້ປະກອບການ ຕະຫຼອດເຖິງປະຊາຊົນໃນທົ່ວປະເທດ ພ້ອມກັນສະໜັບສະໜູນການສຶກສາ ກໍ່ຄື ພາລະກິດຂອງຄູ ເພື່ອພວກເຮົາ ຈະໄດ້ມີບຸກຄະລາກອນທີ່ມີຄຸນນະພາບ. 
​​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ