ຮອງນາຍົກລັດຖະມົນຕີ ເຄື່ອນໄຫວຊີ້ນຳວຽກງານຟື້ນຟູຫຼັງນ້ຳຖ້ວມ ຢູ່ແຂວງຄຳມ່ວນ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພຸດ, 02 ຕ.ລ 2019 15:00

​​ໃນ​​ວັນທີ 2 ຕຸລາ 2019 ນີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ ແຂວງຄຳມ່ວນ ໂດຍໄດ້ຮັບການຕ້ອນຮັບ ແລະ ຟັງການລາຍງານ ກ່ຽວກັບແຜນການພັດທະນາ ເສດຖະກິດ-ສັງຄົມ ຂອງແຂວງ ໂດຍສະເພາະ ໄດ້ຮັບຟັງການລາຍງານ ກ່ຽວກັບຜົນເສຍຫາຍຈາກໄພນ້ຳຖ້ວມ ແລະ ການແກ້ໄຂຜົນກະທົບຫຼັງນ້ຳຖ້ວມ ຈາກທ່ານ ສົມໃຈ ເພັດສີນວນ ຮອງເຈົ້າແຂວງຄຳມ່ວນ ໂດຍມີ ຄະນະນຳຂອງແຂວງ ແລະ ຂະແໜງການທີ່ກ່ຽວຂ້ອງ ເຂົ້າຮ່ວມ.​

​​ທ່ານ ສົມໃຈ ເພັດສີນວນ ໄດ້ລາຍງານໃຫ້ຮູ້ວ່າ: ໃນປີ 2018 ຜ່ານມາ ເສດຖະກິດຂອງແຂວງຄຳມ່ວນ ມີການເຕີບໂຕໃນລະດັບ 6,56%, ລວມຍອດຜະລິດຕະພັນພາຍໃນ ບັນລຸໄດ້ 7,4 ຕື້ກີບ, ສະເລ່ຍລາຍຮັບຕໍ່ຫົວຄົນ 17,8 ​ລ້ານກີບ ຫຼື ເທົ່າກັບ 2.121 ໂດລາສະຫະລັດຕໍ່ຄົນຕໍ່ປີ. ໃນປີ 2019 ນີ້, ໄດ້ອານຸມັດໂຄງການລົງທຶນຂອງລັດ ຈຳນວນ 341 ໂຄງການ, ມູນຄ່າ 113 ຕື້ກວ່າກີບ ເຊິ່ງໃນ 9 ເດືອນຜ່ານມາ ສາມາດປະຕິບັດໄດ້ 265 ໂຄງການ, ມູນຄ່າ 79 ຕື້ກີບ, ເທົ່າກັບ 70%. ສ່ວນການລົງທຶນຂອງພາກເອກະຊົນ ໄດ້ເນັ້ນໃສ່ປຸກລະດົມນັກລົງທຶນທັງພາຍໃນ ແລະ ຕ່າງປະເທດ ເຂົ້າມາລົງທຶນໃນກິດຈະການຕ່າງໆ ໃນໄລຍະ 9 ເດືອນ ໄດ້ 20 ໂຄງການ, ມີທຶນທັງໝົດ 27 ຕື້ໂດລາສະຫະລັດ, ທຶນຈົດທະບຽນເກືອບ 19 ຕື້ໂດລາສະຫະລັດ; ສ່ວນຂົງເຂດວຽກງານອື່ນໆ ກໍໄດ້ຮັບການພັດທະນາ ແລະ ປະສົບຜົນສຳເລັດ ໃນຫລາຍດ້ານ. ສຳລັບ ສະພາບຜົນເສຍຫາຍຈາກໄພນ້ຳຖ້ວມ ໃນໄລຍະຕົ້ນເດືອນສິງຫາ ຫາ ຕົ້ນເດືອນກັນຍາ ຜ່ານມາ ໄດ້ສ້າງຜົນເສຍຫາຍແກ່ປະຊາຊົນ ເປັນຈຳນວນຫລາຍ ກວມເອົາ 6 ເມືອງຂອງແຂວງ ຄື: ເມືອງບົວລະພາ, ເມືອງຍົມມະລາດ, ເມືອງໄຊບົວທອງ, ເມືອງມະຫາໄຊ ແລະ ເມືອງໜອງບົກ, ມີ 231 ບ້ານ, ມີ 16.600 ກວ່າຄອບຄົວ, ມີ 68.800 ກວ່າຄົນ ໄດ້ຮັບຜົນກະທົບ. ເນື້ອທີ່ນາປີປັກດຳ ຖືກນ້ຳຖ້ວມ 19.500 ກວ່າເຮັກຕາ, ເນື້ອທີ່ປູກພືດລະດູຝົນ 900 ກວ່າເຮັກຕາ; ສັດລ້ຽງຕາຍເປັນຈຳນວນຫຼາຍ, ໜອງປາ 326 ໜອງ, ໂຄງການຊົນລະປະທານ ຖືກນ້ຳຖ້ວມ 52 ຫົວງານ, ຄອງເໝືອງຍຸບ 12 ຈຸດ; ເສັ້ນທາງຖືກນ້ຳຖ້ວມ 31 ເສັ້ນ, ຍາວ 77.600 ກວ່າແມັດ; ໂຮງຮຽນຖືກນ້ຳຖ້ວມ 26 ແຫ່ງ, ໂຮງຮຽນອານຸບານ 3 ແຫ່ງ, ປະຖົມ 20 ແຫ່ງ, ມັດທະຍົມຕອນຕົ້ນ 3 ແຫ່ງ; ນ້ຳຖ້ວມໂຮງໝໍນ້ອຍ 11 ແຫ່ງ; ນໍ້າປະປາຊົນນະບົດ 9 ແຫ່ງ, ນ້ຳບາດານ 723 ບໍ່, ນ້ຳສ້າງ 119 ບໍ່, ວິດຖ່າຍ 4.900 ກວ່າໜ່ວຍ; ລວມມູນຄ່າຜົນເສຍຫາຍທັງໝົດ ທາງພາກລັດ 155 ຕື້ກີບ, ພາກເອກະຊົນ 11,6 ລ້ານໂດລາສະຫະລັດ.
​​ໂອກາດດັ່ງກ່າວ, ທ່ານ ສອນໄຊ ສີພັນດອນ ໄດ້ມີຄຳເຫັນໂອ້ລົມ ໂດຍທ່ານໄດ້ໃຫ້ທິດຊີ້ນຳ ແກ່ຄະນະນຳຂອງແຂວງຄຳມ່ວນ ໃຫ້ສືບຕໍ່ຊີ້ນຳ-ນຳພາ ຈັດຕັ້ງປະຕິບັດ ບັນດາວຽກງານຕ່າງໆ ໃນທຸກຂະແໜງການ ທີ່ເຫັນວ່າຍັງບໍ່ທັນສອດຄ່ອງ ໂດຍສະເພາະ ວຽກງານປ້ອງກັນຊາດ-ປ້ອງກັນຄວາມສະຫງົບ, ເອົາໃຈໃສ່ແກ້ໄຂປະກົດການຫຍໍ້ທໍ້ຕ່າງໆທີ່ເກີດຂຶ້ນ ເປັນຕົ້ນ ບັນຫາຢາເສບຕິດ, ຂີ້ລັກງັດແງະ ລວມທັງ ອຸປະຕິເຫດ ແລະ ອື່ນໆ. ຄຽງຄູ່ກັນນັ້ນ, ວຽກງານເສດຖະກິດ ໃຫ້ສຸມໃສ່ປະຕິບັດບັນດາຄຳສັ່ງ-ຄຳເນາະນຳ ຂອງລັດຖະບານ ເປັນຕົ້ນຄຳສັ່ງວ່າດ້ວຍການປະຕິບັດ 8 ມາດຕະການຊຸກ ຍູ້ເສດຖະກິດ, ການລົງທຶນຂອງພາກລັດ ແລະ ພາກເອກະຊົນ ທັງພາຍໃນ ແລະ ຕ່າງປະເທດ ໃຫ້ເຂັ້ມງວດ, ຈັດຕັ້ງປະຕິບັດບັນດາໂຄງການຕາມທີ່ສະພາອານຸມັດ, ບໍ່ໃຫ້ໂຄງການນອກແຜນ ແລະ ປະຕິບັດຕາມທິດຂອງລັດຖະບານ ໃນການກວດກາຄືນບັນດາໂຄງການລົງທຶນຂອງລັດ ໂດຍສະເພາະໂຄງການນອກແຜນທີ່ໄດ້ຈັດຕັ້ງປະຕິບັດຜ່ານມາ ໃຫ້ສຳເລັດ ແລະ ໃຫ້ເປັນຮູບປະທຳ.
​​ພ້ອມນັ້ນ ທ່ານຮອງນາຍົກລັດຖະມົນຕີ ຍັງໄດ້ເນັ້ນໃຫ້ຄະນະນຳຂອງແຂວງ, ເມືອງ ສຸມໃສ່ແກ້ໄຂຜົນກະທົບຈາກໄພນ້ຳຖ້ວມ ກໍ່ຄື ຊ່ວຍເຫຼືອ ບັນດາເມືອງ ທີ່ໄດ້ຮັບຜົນກະທົບ ໃນການປັບປຸງຟື້ນຟູ ພື້ນຖານໂຄງລ່າງ ແລະ ເນື້ອທີ່ການຜະລິດ ທີ່ໄດ້ຮັບຜົນເສຍຫາຍ ໂດຍສະເພາະ ດ້ານກະສິກຳເປັນຫຼັກ. ພ້ອມນັ້ນ, ໃຫ້ສຸມໃສ່ຕິດຕາມເຝົ້າລະວັງ ພະຍາດລະບາດ, ໂຮງຮຽນ, ສຸກສາລາ, ຊົນລະປະທານ ຕ້ອງໃຫ້ມີແຜນການແກ້ໄຂ ຢ່າງຮີບດ່ວນ ໃຫ້ກັບຄືນສູ່ສະພາບປົກກະຕິໂດຍໄວ ແນໃສ່ເຮັດໃຫ້ຊີວິດການເປັນຢູ່ຂອງປະຊາຊົນ ດີຂຶ້ນເທື່ອລະກ້າວ. ໃນໂອກາດດຽວກັນ ທ່ານ ສອນໄຊ ສີພັນດອນ ຍັງໄດ້ມອບເງິນຈຳນວນ 100 ລ້ານກີບ ໃຫ້ແຂວງຄຳມ່ວນ ເພື່ອນຳໄປຊ່ວຍເຫຼືອບັນດາເມືອງ ກໍ່ຄື ປະຊາຊົນ ທີ່ໄດ້ຮັບຜົນກະທົບຈາກໄພນ້ຳຖ້ວມ ຢ່າງທົ່ວເຖິງ ແລະ ທັນການ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ