ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ຕ້ອນຮັບທ່ານທູດ ສປ ຈີນ ຢ້ຽມອຳລາ

ຜູ້ຂຽນ: ​ອາ​ນິ​ຄົມ ວົ​ງເດືອນ, ນັດນິລັນ ສີພັນດອນ

ວັນພຸດ, 10 ຕ.ລ 2018 16:00

ໃນຕອນເຊົ້າຂອງວັນທີ 10 ຕຸລາ 2018 ທີ່ສໍານັກງານນາຍົກລັດຖະມົນຕີ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບອຳລາຂອງ ທ່ານ ຫວ່າງ ເວີນທຽນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປ ຈີນ ປະຈຳ ສປປ ລາວ ພ້ອມດ້ວຍຄະນະ ເນື່ອງໃນໂອກາດ ສຳເລັດການປະຕິບັດໜ້າທີ່ການທູດຢູ່ ສປປ ລາວ.
     ກ່ອນອື່ນ, ທ່ານ ສອນໄຊ ສີພັນດອນ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງ ຕໍ່ຜົນສຳເລັດໃນການປະຕິບັດໜ້າທີ່ວຽກງານທາງການທູດຢູ່ ສປປ ລາວ ຂອງ ທ່ານ ຫ່ວາງ ເວີນທຽນ ໃນໄລຍະຜ່ານມາ ອັນໄດ້ປະກອບສ່ວນສຳຄັນ ເຂົ້າໃນການຊຸກຍູ້ ແລະ ເສີ່ມຂະຫຍາຍສາຍພົວພັນຮ່ວມມືມິດຕະພາບອັນເປັນມູນເຊື້ອ ແລະ ເປັນຄູ່ຮ່ວມມືຍຸດທະສາດຮອບດ້ານ ລະຫວ່າງ ສອງພັກ, ສອງລັດ ກໍ່ຄື ປະຊາຊົນສອງປະເທດ ລາວ-ຈີນ ໃຫ້ນັບມື້ນັບເຂົ້າສູ່ລວງເລິກຍິ່ງໆຂຶ້ນ ໂດຍສະເພາະ ການພົວພັນຮ່ວມມືທາງດ້ານເສດຖະກິດ, ການຄ້າ-ການລົງທຶນ, ທ່ອງທ່ຽວ ແລະ ອື່ນໆ. ພ້ອມດຽວກັນນີ້, ທ່ານ ສອນໄຊ ສີພັນດອນ ຕາງໜ້າໃຫ້ພັກ-ລັດ ກໍ່ຄື ປະຊາຊົນລາວບັນດາເຜົ່າ ຂໍສະແດງຄວາມຂອບໃຈມາຍັງພັກ-ລັດ ສປ ຈີນ ທີ່ໄດ້ໃຫ້ການສະໜັບສະໜູນ, ຊຸກຍູ້ຊ່ວຍເຫຼືອ ສປປ ລາວ ທັງໃນເວທີພາກພື້ນ ແລະ ສາກົນຕະຫຼອດມາ ປະກອບສ່ວນສໍາຄັນເຮັດໃຫ້ເສດຖະກິດມີການຂະຫຍາຍຕົວຢ່າງຕໍ່ເນື່ອງຕະຫຼອດມາ. ໃນຕອນທ້າຍ, ທ່ານຮອງນາຍົກລັດຖະມົນຕີ ໄດ້ອວຍພອນໃຫ້ທ່ານ ຫ່ວາງ ເວີນທຽນ ຈົ່ງເດີນທາງກັບຄືນປະເທດ ດ້ວຍຄວາມສະຫວັດດີພາບ ແລະ ປະສົບຜົນສຳເລັດ ໃນການປະຕິບັດໜ້າທີ່ໃໝ່ໃຫຍ່ຫຼວງກວ່າເກົ່າ ແລະ ເຊື່ອມໝັ້ນວ່າ ທ່ານ ຫວ່າງ ເວີນທຽນ ຈະສືບຕໍ່ບຸກລະດົມ, ຂົນຂວາຍ ໃຫ້ນັກລົງທຶນ ຂອງ ສປ ຈີນ ເຂົ້າມາລົງທຶນ ຢູ່ ສປປ ລາວ ໃຫ້ຫຼາຍຂຶ້ນຕື່ມອີກ.

     ໃນໂອກາດດັ່ງກ່າວນີ້, ທ່ານ ຫ່ວາງ ເວີນທຽນ ກໍໄດ້ສະແດງຄວາມຂອບໃຈ ຕໍ່ທ່ານຮອງນາຍົກລັດຖະມົນຕີ ກໍ່ຄື ລັດຖະບານ ແຫ່ງ ສປປ ລາວ ທີ່ໄດ້ໃຫ້ການສະໜັບສະໜູນ, ຊຸກຍູ້ຊ່ວຍເຫຼືອ, ໃຫ້ການຮ່ວມມືເປັນຢ່າງດີ ຕະຫຼອດໄລຍະ  ທີ່ໄດ້ມາປະຕິບັດໜ້າທີ່ການທູດ ຢູ່ ສປປ ລາວ  ຈົນໄດ້ຮັບຜົນສໍາເລັດ ເປັນຢ່າງດີ.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ
ຂ່າວອື່ນໆ