ທ່ານ ສອນໄຊ ສີພັນດອນ ຕິດຕາມຄວາມຄືບໜ້າໃນການແກ້ໄຂໄພພິບັດ ຢູ່ທີ່ເມືອງສະໜາມໄຊ

ຜູ້ຂຽນ: ​ອາ​ນິ​ຄົມ ວົ​ງເດືອນ

ວັນອັງຄານ, 09 ຕ.ລ 2018 16:00

​​​​​​​​​​​​​​​​​​​​​ ໃນວັນທີ 8 ຕຸລາ 2018 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກໍາມະການສະເພາະກິດ ແກ້ໄຂໄພພິບັດລະດັບຊາດ ພ້ອມດ້ວຍຄະນະ ໄດ້ເດີນທາງໄປຕິດຕາມຄວາມຄືບໜ້າ ໃນການແກ້ໄຂ ແລະ ຟື້ນຟູຊີວິດການເປັນຢູ່ ຂອງປະຊາຊົນ ທີ່ໄດ້ຮັບຜົນກະທົບຈາກໄພພິບັດ ຢູ່ມືອງສະໜາມໄຊ, ແຂວງອັດຕະປື.
         
​​​​​​​​​​​​​​​​​​​​​ ໂອກາດດັ່ງກ່າວ, ທ່ານ ບຸນໂຮມ ພົມມະສານ ເຈົ້າເມືອງໆສະໜາມໄຊ ໄດ້ລາຍງານກ່ຽວກັບ ຄວາມຄືບໜ້າ ໃນການຟື້ນຟູ ແລະ ຊ່ວຍເຫຼືອປະຊາຊົນ ທີ່ໄດ້ຮັບຜົນກະທົບ ຈາກໄພພິບັດ ວ່າ: ວຽກປະສານງານ ແລະ ວາງແຜນຈັດສັນຄຸ້ມຄອງ ສູນພັກຊົ່ວຄາວ: ໄດ້ສັງລວມການອອກບັດ ໃຫ້ຜູ້ປະສົບໄພ ໃນຈຳນວນ 6 ບ້ານ, 1 ຄຸ້ມ, 8 ຈຸດພັກ, ລວມທັງໝົດມາຮອດປະຈຸບັນສາມາດອອກບັດໄດ້ 7.559 ຄົນ, ສືບຕໍ່ຈັດສັນຜູ້ປະສົບໄພ ຢູ່ໃນສູນພັກສຸກເສີນ 7 ສູນ; ຈໍານວນ 980 ຄອບຄົວ; 4.012 ຄົນ ແລະ ຢູ່ສູນພັກຊົ່ວຄາວ 1 ສູນ; ຈັດສັນປະຊາຊົນ ບ້ານທ່າຫີນ, ຫີນລາດ ເຂົ້າສູນພັກຊົ່ວຄາວ ຈຳນວນ 6 ຫຼັງ, ໄດ້ດຳເນີນການສຳຫຼວດ-ສົມທຽບຕົວເລກຄອບຄົວ ຜູ້ປະສົບໄພ; ເຊິ່ງມາຮອດປະຈຸບັນ ສາມາດສຳເລັດ ການດຳເນີນການສຳຫຼວດ 6 ບ້ານ; ໄດ້ຮັບຮອງ ຈຳນວນພົນລະເມືອງຄືນໃໝ່ ຕໍ່ພາກສ່ວນທີ່ໄປອອກແຮງງານ ຢູ່ຕ່າງເມືອງ, ຕ່າງແຂວງ ແລະ ນັກຮຽນທີ່ໄປຮຽນຕໍ່ວິຊາຊີບ ກ່ອນເກີດເຫດການ; ໄດ້ຈ່າຍເງີນໃຫ້ຜູ້ປະສົບໄພ ຄົນລະ 100.000 ກີບ/ຄົນ/ເດືອນ; ລວມລາຍຈ່າຍ ມາຮອດມື້ນີ້ ແມ່ນສຳເລັດແລ້ວ 5 ບ້ານ 1 ຄຸ້ມ ຄື: ບ້ານຫີນລາດ, ສະໝອງໄຕ້, ບ້ານໃໝ່, ບ້ານທ່າຫີນ, ບ້ານທ່າແສງຈັນ ແລະ ຄຸ້ມໂຄກກ່ອງ ມີຈໍານວນ 4.300 ຄົນ; ການສ້າງທີ່ພັກຊົ່ວຄາວ ແລະ ຖາວອນ: ໄດ້ບຸກເບີກເນື້ອທີ່ ເພື່ອປຸກສ້າງທີ່ພັກຖາວອນ: ຈຸດດົງບາກ ໃນຈຳນວນເນື້ອທີ່ 120 ຮຕ; ຈຸດຄຸ້ມດອນບົກ-ບ້ານທ່າແສງຈັນ ມີເນື້ອທີ່ ເພື່ອບຸກເບີກ ຈຸດພັກຊົ່ວຄາວ ແລະ ຖາວອນຈຳນວນ 60 ຮຕ:  ມາຮອດປະຈຸບັນນີ້ ບຸກເບີກໄດ້ແລ້ວຈຳນວນ 22 ຮຕ, ເທົ່າກັບ 36,66%; ຈຸດບ້ານຕະມໍຢອດ-ບ້ານຫີນລາດ ມີເນື້ອທີ່ບຸກເບີກ ຈຳນວນ 60 ເຮັກຕາ ປະຈຸບັນສຳເລັດການບຸກເບີກ 31,66%; ສໍາເລັດການກໍ່ສ້າງເຮືອນ ສຳເລັດຮູບ ທັງໝົດ 24 ຫຼັງ; ຈຸດບ້ານປິນດົງ: ບ້ານສະໝອງ ມີເນື້ອທີ່ ເພື່ອບຸກເບີກເນື້ອທີ່ 56 ຮຕ ປະຈຸບັນ ສາມາດບຸກເບີກໄດ້ 39,28%; ການກໍ່ສ້າງ ແລະ ສ້ອມແປງເສັ້ນທາງ ແລະ ຂົວ: ໄດ້ສ້ອມແປງ ທາງແຍກ 18 A ຫາ ບ້ານແທ ແລະ ການກໍ່ສ້າງຂົວເຫຼັກ ກໍ່ໄດ້ຮັບການຈັດຕັ້ງປະຕິບັດໄປ ຢ່າງມີຄວາມຄືບໜ້າດີ; ວຽກງານກະສິກໍາ-ປ່າໄມ້: ໄດ້ສະໜອງແນວພັນເຂົ້າໃຫ້ 1 ເຂດ ລວມທັງໝົດ 8.500 ກິໂລ; ການສໍາຫຼວດດິນ ເພື່ອບຸກເບີກເນື້ອທີ່ນາ ໃຫ້ປະຊາຊົນ ທີ່ຖືກຜົນກະທົບ ມີ 5 ຈຸດ, ໃນຈຳນວນເນື້ອທີ່ທັງໝົດ 1.800 ຮຕ; ວຽກງານການສຶກສາ: ສໍາລັບນັກຮຽນແຕ່ ມ4-ມ7 ແມ່ນໄດ້ເລີ່ມເປີດການຮຽນ-ການສອນ ເປັນປົກກະຕິ ແຕ່ວັນທີ 3 ສິງຫາ 2018 ເປັນຕົ້ນມາ; ສ່ວນຊັ້ນອະນຸບານ, ປະຖົມ-ມັດທະຍົມຕົ້ນ ໄດ້ເປີດສົກຮຽນ ແຕ່ວັນທີ 10-15 ກັນຍາ 2018. ສ່ວນ, ການຈັດຕັ້ງປະຕິບັດວຽກງານອື່ນໆ ກໍ່ໄດ້ຮັບການຈັດຕັ້ງປະຕິບັດ ແລະ ມີຄວາມຄືບໜ້າເປັນຢ່າງດີ.
          
​​​​​​​​​​​​​​​​​​​​​ ສຳລັບທິດທາງ ແກ້ໄຂບັນຫາຕ່າງໆ ໃນໄລຍະເລັ່ງດ່ວນ, ໄລຍະສັ້ນ ແລະ ໄລຍະຍາວ ນັ້ນ, ທ່ານເຈົ້າເມືອງໆສະໜາມໄຊ ໄດ້ສະເໜີຕື່ມ ວ່າ: ວຽກອັນຮີບດ່ວນ ແມ່ນສືບຕໍ່ບຸກເບີກພື້ນທີ່ ຈະປຸກສ້າງ ທີ່ພັກຖາວອນ ແລະ ປຸກສ້າງທີ່ຢູ່ອາໃສຊົ່ວຄາວ ຕາມຈຸດທີ່ໄດ້ກຳນົດໄວ້, ສືບຕໍ່ສໍາຫຼວດຈໍານວນຄອບຄົວ,ຈໍານວນພົນ; ອອກບັດ ແລະ ຈ່າຍເງີນ ໃຫ້ຜູ້ປະສົບໄພ, ສືບຕໍ່ເບີກຈ່າຍເຂົ້າສານ, ອາຫານແຫ້ງ ແລະ ເຄື່ອງໃຊ້ຕ່າງໆ ຕາມຄວາມຕ້ອງການ ແລະ ເງື່ອນໄຂຕົວຈິງ ເທົ່າທີ່ມີ, ສືບຕໍ່ສໍາຫຼວດພື້ນທີ່ ທໍາການຜະລິດ ໃຫ້ປະຊາຊົນ, ສືບຕໍ່ປຸກເຮືອນພັກຊົ່ວຄາວ ທີ່ໄດ້ຮັບການຊ່ວຍເຫຼືອ ຈຳນວນ 3 ຫຼັງ, 30 ຫ້ອງ.
​​​​​​​​​​​​​​​​​​​​​ ໂອກາດດັ່ງກ່າວ, ທ່ານ ສອນໄຊ ສີພັນດອນ ກໍ່ໄດ້ສະແດງຄວາມຍ້ອງຊົມເຊີຍ ຕໍ່ທຸກພາກສ່ວນທີ່ກ່ຽວຂ້ອງ ທີ່ໄດ້ມີຄວາມອົດທົນ, ພະຍາຍາມ ແລະ ເອົາໃຈໃສ່ໃນການແກ້ໄຂ ບັນຫາດັ່ງກ່າວ ຕະຫຼອດມາ. ພ້ອມຖືໂອກາດນີ້ ມີຄໍາເຫັນໂອ້ລົມ ແລະ ເນັ້ນໜັກໃຫ້ອໍານາດ ການປົກຄອງແຂວງ, ເມືອງ, ບ້ານ ລວມທັງ ຄະນະຮັບຜິດຊອບ ແກ້ໄຂໄພພິບັດ ຢູ່ທີ່ເມືອງສະໜາມໄຊ, ແຂວງອັດຕະປື ສືບຕໍ່ເອົາໃຈໃສ່ປະຕິບັດ ສຶກສາອົບຮົມວຽກງານການເມືອງແນວຄິດໃຫ້ປະຊາຊົນ ໃຫ້ສືບຕໍ່ອຸ່ນອ່ຽນທຸ່ນທ່ຽງ; ຄຽງຄູ່ກັບການຈັດສັນ ທີ່ຢູ່ອາໃສທີ່ພັກຊົ່ວຄາວໃຫ້ດີ; ບຸກເບີກເນື້ອທີ່ການຜະລິດ ຂອງປະຊາຊົນ ເພື່ອໃຫ້ປະຊາຊົນ ໄດ້ທຳການຜະລິດ ໃຫ້ສໍາເລັດໂດຍໄວ. ພ້ອມເອົາໃຈໃສ່ ປັບປຸງກໍ່ສ້າງພື້ນຖານໂຄງລ່າງ ທີ່ຈໍາເປັນ ຢູ່ເຂດຈັດສັນ ເປັນຕົ້ນ: ເສັ້ນທາງ, ໄຟຟ້າ, ຊົນລະປະທານ, ນໍ້າກິນ, ນໍ້າໃຊ້ ແລະ ອື່ນໆ;  ເອົາໃຈໃສ່ຮັກສາສຸຂະພາບ ແລະ ສຸຂະນາໄມ ໃຫ້ປະຊາຊົນ; ເກັບກໍາຂໍ້ມູນຜົນເສຍຫາຍ ໃຫ້ລະອຽດຄົບຖ້ວນ; ເກັບກໍາຂໍ້ມູນຄວາມຕ້ອງການຕົວຈິງ ຂອງປະຊາຊົນ ໃນໄລຍະຮີບດ່ວນ, ໄລຍະສັ້ນ ແລະ ໄລຍະຍາວ; ເອົາໃຈໃສ່ເບີກຈ່າຍ ວັດຖຸສິ່ງຂອງ ໃຫ້ປະຊາຊົນ ເປັນປົກກະຕິ ສໍາຄັນແມ່ນເຮັດໃຫ້ຊີວິດການເປັນຢູ່ ຂອງປະຊາຊົນ ໄດ້ຮັບການປັບປຸງດີຂຶ້ນກວ່າເກົ່າ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ