ພິທີວາງສີລາລຶກໂຄງການກໍ່ສ້າງເສັ້ນທາງຄອນກຣີດອ້ອມດອນໂຂງ, ແຂວງຈໍາປາສັກ

ຜູ້ຂຽນ: ​ອາ​ນິ​ຄົມ ວົ​ງເດືອນ

ວັນຈັນ, 08 ຕ.ລ 2018 17:00

​​​​​​​​​​​​​​​​​​​​ ໃນຕອນເຊົ້າຂອງວັນທີ 06 ຕຸລາ 2018, ທີ່ ບ້ານກາງໂຂງ, ເມືອງໂຂງ, ແຂວງຈຳປາສັກ ໄດ້ມີພິທີວາງສີລາລືກໂຄງການກໍ່ສ້າງເສັ້ນທາງຄອນກຣີດອ້ອມດອນໂຂງ ໂດຍໃຫ້ກຽດເຂົ້າຮ່ວມເປັນສັກຂີພີຍານຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ; ມີທ່ານລັດຖະມົນຕີ, ທ່ານເຈົ້າແຂວງໆຈໍາປາສັກ; ທ່ານ ເຈີ້ງ ກວາງຝ້າຍ ປະທານບໍລິສັດຮ່ວມທຶນພັດທະນາສີທັນດອນ ຈໍາກັດ, ແຂກທີ່ຖືກເຊີນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
 
​​​​​​​​​​​​​​​​​​​​ ໂອກາດນີ້, ທ່ານ ບຸນຖອງ ດີວິໄຊ ເຈົ້າແຂວງໆຈໍາປາສັກ ໄດ້ກ່າວວ່າ: ໂຄງການພັດທະນາເສດຖະກິດໃໝ່ ສີທັນ ດອນ ເປັນໂຄງການໜຶ່ງທີ່ມີຄວາມສໍາຄັນຫຼາຍ ເພື່ອສ້າງໃຫ້ເປັນບ່ອນສ້າງລາຍຮັບທີ່ບໍ່ບົກແຫ້ງ, ມີຄວາມຍືນຍົງ ແລະ ຊ່ວຍກະຕຸ້ຊຸກຍູ້ເສດຖະກິດຂອງຊາດເວົ້າລວມ, ເວົ້າສະເພາະ ເສດຖະກິດຂອງແຂວງຈໍາປາສັກ ໃຫ້ມີການພັດທະນາ ແລະ ມີການຂະຫຍາຍຕົວຢ່າງຕໍ່ເນື່ອງ, ສິ່ງສໍາຄັນເປັນການຈັດຕັ້ງຜັນຂະຫຍາຍ ການຕົກລົງຂອງການນໍາຂັ້ນສູງສອງປະເທດ ກໍ່ຄື ປະຊາຊົນສອງຊາດ ລາວ-ຈີນ ໃຫ້ນັບມື້ນັບມີຜົນສໍາເລັດ ແລະມີປະສິດທິຜົນສູງ ເປັນກ້າວໆ. ໂຄງການດັ່ງກ່າວນີ້ ໄດ້ຮັບການເຊັນບົດບັນທຶກຄວາມເຂົ້າໃຈ ເພື່ອສຶກສາ ແລະ ສໍາຫຼວດ ໃນວັນທີ 30 ມິຖຸນາ 2017 ໂດຍແມ່ນບໍລິສັດ ກວາງດົງ ເຢນໂລ ອິນດັດສຕີ ຈໍາກັດ ກໍ່ຄື ບໍລິສັດຮ່ວມທຶນພັດທະນາ ສີທັນດອນ ຈໍາກັດ ເປັນຜູ້ສໍາປະທານ ມີອາຍຸສໍາປະທານ 50 ປີ (2018-2050), ໃນຈໍານວນເນື້ອທີ່ທັງໝົດ 9.846 ເຮັກຕາ, ປະກອບດ້ວຍ 6 ໄລຍະ, ມີຫຼາຍກິດຈະກໍາ, ລວມມູນຄ່າລົງ ທຶນທັງໝົດ 9 ຕື້ກວ່າໂດລາສະຫະລັດ. ຖ້າຫາກໂຄງການດັ່ງກ່າວ ໄດ້ຮັບການກໍ່ສ້າງສໍາເລັດ  ຄາດຄະເນຈະມີນັກທ່ອງທ່ຽວເຂົ້າມາບໍລິການທ່ອງທ່ຽວເຖິງ 15 ລ້ານເທື່ອຄົນຕໍ່ປີ, ຄາດຄະເນຈະສາມາດສ້າງລາຍຮັບໃຫ້ຂະແໜງການທ່ອງທ່ຽວເຖິງ 2,4 ຕື້ໂດລາສະຫະລັດ; ການພັດທະນາດ້ານອຸດສາຫະກໍາຕິດພັນກັບການປຸງແຕ່ງ, ການຄ້າ, ການຂົນສົ່ງ ແລະ ສ້າງມູນຄ່າເພີ່ມ ໃນຂະແໜງອຸດສາຫະກໍາ ໄດ້ 637 ລ້ານໂດລາສະຫະລັດຕໍ່ປີ, ຈະສາມາດເກັບລາຍຮັບເຂົ້າງົບປະມານລັດໄດ້ 170 ລ້ານໂດລາສະຫະລັດຕໍ່ປີ, ສາມາດສ້າງວຽກເຮັດງານທໍາໃຫ້ປະຊາຊົນແຂວງຈໍາປາສັກ ແລະ ແຂວງອ້ອມຂ້າງ ໂດຍສະ ເພາະ ປະຊາຊົນພາຍໃນເມືອງໂຂງ ແລະ ບັນດາເມືອງທີ່ຢູ່ໃກ້ຄຽງ ໄດ້ 32 ພັນກວ່າຕໍາແໜ່ງ ລາຍໄດ້ສະເລ່ຍຕໍ່າສຸດ 9.435 ໂດລາສະຫະລັດ ຕໍ່ຄົນຕໍ່ປີ. ບັນດາພື້ນຖານໂຄງລ່າງໄດ້ຮັບການພັດທະນາ ແລະ ຍົກລະດັບຂຶ້ນ ເປັນຕົ້ນ ຖະໜົນຫົນທາງ, ໂຮງ ຮຽນ, ໂຮງໝໍ, ສູນຝຶກອົບຮົມວິຊາຊີບ, ລະບົບບໍາບັດນໍ້າເປື້ອນ, ກໍາຈັດຂີ້ເຫຍື້ອ ລວມໄປເຖິງການປັບປຸງຊີວິດການເປັນຢູ່ຂອງປະຊາຊົນ ໃຫ້ໄດ້ຮັບການພັດທະນາ ແລະ ປັບປຸງດີຂຶ້ນກວ່າເກົ່າ.

​​​​​​​​​​​​​​​​​​​​ ສໍາລັບໂຄງການກໍ່ສ້າງເສັ້ນທາງອ້ອມດອນໂຂງ ກໍ່ເປັນກິດຈະກໍາໜຶ່ງທີ່ນອນໃນ 17 ກິດຈະກໍາ ຂອງໄລຍະທີ 1 ຂອງໂຄງການພັດທະນາໃໝ່ ສີທັນດອນ (2018-2025), ໂຄງການດັ່ງກ່າວ ເປັນໂຄງການຊ່ວຍເຫຼືອລ້າໃນມູນຄ່າ 25 ລ້ານໂດລາສະຫະລັດ ມີໄລຍະທາງຍາວ 43 ກມ ແລະ ຈະສຳເລັດການກໍ່ສ້າງໃນປີ 2020. ເສັ້ນທາງດັ່ງກ່າວ ຈະອີງໃສ່ໂຄງສ້າງພື້ນຖານເສັ້ນທາງທີ່ມີຢູ່ແລ້ວ ແຕ່ຈະສ້າງເປັນເສັ້ນທາງຄອນກຣີດທັງໝົດ ເພື່ອຮອງຮັບໃຫ້ແກ່ການເດີນທາງໄປມາ, ການຄ້າ, ການບໍລິການ, ການຂົນສົ່ງ ແລະ ການທ່ອງທ່ຽວ ໃນເຂດດັ່ງກ່າວ ຊຶ່ງຈະເປັນການດຶງດູດນັກທ່ອງທ່ຽວໃຫ້ເຂົ້າມາຫຼາຍຂຶ້ນ. ເພື່ອເຮັດໃຫ້ພິທີວາງສີລາເລີກໂຄງການກໍ່ສ້າງເສັ້ນທາງອ້ອມດອນໂຂງ ໃນຄັ້ງນີ້ ມີຄວາມໝາຍຄວາມສໍາຄັນທ່ານ ຮອງນາຍົກລັດຖະມົນຕີ ແລະ ບັນດາຜູ້ເຂົ້າຮ່ວມພິທີ ໄດ້ພ້ອມກັນຕັດແຖບຜ້າ ແລະ ລັ່ນຄ້ອງເກົ້າບາດ ຕື່ມອີກ.
​​​​​​​​​​​​​​​​​​​​ ພາຍຫຼັງທີ່ສໍາເລັດພິທີວາງສີລາເລີກໂຄງການດັ່ງກ່າວແລ້ວ, ທ່ານ ສອນໄຊ ສີພັນດອນ ໄດ້ໃຫ້ກຽດໂອ້ລົມ ແລະ ມີຄໍາເຫັນຊີ້ນໍາ ອໍານາດການປົກຄອງເມືອງ ແລະ ປະຊາຊົນພາຍໃນເມືອງ ໂດຍສະເພາະ ປະຊາຊົນທີ່ອາໃສຢູ່ໃນເຂດດັ່ງກ່າວ ເຂົ້າໃຈຕໍ່ແນວທາງນະໂຍບາຍຂອງ ພັກ-ລັດ ຕໍ່ການພັດທະນາປະເທດຊາດ ກໍ່ຄື ການຈັດຕັ້ງປະຕິບັດແຜນພັດທະນາເສດ ຖະກິດ-ສັງຄົມ ເວົ້າລວມ, ເວົ້າສະເພາະ ແມ່ນໂຄງການພັດທະນາໃໝ່ ສີທັນດອນ. ພ້ອມດຽວກັນນັ້ນ, ທ່ານຮອງນາຍົກ ລັດຖະມົນຕີ ຍັງໄດ້ເນັ້ນໜັກໃຫ້ອໍານາດການປົກຄອງທຸກຂັ້ນ ກໍ່ຄື ປະຊາຊົນ ໃຫ້ການຮ່ວມມື ແລະ ມີສ່ວນຮ່ວມ ເພື່ອເຮັດໃຫ້ໂຄງການດັ່ງກ່າວ ດໍາເນີນໄປຕາມຈຸດປະສົງ ແລະ ຄາດໝາຍທີ່ວາງໄວ້. ນອກນັ້ນ, ໃຫ້ເອົາໃຈໃສ່ນໍາໃຊ້ທ່າແຮງເພື່ອພັດທະນາທ້ອງຖິ່ນຂອງຕົນ ເປັນຕົ້ນ ການຊຸກຍູ້ສົ່ງເສີມການຜະລິດເປັນສິນຄ້າຂອງປະຊາຊົນ ໃຫ້ມີການຈັດຕັ້ງເປັນກຸ່ມການຜະລິດ; ສິນຄ້າຕ້ອງໄດ້ມາດຕະຖານ ແລະ ເປັນທີ່ຕ້ອງການຂອງຕະຫຼາດ ທັງພາຍໃນ ແລະ ຕ່າງປະເທດ; ຄົ້ນຄວ້າ ແລະ ຈັດສັນເນື້ອທີ່ທໍາການຜະລິດຂອງປະຊາຊົນຄືນໃໝ່ໃຫ້ເໝາະສົມ; ສຳລັບລະດູແລ້ງທີ່ຈະມາເຖິງນີ້ ໃຫ້ສຸມໃສ່ຜະລິດພືດຕ່າງໆເພື່ອທົດແທນ ແລະ ການຜະລິດເປັນສິນຄ້າເພື່ອສົ່ງອອກ ໂດຍສະເພາະ ການປູກເຂົ້າ; ໄປຄຽງຄູ່ກັບການສົ່ງເສີມວຽກງານການທ່ອງທ່ຽວ ຕິດພັບກັນກັບການບໍລິການ; ອີກວຽກໜຶ່ງທີ່ສໍາຄັນ ແມ່ນໃຫ້ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ ໃນທົ່ວສັງຄົມໃຫ້ມີຄວາມສະຫງົບປອດໄພ.

          ຈາກນັ້ນ, ທ່ານ ສອນໄຊ ສີພັນດອນ ພ້ອມດ້ວຍຄະນະ ຍັງໄດ້ໄປຢ້ຽມຢາມພື້ນຖານການຜະລິດຂອງປະຊາຊົນເມືອງໂຂງ, ແຂວງຈໍາປາສັກຕື່ມອີກ.


ແຫຼ່ງ: ກົມ​ປະ​ຊາ​ສຳ​ພັນ, ພະ​ແນກ​ໂຄ​ສະ​ນາ
ຂ່າວອື່ນໆ