ທ່ານ ສອນໄຊ ສີພັນດອນ ຕ້ອນຮັບຄະນະຜູ້ແທນສະມາຄົມມິດຕະພາບ ເຢຍລະມັນ-ລາວ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນພຸດ, 03 ຕ.ລ 2018 17:00

​​​​​​​​​​​​​​​​​​​ ໃນຕອນເຊົ້າ ຂອງວັນທີ 2 ຕຸລາ 2018 ທີ່ສຳນັກງານນາຍົກລັດຖະມົນຕີ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບ ຂອງຄະນະຜູ້ແທນ ສະມາຄົມມິດຕະພາບ  ເຢຍລະມັນ-ລາວ ນຳໂດຍທ່ານ ລຸດວິກ ນອຍເບີ  (Ludwig Neuber), ປະທານສະມາຄົມມິດຕະພາບ ເຢຍລະມັນ-ລາວ  ໃນໂອກາດເດີນທາງມາຢ້ຽມຢາມ ແລະ ເຄື່ອນໄຫວເຮັດວຽກ ຢູ່ ສປປ ລາວ. 

​​​​​​​​​​​​​​​​​​​ ໂອກາດດັ່ງກ່າວ,  ທ່ານຮອງນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ  ຕໍ່ການເດີນທາງມາຢ້ຽມຢາມ ສປປ ລາວ  ຂອງຄະນະຜູ້ແທນສະມາຄົມມິດຕະພາບ  ເຢຍລະມັນ-ລາວ, ເຊິ່ງເປັນການປະກອບສ່ວນສຳຄັນ ເຂົ້າໃນການເສີມສ້າງສາຍພົວພັນທີ່ມີມູນເຊື້ອ ລະຫວ່າງປະຊາຊົນສອງຊາດ  ເຢຍລະມັນ-ລາວ, ພ້ອມທັງ ຕີລາຄາຄືນ ການພົວພັນຮ່ວມມືລະຫວ່າງ  ລາວ ແລະ ເຢຍລະມັນ ໃນໄລຍະ 60 ປີຜ່ານມາ ຊຶ່ງອັນພົ້ນເດັ່ນ ແມ່ນການສ້າງພື້ນຖານໂຄງລ່າງ,  ການພັດທະນາຊັບພະຍາກອນມະນຸດ,  ກະສິກຳ,  ສາທາລະນະສຸກ, ສິ່ງແວດລ້ອມ ແລະ ອື່ນໆ  ອັນເປັນການປະກອບສ່ວນເຂົ້າ  ໃນພາລະກິດສ້າງສາ ປະເທດຊາດຂອງປະຊາຊົນລາວ ແລະ ໄດ້ສະແດງຄວາມຊົມເຊີຍ ຕໍ່ການພົວພັນຮ່ວມມື  ຂອງສະມາຄົມມິດຕະພາບ ຂອງ ທັງສອງປະເທດ  ທີ່ມີການເຄື່ອນໄຫວຢ່າງຫ້າວຫັນ  ໃນການເສີມສ້າງມິດຕະພາບລະຫວ່າງ ປະຊາຊົນລາວ-ເຢຍລະມັນ. ນອກຈາກນັ້ນ, ທ່ານຮອງນາຍົກລັດຖະມົນຕີ ຍັງສະເໜີ ໃນນາມຕາງໜ້າລັດຖະບານ ແຫ່ງ ສປປ ລາວ ແລະ ສ່ວນຕົວ ຈະສືບຕໍ່ໃຫ້ການສະໜັບສະໜູນ ເສີມສ້າງສາຍພົວພັນ ແລະ ການຮ່ວມມື ລະຫວ່າງ ສປປ ລາວ ແລະ ສະຫະພັນເຢຍລະມັນ ກໍ່ຄື ປະຊາຊົນລາວ ແລະ ປະຊາຊົນເຢຍລະມັນ ໃຫ້ນັບມື້ແໜ້ນແຟ້ນ ແລະ ເກີດດອກອອກຜົນເປັນກ້າວໆ.
​​​​​​​​​​​​​​​​​​​ ​ໃນໂອກາດດຽວກັນ, ທ່ານ ລຸດວິກ ນອຍເບີ ( Ludwig Neuber ກໍ່ໄດ້ສະແດງຄວາມຂອບໃຈ ຕໍ່ທ່ານຮອງນາຍົກລັດຖະມົນຕີ ທີ່ໄດ້ໃຫ້ການຕ້ອນຮັບອັນອົບອຸ່ນຄັ້ງນີ້,  ພ້ອມທັງ ແຈ້ງຈຸດປະສົງ ຂອງການເດີນທາງມາຢ້ຽມຢາມ ສປປ ລາວ,  ລາຍງານບັນດາກິດຈະກຳ ແລະ ຜົນສຳເລັດ ໃນການຈັດຕັ້ງປະຕິບັດບັນດາໂຄງການຊ່ວຍເຫຼືອ ສປປ ລາວ  ຂອງສະມາຄົມມິດຕະພາບ ເຢຍລະມັນ-ລາວ  ໃນໄລຍະຜ່ານມາ, ເຊິ່ງການມາຢ້ຽມຢາມເທື່ອນີ້  ຄະນະສະມາຄົມມິດຕະພາບ ເຢຍລະມັນ-ລາວ  ຈະໄດ້ໄປຢ້ຽມຢາມບັນດາໂຄງການກໍ່ສ້າງ  ທີ່ສະມາຄົມ ໄດ້ໃຫ້ການສະໜັບສະໜູນ  ຢູ່ແຂວງຊຽງຂວາງ, ໄຊສົມບູນ ແລະ ບາງແຂວງພາກໃຕ້  ຂອງ ສປປ ລາວ, ໂດຍສະເພາະເມືອງສະໜາມໄຊ  ແຂວງອັດຕະປື ເພື່ອເກັບກຳຂໍ້ມູນຜົນກະທົບ  ແລະ ຜົນເສຍຫາຍ  ທີ່ເກີດຈາກໄພພິບັດນ້ຳຖ້ວມ ເພື່ອນຳເອົາຂໍ້ມູນດັ່ງກ່າວ  ໄປລາຍງານຕໍ່ພາກສ່ວນທີ່ກ່ຽວຂ້ອງ ຂອງເຢຍລະມັນ  ເພື່ອວາງແຜນປະກອບສ່ວນໃຫ້ການຊ່ວຍເຫຼືອ  ໃນການຟື້ນຟູໃນຕໍ່ໜ້າ. ນອກຈາກນັ້ນ, ທ່ານ ລຸດວິກ ນອຍເບີ ຍັງໄດ້ກ່າວຢໍ້າ ເຖິງຄວາມສຳຄັນ ຂອງການສ້າງສາຍສຳພັນຮັກແພງ ແລະ ການພົວພັນຮ່ວມມື ໃນແຕ່ລະລະດັບ, ຊຶ່ງເປັນເງື່ອນໄຂໜຶ່ງທີ່ສຳຄັນ ໃນການປະກອບສ່ວນຊຸກຍູ້ວຽກງານດ້ານຕ່າງໆ ໃຫ້ມີຜົນສຳເລັດ.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ
ຂ່າວອື່ນໆ