ທ່ານຮອງນາຍົກລັດຖະມົນຕີ ເຂົ້າຮ່ວມ​ພິ​ທີສະເຫຼີມສະຫຼອງ ວັນຊາດ ສປ ຈີນ ຄົບຮອບ 69 ປີ

ຜູ້ຂຽນ: ​ອາ​ນິ​ຄົມ ວົ​ງເດື​ອນ, ນັດ​ນິ​ລັນ ສີ​ພັນ​ດອນ

ວັນອັງຄານ, 02 ຕ.ລ 2018 12:00


     ໃນຕອນຄ່ຳຂອງວັນທີ 1 ຕຸລາ 2018 ທີ່ໂຮງແຮມດອນຈັນພາດເລສ, ນະຄອນຫຼວງວຽງຈັນ, ສະຖານເອກອັກຄະລັດຖະທູດ ສປ ຈີນ ປະຈຳ ສປປ ລາວ ໄດ້ຈັດພິທີສະເຫຼີມສະຫຼອງ ວັນສະຖາປະນາ ສາທາລະນະລັດ ປະຊາຊົນຈີນ ຄົບຮອບ 69 ປີ (1 ຕຸລາ 1949-1 ຕຸລາ 2018), ໂດຍການໃຫ້ກຽດເຂົ້າຮ່ວມຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ມີທ່ານເຈົ້າຄອງນະຄອນຫຼວງວຽງຈັນ, ບັນດາການນໍາພັກ-ລັດ; ທ່ານເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສປ ຈີນ ປະຈໍາລາວ; ບັນດາທູຕານຸທູດ ແລະ ຜູ້ຕາງໜ້າຈາກອົງການຈັດຕັ້ງສາກົນ ເຂົ້າຮ່ວມ.
     ໂອກາດດັ່ງກ່າວ, ທ່ານ ຫວາງ ເວີນທ່ຽນ ເອກອັກຄະລັດຖະທູດຜູ້ມີອຳນາດເຕັມແຫ່ງ ສປ ຈີນ ປະຈໍາ ສປປ ລາວ ໄດ້ກ່າວວ່າ: ຕະຫຼອດໄລຍະ 69 ປີ ຜ່ານມາ ພາຍໃຕ້ການຊີ້ນໍາ-ນໍາພາຂອງພັກຄອມມູນິດຈີນ, ສປ ຈີນ ໄດ້ຜ່ານຜ່າຄວາມຫຍຸ້ງຍາກ ແລະ ສິ່ງທ້າທາຍຫຼາຍຢ່າງ ເຊິ່ງໄດ້ເຮັດໃຫ້ບັນລຸການພັດທະນາແບບກ້າວກະໂດດ ເຮັດໃຫ້ປະເທດຊາດກ້າວໄປສູ່ຄວາມຮັ່ງມີ ແລະ ເຂັ້ມແຂງຮອບດ້ານ. ສຳລັບສາຍພົວພັນຮ່ວມມື ລະຫວ່າງສອງຊາດ ຈີນ-ລາວ ກໍ່ໄດ້ຮັບການເສີມຂະຫຍາຍຕະຫຼອດມາ ໂດຍສະເພາະປະມຸກລັດຂອງສອງປະເທດ ໄດ້ພັດປ່ຽນກັນເຄື່ອນໄຫວຢ້ຽມຢາມເຊິ່ງກັນ ແລະ ກັນ ເຊິ່ງສະແດງອອກໃນເດືອນພະຈິກ ປີ 2017 ທ່ານ ສີ ຈິ້ນຜິງ ປະທານປະເທດ ແຫ່ງ ສປ ຈີນ ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແລະ ໃນເດືອນພຶດສະພາ ປີ 2018 ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ກໍ່ໄດ້ເດີນທາງໄປເຄື່ອນໄຫວຢ້ຽມຢາມ ສປ ຈີນ ຢ່າງເປັນທາງການ. ເຊິ່ງເຫັນໄດ້ວ່າ ຍາມໃດການນໍາສູງສຸດຂອງສອງປະເທດ ແມ່ນ​ໄດ້ເອົາໃຈໃສ່ໃນການເສີມຂະຫຍາຍ ສາຍພົວພັນຮ່ວມມືຂອງປະເທດ ສຳຄັນແມ່ນໄດ້ມີການຍົກລະດັບການພົວພັນຮ່ວມມື ກາຍເປັນຄູ່ຮ່ວມມືຍຸດທະສາດຮອບດ້ານ ທັງນີ້ກໍ່ເພື່ອນໍາຜົນປະໂຫຍດສູງສຸດມາສູ່ປະຊາຊົນສອງຊາດ ຈີນ-ລາວ ຢ່າງແທ້ຈິງ. 
     ປະຈຸບັນ ສປ ຈີນ ໄດ້ກາຍເປັນປະເທດລົງທຶນຫຼາຍທີ່ສຸດ ແລະ ຄູ່ການຄ້າອັນດັບທີ່ສອງຢູ່ລາວ. ໃນ 6 ເດືອນຕົ້ນປີ 2018, ການຄ້າຂາເຂົ້າ-ສົ່ງອອກ ລະຫວ່າງ ຈີນ-ລາວ ໄດ້ບັນລຸ 1,7 ຕື້ໂດລາສະຫະລັດ, ປະລິມານການລົງທຶນໂດຍກົງຈາກຈີນຕໍ່ລາວໄດ້ບັນລຸ 790 ລ້ານໂດລາສະຫະລັດ; ການກໍ່ສ້າງເສັ້ນທາງລົດໄຟ ຈີນ-ລາວ ໄດ້ສໍາເລັດ 20% ຂອງມູນຄ່າການລົງທຶນ; ເຂື່ອນໄຟຟ້ານໍ້າຕົກທີ່ລົງທຶນຈາກວິສາຫະກິດຈີນໄດ້ສໍາເລັດການກໍ່ສ້າງ ແລະ ເລີ່ມຜະລິດພະລັງໄຟຟ້າຕາມລໍາດັບ, ສາຍສົ່ງໄຟຟ້າຫຼາຍສາຍທີ່ລົງທຶນຈາກຝ່າຍຈີນ ໄດ້ເລີ່ມນໍາໃຊ້ແລ້ວ; ແລວເສດຖະກິດຈີນ-ລາວ ໄດ້ດໍາເນີນການກໍ່ສ້າງຢ່າງຕໍ່ເນື່ອງ; ການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ໄດ້ປະກອບກໍາລັງແຮງໃໝ່ເຂົ້າໃນການຮ່ວມມືຈີນ-ລາວ, ການແລກປ່ຽນທາງດ້ານວັດທະນະທໍາ ຈີນ-ລາວ ນັບມື້ນັບເຂົ້າສູ່ລວງເລິກ, ໃນປີ 2017 ມີນັກທ່ອງທ່ຽວຈີນເຂົ້າມາທ່ຽວລາວ ປະມານ 7,6 ແສນເທື່ອຄົນ, ​ສະ​ເພາະໃນໄຕມາດທີ 1 ​ຂອງປີ 2018 ນີ້, ມີນັກທ່ອງທ່ຽວຈີນ ເຂົ້າມາລາວຫຼາຍກ່ວາ 2 ແສນກວ່າຄົນ, ເມື່ອທຽບໃສ່ໄລຍະດຽວກັນເພີ່ມຂຶ້ນ 32%.


ແຫຼ່ງ: ຫ້ອງວ່າ​ການ​ສຳ​ນັກ​ງານ​ນາ​ຍົກ​ລັດ​ຖະ​ມົນ​ຕີ