ທ່ານນາຍົກລັດຖະມົນຕີ ຕ້ອນຮັບເລຂາທິການເວທີປົວອ້າວ ສຳລັບອາຊີ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນສຸກ, 28 ກ.ຍ 2018 18:00

​​​​​​​​​​​​​​​​​ ​ໃນຕອນທ່ຽງ ຂອງວັນທີ 28 ກັນຍາ 2018 ທີ່ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ ໄດ້ຕ້ອນຮັບການເຂົ້າຢ້ຽມ ຂອງທ່ານ ຫຼີ ປາວຕົ່ງ ເລຂາທິການເວທີປົວອ້າວ ສຳລັບອາຊີ ພ້ອມດ້ວຍຄະນະ ໃນໂອກາດ ມາຈັດ ແລະ ເຂົ້າຮ່ວມກອງປະຊຸມເວທີປົວອ້າວ ສຳລັບອາຊີ ຢູ່ ສປປ ລາວ ທີ່ຈັດຂຶ້ນໃນຕອນເຊົ້າ ຂອງວັນທີ 28 ກັນຍາ 2018.

​​​​​​​​​​​​​ ໃນໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ກ່າວສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ສາຍພົວພັນ ແລະ ການຮ່ວມມື ລະຫວ່າງ ລາວ ແລະ ຈີນ ຊຶ່ງແມ່ນປະເທດບ້ານໃກ້ເຮືອນຄຽງ, ມີສາຍພົວພັນ ແລະ ມູນເຊື້ອອັນດີງາມມາແຕ່ບູຮານນາການ, ໃນຊຸມປີຜ່ານມາ ການນໍາຂັ້ນສູງຂອງສອງປະເທດ ໄດ້ມີການໄປມາຫາສູ່ເຊິ່ງກັນ ແລະ ກັນ ເພື່ອຢ້ຽມຢາມ, ແລກປ່ຽນບົດຮຽນ, ເສີ່ມສ້າງສາຍພົວພັນຄູ່ຮ່ວມອຸດົມການ ແລະ ໃຫ້ຄວາມສຳຄັນໃນການສົ່ງເສີມການຮ່ວມມືຮອບດ້ານຂອງ ສອງປະເທດ. ພ້ອມດຽວກັນນີ້, ທ່ານນາຍົກລັດຖະມົນຕີ ຍັງໄດ້ກ່າວຊົມເຊີຍ ແລະ ຂອບໃຈ ທີ່ເລືອກຈັດກອງປະຊຸມປົວອ້າວ ທີ່ ສປປ ລາວ, ຊຶ່ງເປັນຄັ້ງທຳອິດ ແລະ ຈະເປັນນິມິດໝາຍອັນດີ ໃຫ້ແກ່ການສົ່ງເສີມການຮ່ວມມືເສດຖະກິດການຄ້າ ລະຫວ່າງ ລາວ-ຈີນ ໃຫ້ນັບມື້ນັບຂະຫຍາຍຕົວ, ເລິກເຊິ່ງ ແລະ ມີປະສິດທິຜົນ, ທັງເປັນການສ້າງເງື່ອນໄຂຊຸກຍູ້ໃຫ້ນັກລົງທຶນ ຈາກ ສປ ຈີນ ເຂົ້າມາດຳເນີນທຸລະກິດ ແລະ ລົງທຶນ ໃນ ສປປ ລາວ ຫຼາຍຂຶ້ນ, ປະກອບສ່ວນເຂົ້າໃນການພັດທະນາຂອງ ສປປ ລາວ, ໂດຍສະເພາະ ແມ່ນສ້າງເຄືອຂ່າຍດຳເນີນການຮ່ວມມື ກັບບໍລິສັດ ພາຍໃນຂອງ ລາວ ເຊິ່ງອາດລົງທຶນໃນຮູບແບບຕ່າງໆຕາມການຕົກລົງກັນ ເພື່ອພ້ອມກັນພັດທະນາ ແລະ ຕ່າງຝ່າຍຕ່າງໄດ້ຮັບຜົນປະໂຫຍດ. ນອກຈາກນັ້ນ, ທ່ານ ທອງລຸນ ສີສຸລິດ ຍັງໄດ້ແຈ້ງໃຫ້ທ່ານ ຫຼີ ປາວຕົງ ພ້ອມດ້ວຍຄະນະ ໄດ້ຮັບຊາບວ່າ: ສປປ ລາວ ຍັງມີທ່າແຮງໃນຂະແໜງການຕ່າງໆ ເຊັ່ນ: ພະລັງງານ, ອະສັງຫາລິມະສັບ, ກະສິກຳ, ທ່ອງທ່ຽວ, ອຸດສາຫະກຳ ແລະ ອື່ນໆ.
​​​​​​​​​​​​​ ​ໃນໂອກາດດຽວກັນ, ທ່ານ ຫຼີ ປາວຕົ່ງ ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານນາຍົກລັດຖະມົນຕີ ແລະ ພາກສ່ວນທີ່ກ່ຽວຂ້ອງ ຂອງ ສປປ ລາວ ໃນຄັ້ງນີ້. ພ້ອມທັງ ແຈ້ງໃຫ້ຊາບເຖິງ ຈຸດປະສົງ ແລະ ຜົນສຳເລັດເບື້ອງຕົ້ນ ຂອງການມາເຄື່ອນໄຫວເຮັດວຽກຢູ່ສປປ ລາວ ໂດຍສະເພາະ ການຈັດກອງປະຊຸມຢູ່ ສປປ ລາວ ໃນຄັ້ງນີ້.​


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ
ຂ່າວອື່ນໆ