ສະຫາຍ ທອງລຸນ ສີສຸລິດ ວາງພວງມາລາ ແລະ ຂຽນຄຳໄຫວ້ອາໄລ ຕໍ່ການເສຍຊີວິດຂອງສະຫາຍ ເຈິ່ນ ດ໋າຍ ກວາງ

ຜູ້ຂຽນ: ນັດນິລັນ

ວັນພຸດ, 26 ກ.ຍ 2018 17:00

​​​
     ໃນຕອນເຊົ້າ ຂອງວັນທີ 26 ກັນຍາ 2018 ​ທີ່ສະຖານເອກອັກຄະລັດຖະທູດຫວຽດນາມ ປະຈຳ ສປປ ລາວ, ສະຫາຍ ທອງລຸນ ສີສຸລິດ ກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ໄດ້ໄປວາງພວງ ມາລາ ແລະ ຂຽນປຶ້ມໄຫວອາໄລຕໍ່ການເສຍຊີວິດຂອງສະຫາຍ ເຈິ່ນ ດ໋າຍ ກວາງ ກຳມະການກົມກາເມືອງ ສູນກາງພັກຄອມມຸຍນິດຫວຽດນາມ, ປະທານປະເທດແຫ່ງ ສສ ຫວຽດນາມ.​
     ໃນໂອກາດດັ່ງກ່າວ, ສະຫາຍ ທອງລຸນ ສີສຸລິດ ພ້ອມດ້ວຍຄະນະ ໄດ້ວາງພວງມະລາ ແລະ ຢືນກົ້ມຫົວໄຫວ້ອາໄລ ພ້ອມທັງ ຂຽນປຶ້ມໄຫວ້ອາໄລ ຕໍ່ການເສຍຊີວິດຂອງສະຫາຍ ເຈິ່ນ ດ໋າຍ ກວາງ, ຊຶ່ງມີເນື້ອໃນ ຄື: "ຕາງໜ້າລັດຖະບານ ແຫ່ງ ສປປ ລາວ, ກໍ່ຄື ໃນນາມສ່ວນຕົວ, ຂ້າພະເຈົ້າ ຂໍສະແດງອາໄລຮັກຢ່າງສຸດຊຶ້ງ ຕໍ່ການຈາກໄປຢ່າງບໍ່ມີວັນກັບຄືນມາຂອງ ສະຫາຍ ເຈິ່ນ ດ໋າຍ ກວາງ, ກຳມະການກົມການເມືອງສູນກາງພັກ, ປະທານປະເທດແຫ່ງ ສສ ຫວຽດນາມ. ການຈາກໄປຂອງ ສະຫາຍ ເຈິ່ນ ດ໋າຍ ກວາງ ບໍ່ພຽງແຕ່ເປັນການສູນເສຍຜູ້ນຳທີ່ເຄົາລົບຮັກຂອງພັກ, ລັດ ແລະ ປະຊາຊົນ ຫວຽດນາມ ແຕ່ຍັງເປັນການສູນເສຍເພື່ອນມິດສະຫາຍທີ່ໃກ້ຊິດ ແລະ ສະໜິດສະໜົມທີ່ສຸດ ຂອງພັກ, ລັດ ແລະ ປະຊາຊົນລາວ ອີກດ້ວຍ.
     ຕະຫຼອດໄລຍະຊີວິດເຄື່ອນໄຫວປະຕິວັດຂອງຕົນ, ສະຫາຍ ເຈິ່ນ ດ໋າຍ ກວາງ ໄດ້ປະກອບສ່ວນຢ່າງຢ່າງຕັ້ງໜ້າ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຂອງ ສສ ຫວຽດນາມ, ກໍ່ຄືໃນການເສີ່ມຂະຫຍາຍສາຍພົວພັນມິດຕະ ພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມຮອບດ້ານ ລະຫວ່າງ ລາວ ແລະ ຫວຽດນາມ ໃຫ້ນັບມື້ນັບຂຽວສົດງົດງາມ.
     ລັດຖະບານແຫ່ງ ສປປ ລາວ ຂໍສະແດງຄວາມອາໄລອາວອນ ຢ່າງສຸດຊຶ້ງ ແລະ ຂໍແບ່ງເບົາຄວາມທຸກໂສກມາຍັງ ພັກ, ລັດຖະບານ ແຫ່ງ ສສ ຫວຽດນາມ ແລະ ປະຊາຊົນຫວຽດນາມ ອ້າຍນ້ອງ ໂດຍສະເພາະ ຕໍ່ຄອບຄົວ, ຍາດຕິພີ່ນ້ອງ ແລະ ເພື່ອນມິດຂອງ ສະຫາຍ ເຈິ່ນ ດ໋າຍ ກວາງ ມານະໂອກາດນີ້ດ້ວຍ.
     ຂໍໃຫ້ດວງວິນຍານຂອງ ສະຫາຍ ເຈິ່ນ ດ໋າຍ ກວາງ ຈົ່ງໄປສູ່ສຸຂະຕິ ດ້ວຍເຖິ້ນ".​



ແຫຼ່ງ: ກົມ​ປະ​ຊາ​ສຳ​ພັນ, ພະ​ແນກ​ໂຄ​ສະ​ນາ