ທ່ານຮອງນາຍົກລັດຖະມົນຕີ ຊຸກຍູ້ການຟື້ນຟູເມືອງສະໜາມໄຊ ໃຫ້ກັບຄືນສູ່ປົກກະຕິໂດຍໄວ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນອັງຄານ, 25 ກ.ຍ 2018 13:00

     ໃນວັນທີ 24 ກັນຍາ 2018 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກໍາມະການສະເພາະກິດ ແກ້ໄຂໄພພິບັດລະດັບຊາດ ພ້ອມດ້ວຍຄະນະ ໄດ້ໄປເຄື່ອນໄຫວຕິດຕາມ, ກວດກາ ແລະ ຊຸກຍູ້ ການກໍ່ສ້າງພື້ນຖານໂຄງລ່າງ ຕິດພັນກັບການຊ່ວຍເຫຼືອ ຟື້ນຟູຊີວິດການເປັນຢູ່ຂອງປະຊາຊົນ ທີ່ໄດ້ຮັບຜົນກະທົບຈາກໄພພິບັດນໍ້າຖ້ວມ ຢູ່ເມືອງສະໜາມໄຊ, ແຂວງອັດຕະປື.
     ໃນໂອກາດນີ້, ທ່ານ ສອນໄຊ ສີພັນດອນ ພ້ອມຄະນະ ໄດ້ໄປກວດກາເບິ່ງຈຸດທີ່ຈະສ້າງຂົວຂ້າມຫວ້ຍຊອຍ, ຊຶ່ງຕັ້ງຢູ່ຫ່າງຈາກເທດສະບານເມືອງສະໜາມໄຊ ໄປທາງເມືອງປາກຊ່ອງ ປະມານ 20 ກິໂລແມັດ, ຄາດວ່າຈະສ້າງເປັນຂົວເຫຼັກ, ມີຄວາມຍາວປະມານ 50 ແມັດ, ແຕ່ໃນຕົວຈິງ ຍັງຈະຕ້ອງໄດ້ມີການສຳຫຼວດ ແລະ ອອກແບບລະອຽດຕື່ມ. ຈາກນັ້ນ, ທ່ານຮອງນາຍົກລັດຖະມົນຕີ ກໍ່ໄດ້ໄປຕິດຕາມກວດກາເບິ່ງຄວາມຄືບໜ້າ ໃນການບຸກເບີກພື້ນທີ່ກໍ່ສ້າງເຮືອນພັກຊົ່ວຄາວ ແລະ ຖາວອນໃຫ້ແກ່ປະຊາຊົນ ຜູ້ປະສົບເຄາະຮ້າຍນໍ້າຖ້ວມ ຢູ່ຈຸດບ້ານ ຕະມໍຢອດ, ດອນບົກ ແລະ ປິ່ນດົງ. ໃນນັ້ນ ແມ່ນໄດ້ໄປກວດກາເບິ່ງການກໍ່ສ້າງ ແລະ ຕິດຕັ້ງເຮືອນພັກຊົ່ວຄາວ ແບບສຳເລັດຮູບ ຢູ່ຈຸດບ້ານຕະມໍຢອດ ທີ່ມີແຜນການກໍ່ສ້າງຈຳນວນ 175 ຫຼັງ, ປະຈຸບັນ ສໍາເລັດການກໍ່ສ້າງໄປແລ້ວ ຈຳນວນ 20 ຫຼັງ, ຄາດວ່າຈະສຳເລັັດ ໃນທ້າຍເດືອນຕຸລາ 2018. 

     ໃນໂອກາດດຽວກັນ, ທ່ານຮອງນາຍົກລັດຖະມົນຕີ ກໍ່ໄດ້ໄປຢ້ຽມຢາມ ແລະ ພົບປະໂອ້ລົມກັບປະຊາຊົນ ທີ່ພັກເຊົາຊົ່ວຄາວຢູ່ບ້ານຕະມໍຢອດ ແລະ ບ້ານດອນບົກ  ໂດຍໄດ້ສະແດງຄວາມເປັນຫ່ວງເປັນໃຍເຖິງ ສະພາບການດໍາລົງຊີວິດຂອງເຂົາເຈົ້າ ເປັນຕົ້ນ ການຊ່ວຍເຫຼືອຂອງພາກສ່ວນທີ່ກ່ຽວຂ້ອງ, ການປະຕິບັດນະໂຍບາຍຕ່າງໆ, ການມີສ່ວນຮ່ວມຂອງປະຊາຊົນ, ການຊອກຢູ່ຫາກິນຕາມທຳມະຊາດ, ລວມທັງ ບັນຫາສຸຂະພາບ, ການກິນຢູ່, ພັກ-ເຊົາ, ການສຶກສາຮໍ່າຮຽນຂອງລູກຫຼານ, ພ້ອມດຽວກັນນັ້ນ, ທ່ານກໍ່ຍັງໄດ້ຮັບຟັງຄວາມຄິດເຫັນ ແລະ ຂໍ້ສະເໜີຕ່າງໆ ຈາກປະຊາຊົນ ໂດຍສະແດງຄວາມເຊື່ອໝັ້ນວ່າ ພາຍໃຕ້ການນຳຂອງພັກ-ລັດຖະບານ, ຄວາມເປັນເຈົ້າການ ຂອງອົງການປົກຄອງທຸກຂັ້ນ ແລະ ການມີສ່ວນຮ່ວມ ໃນທົ່ວສັງຄົມ ຈະເຮັດໃຫ້ຊີວິດການເປັນຢູ່ຂອງປະຊາຊົນ ນັບມື້ດີຂຶ້ນເປັນກ້າວໆ ແລະ ເຮັດໃຫ້ພາບການຕ່າງໆ ກັບຄືນສູ່ປົກກະຕິໂດຍໄວ. ນອກຈາກນີ້, ທ່ານຮອງນາຍົກລັດຖະມົນຕີ ຍັງໄດ້ຮຽກຮ້ອງໃຫ້ອົງການປົກຄອງແຂວງ, ເມືອງ ແລະ ບ້ານ ເອົາໃຈໃສ່ຕິດຕາມກວດກາ ແລະ ສະໜອງເຄື່ອງໃຊ້ສອຍທີ່ຈຳເປັນ ໃນການດຳລົງຊີວິດປະຈຳວັນ ໃຫ້ແກ່ປະຊາຊົນ; ເອົາໃຈໃສ່ສ້າງກິດຈະກຳຕ່າງໆ ໃຫ້ປະຊາຊົນໄດ້ມີສ່ວນຮ່ວມຫຼາຍຂຶ້ນ. ພ້ອມນີ້ ກຳລັງ ປກສ-ປກຊ ກໍ່ຕ້ອງໄດ້ຍົກສູງສະຕິລະວັງຕົວ ຕໍ່ກົນອຸບາຍຂອງກຸ່ມຄົນບໍ່ດີ ທີ່ຫວັງແບ່ງແຍກຄວາມສາມັກຄີພາຍໃນ, ການໃສ່ຮ້າຍປ້າຍສີ ແລະ ປະກົດການຫຍໍ້ທໍ້ຕ່າງໆ ທີ່ອາດເກີດຂຶ້ນ.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ