ທ່ານຮອງນາຍົກລັດຖະມົນຕີ ຕ້ອນຮັບຄະນະຜູ້ແທນຈາກແຂວງໂອກິນາວາ ປະເທດຢີ່ປຸ່ນ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນສຸກ, 21 ກ.ຍ 2018 16:00

​​​​​​​​​​​​ ​ໃນຕອນເຊົ້າຂອງວັນທີ 21 ກັນຍາ 2018 ທີ່ສໍານັກງານນາຍົກລັດຖະມົນຕີ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບ ຂອງທ່ານ Prof. Dr. Hajime SUNAKAWA ຄະນະຜູ້ແທນທິມງານ ໂຄງການປ້ອງກັນສຸຂະພາບຜົ້ງປາກ ແລະ ແຂ້ວ ສູນຊ່ວຍເຫຼືອຄົນເຈັບສົບແຫວ່ງ, ເພດານໂຫວ່ໂອກິນາວາ-ລາວ ມະຫາວິທະຍາໄລລີວຄີວ, ແຂວງໂອກີນາວາ, ປະເທດຢີ່ປຸ່ນ ໃນໂອກາດມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 14-22 ກັນຍາ 2018.
              

​​​​​​​​​ ໃນໂອກາດດ່ັງກ່າວ, ທ່ານ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການເດີນທາງມາຢ້ຽມຢາມ ສປປລາວ ຂອງທ່ານ Prof. Dr. Hajime SUNAKAWA ພ້ອມດ້ວຍຄະນະ ໃນຄັ້ງນີ້, ຊຶ່ງເປັນການປະກອບສ່ວນເພີ່ມພູນຄູນສ້າງ ສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດ ລາວ-ຢີ່ປຸ່ນ ກໍຄື ປະຊາຊົນທັງສອງຊາດ ລາວ-ຢີ່ປຸ່ນ ທີ່ເຄີຍມີມາແລ້ວນັ້ນ ໄດ້ຮັບການພັດທະນາ ແລະ ສືບຕໍ່ການສະໜັບສະໜູນ ຊ່ວຍເຫຼືອເຊິ່ງກັນ ແລະ ກັນຕະຫຼອດໄປ ໂດຍສະເພາະແມ່ນການພົວພັນຮ່ວມມື ທາງດ້ານວຽກງານສາທາລະນະສຸກ ຂອງສອງປະເທດ ໃຫ້ໄດ້ຮັບການປັບປຸງດີຂຶ້ນໄປເລື່ອຍໆ. ພ້ອມກັນນັ້ນ ທ່ານຮອງນາຍົກລັດຖະມົນຕີ ຍັງໄດ້ກ່າວສະແດງຄວາມຂອບໃຈ ຕໍ່ຄະນະທິມງານ ທີ່ໄດ້ປະກອບສ່ວນເຂົ້າໃນການຊ່ວຍເຫຼືອ ແລະ ປິ່ນປົວສຸຂະພາບຂອງປະຊາຊົນລາວ ໃນຕະຫຼອດໄລຍະເຄື່ອນໄຫວເຮັດວຽກຢູ່ ສປປ ລາວ ໃນຄັ້ງນີ້ ແລະ ຫວັງວ່າຈະສືບຕໍ່ໄດ້ຮັບການສະໜັບສະໜູນຊ່ວຍເຫຼືອຕື່ມອີກ ໃນອະນາຄົດ.
​​​​​​​​​ ​ໃນໂອກາດດຽວກັນ, ທ່ານ Prof. Dr. Hajime SUNAKAWA ໄດ້ຕາງໜ້າຄະນະ ກ່າວສະແດງຄວາມຂອບໃຈ ຕໍ່ທ່ານ ສອນໄຊ ສີພັນດອນ ທີ່ໄດ້ສະຫຼະເວລາອັນມີຄ່າ ໃຫ້ການຕ້ອນຮັບຢ່າງອົບອຸ່ນ ພ້ອມທັງ ໄດ້ແຈ້ງຈຸດປະສົງຂອງການມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ໃຫ້ທ່ານຮອງນາຍົກລັດຖະມົນຕີ ຮັບຊາບ.

ແຫລ່ງ: ຫ້ອງວ່າການສໍານັກງານນາຍົກລັດຖະມົນຕີ