ທ່ານນາຍົກ ຕ້ອນຮັບຜູ້ບັນຊາການທະຫານສູງສຸດ ກຳປູເຈຍ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນພະຫັດ, 20 ກ.ຍ 2018 11:00

​​​​​​​​​​​​ ໃນຕອນບ່າຍ ຂອງວັນທີ 19 ກັນຍາ 2018 ທີ່ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງທ່ານ ພົນເອກ ວົງ ປີເຊນ ຜູ້ບັນຊາການທະຫານສູງສຸດ ແຫ່ງ ຣາຊະອານາຈັກກຳປູເຈຍ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຄື່ອນໄຫວເຮັດວຽກຢູ່ ສປປ ລາວ ໃນລະຫວ່າງ ວັນທີ 19-21 ກັນຍາ 2018.

​​​​​​​​​​ ໃນໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງທ່ານ ພົນເອກ ວົງ ປີເຊນ ໃນຄັ້ງນີ້, ຊຶ່ງເປັນການຮັດແໜ້ນສາຍພົວພັນ ແລະ ການຮ່ວມມື ຂອງສອງກອງທັບ ກໍ່ຄື ສອງປະເທດ ລາວ ແລະ ກຳປູເຈຍ ໃຫ້ນັບມື້ດີຂຶ້ນເປັນກ້າວໆ. ພ້ອມທັງ ຊົມເຊີຍ ຕໍ່ທ່ານ ພົນເອກ ວົງ ປີເຊນ ທີ່ໄດ້ຮັບການແຕ່ງຕັ້ງ ເປັນຜູ້ບັນຊາການທະຫານສູງສຸດຄົນໃໝ່ ຂອງຣາຊະອານາຈັກກຳປູເຈຍ. ນອກຈາກນັ້ນ, ທ່ານ ທອງລຸນ ສີສຸລິດ ຍັງໄດ້ກ່າວຢໍ້າຄືນ ແລະ ສະເໜີໃຫ້ກອງທັບ ຂອງສອງປະເທດ ນຳເອົາຜົນການປຶກສາຫາລື ເພື່ອແກ້ໄຂບັນຫາຊາຍແດນ ລະຫວ່າງສອງປະເທດ ທີ່ຍັງເປັນເຂດຄົງຄ້າງມິດຕະພາບ ທີ່ນາຍົກລັດຖະມົນຕີ ແຫ່ງ ສປປ ລາວ ແລະ ນາຍົກລັດຖະມົນຕີ ແຫ່ງ ຣາຊະອານາຈັກກຳປູເຈຍ ໄດ້ຕົກລົງ ແລະ ຖະແຫຼງຂ່າວຮ່ວມກັນ ໃນໂອກາດເຂົ້າຮ່ວມກອງປະຊຸມເວທີປຶກສາຫາລືເສດຖະກິດໂລກ ທີ່ນະຄອນຫຼວງຮ່າໂນ້ຍ ສສ ຫວຽດນາມ ໃນຕົ້ນເດືອນກັນຍາ 2018 ໄປຈັດຕັ້ງຜັນຂະຫຍາຍ ໃຫ້ປະກົດຜົນເປັນຈິງ ໂດຍສະເພາະ ຕໍ່ເນື້ອໃນທີ່ສຳຄັນ ອັນໜຶ່ງ ບໍ່ໃຫ້ມີກອງທັບທະຫານ, ສອງ ບໍ່ໃຫ້ມີປະຊາຊົນຢູ່ທີ່ນັ້ນ, ສາມ ຕ້ອງລາດຕະເວນຮ່ວມກັນ. ຊຶ່ງການຕົກລົງດັ່ງກ່າວນັ້ນ ເປັນການສ້າງຄວາມໄວ້ເນື້ອເຊື່ອໃຈໃຫ້ແກ່ກັນ ແລະ ກັນ ກໍ່ຄື ສ້າງຄວາມອຸ່ນໃຈໃຫ້ແກ່ປະຊາຊົນທັງສອງປະເທດ, ເປັນເງື່ອນໄຂອັນດີໃຫ້ສອງລັດຖະບານ ສືບຕໍ່ຮ່ວມມືກັນສ້າງໃຫ້ຊາຍແດນ ເປັນຊາຍແດນສັນຕິພາບ-ການຮ່ວມມື ຢ່າງແທ້ຈິງ. ນອກນັ້ນ, ສອງກອງທັບ ຍັງຈະຕ້ອງສືບຕໍ່ເອົາໃຈໃສ່ຮ່ວມມືກັນ ໃນການຕ້ານ ແລະ ສະກັດກັ້ນ ປະກົດການຫຍໍ້ທໍ້ຕ່າງໆ ເປັນຕົ້ນ ຢາເສບຕິດ, ການຄ້າມະນຸດ, ບັນຫາອາຊະຍາກຳ, ການຄ້າອາວຸດ ຕະຫຼອດຮອດ ການລັກລອບຂຸດຄົ້ນຊັບພະຍາກອນທຳມະຊາດ, ລວມທັງ ການຮ່ວມມືກັນ ເພື່ອປ້ອງກັນ ແລະ ຄວບຄຸມໄພພິບັດຕ່າງໆ.
​​​​​​​​​​ ​ໃນໂອກາດດຽວກັນ, ທ່ານ ພົນເອກ ວົງ ປີເຊນ ໄດ້ກ່າວສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານນາຍົກລັດຖະມົນຕີ ແລະ ກະຊວງປ້ອງກັນປະເທດ ແຫ່ງ ສປປ ລາວ, ພ້ອມທັງ ແຈ້ງຈຸດປະສົງ ຂອງການມາຢ້ຽມຢາມ ແລະ ເຄື່ອນໄຫວເຮັດວຽກຢູ່ ສປປ ລາວ ໃນຄັ້ງນີ້ ໃຫ້ທ່ານນາຍົກລັດຖະມົນຕີ ຮັບຊາບ.
       

ແຫລ່ງ: ຫ້ອງວ່າການສໍານັກງານນາຍົກລັດຖະມົນຕີ
ຂ່າວອື່ນໆ