ທ່ານນາຍົກລັດຖະມົນຕີ ຕ້ອນຮັບຄະນະຜູ້ແທນສະພາ ສ. ເກົາຫຼີ

ຜູ້ຂຽນ: ບີ່​ໂຟ໋ ນັນ​ທະ​ວົງ

ວັນພະຫັດ, 13 ກ.ຍ 2018 18:00

​​ໃນຕອນເຊົ້າຂອງວັນທີ 10 ກັນຍາ 2018 ທີ່ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບ ຂອງທ່ານ ນ. ປາກ ຊຸນ ຈາ ກໍາມະການຄະນະປະຈໍາ, ປະທານກໍາມາທິການ ໂຍທາທິການ-ຂົນສົ່ງ, ປະທານຄະນະມິດຕະພາບລັດຖະສະພາ ເກົາຫຼີ-ລາວ ພ້ອມດ້ວຍຄະນະ ໃນໂອກາດເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນລະຫວ່າງວັນທີ 8-10 ກັນຍາ 2018 ນີ້. 

ກ່ອນອື່ນ, ທ່ານນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບທ່ານ ນ. ປາກ ຊຸນ ຈາ ພ້ອມດ້ວຍຄະນະ ເຊິ່ງເຊື່ອວ່າ ຈະເປັນນິດໝາຍສໍາຄັນ ໃນການເພີ່ມທະວີ ໃຫ້ແກ່ສາຍພົວພັນມິດຕະພາບ ຂອງສອງປະເທດ ເວົ້າລວມ, ເວົ້າສະເພາະ ແມ່ນສອງຂົງເຂດວຽກງານສະພາ ກໍ່ຄື ການໄປມາຫາສູ່ຂອງປະຊາຊົນ, ລັດຖະບານ ສອງປະເທດ ສປປ ລາວ- ສ. ເກົາຫຼີ ໃຫ້ນັບມື້ຫຼາຍຂຶ້ນ. 
ໃນໂອກາດນີ້, ທ່ານ ນ. ປາກ ຊຸນ ຈາ ກໍ່ໄດ້ສະແດງຄວາມຂອບໃຈເປັນຢ່າງຍິ່ງ ຕໍ່ທ່ານນາຍົກລັດຖະມົນຕີ ທີ່ໄດ້ໃຫ້ການຕ້ອນຮັບອັນອົບອຸ່ນ, ພ້ອມດຽວກັນນີ້, ທ່ານ ນ. ປາກ ຊຸນ ຈາ ຍັງໄດ້ນໍາເອົາຄວາມຢ້ຽມຢາມຖາມຂ່າວຈາກທ່ານ ນາຍົກລັດຖະມົນຕີ ສ. ເກົາຫຼີ ມາຍັງທ່ານນາຍົກລັດຖະມົນຕີ ສປປ ລາວ ພ້ອມທັງ ເຊື່ອໝັ້ນຕໍ່ການບໍລິຫານປະເທດຊາດ ຂອງລັດຖະບານ ສປປ ລາວ ຈະສືບຕໍ່ເຮັດໃຫ້ເສດຖະກິດພາຍໃນປະເທດ ໄດ້ຮັບການພັດທະນາ ແລະ ຂະຫຍາຍຕົວຢ່າງຕໍ່ເນື່ອງ ຄຽງຄູ່ກັນນັ້ນ, ໃນນາມປະທານ ຄະນະມິດຕະພາບລັດຖະສະພາ ເກົາຫຼີ-ລາວ ຍັງເຊື່ອໝັ້ນວ່າ ສ. ເກົາຫຼີ ແລະ ສປປ ລາວ ຈະເປັນປະເທດເພື່ອນມິດ ທີ່ຮ່ວມກັນແລກປ່ຽນບົດຮຽນ, ປະສົບການ, ການພົວພັນຮ່ວມມື ຫຼາຍຂົງເຂດວຽກງານ ແລະ ຢືນຢັນວ່າ ຈະສືບຕໍ່ຊຸກຍູ້ ເພີ່ມທະວີການພົວພັນຮ່ວມມື ຂອງສອງສະພາ ໃຫ້ນັບມື້ນັບແໜ້ນແຟ້ນຂຶ້ນເລື້ອຍໆ ແລະ ກ້າວເຂົ້າສູ່ລວງເລິກຕົວຈິງຫຼາຍຂຶ້ນ. ໃນໂອກາດເດີນທາງມາເຄື່ອນໄຫວເຮັດວຽກຢູ່ ສປປ ລາວ ຄັ້ງນີ້, ທ່ານ ນ. ປາກ ຊຸນ ຈາ ຍັງໄດ້ສະແດງຄວາມເສຍໃຈ ຕໍ່ເຫດການໄພພິບັດທີ່ບໍ່ຄາດຄິດ ເກີດຂຶ້ນຢູ່ເມືອງສະໜາມໄຊ, ແຂວງອັດຕະປື ໂດຍແມ່ນບໍລິສັດເກົາຫຼີ ເປັນຜູ້ພັດທະນາໂຄງການດັ່ງກ່າວ ແລະ ຫວັງວ່າ ພາຍໃຕ້ການຊີ້ນໍາຂອງລັດຖະບານລາວ ຈະເຮັດໃຫ້ຜູ້ທີ່ໄດ້ຮັບຜົນກະທົບຈາກເຫດການດັ່ງກ່າວ ໄດ້ຮັບການຟື້ນຟູຊີວິດການເປັນຢູ່ໂດຍໄວ.
ໃນໂອກາດດຽວກັນ, ທ່ານນາຍົກລັດຖະມົນຕີ ຍັງເຊື່ອໝັ້ນວ່າທ່ານ ນ. ປາກ ຊຸນ ຈາ ຈະສືບຕໍ່ຊຸກຍູ້, ສະໜັບສະໜູນ, ການພົວພັນຮ່ວມມື ຂອງສອງລັດຖະບານ, ການມາເຂົ້າມາລົງທຶນ ຢູ່ ສປປ ລາວ ຂອງນັກທຸລະກິດເກົາຫຼີ, ການຮ່ວມມືທາງດ້ານເສດຖະກິດ ເຊິ່ງເປັນທ່າແຮງໃນການປະກອບສ່ວນ ເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ໄປພ້ອມໆກັບການສົ່ງເສີມ ການທ່ອງທ່ຽວຂອງສອງປະເທດ ໃຫ້ສືບຕໍ່ດໍາເນີນໄປດ້ວຍດີ ແລະ ນັບມື້ນັບຫຼາຍຂຶ້ນ. ທ່ານນາຍົກລັດຖະມົນຕີ ຍັງຖືໂອກາດນີ້ ຝາກຄວາມຢ້ຍມຢາມຖາມຂ່າວ ແລະ ສະແດງຄວາມຂອບໃຈ ຜ່ານທ່ານ ນ. ປາກ ຊຸນ ຈາ ໄປເຖິງທ່ານ ນາຍົກລັດຖະມົນຕີ ແລະ ປະທານາທິບໍດີ ສ. ເກົາຫຼີ ທີ່ຍາມໃດກໍ່ໄດ້ເອົາໃຈໃສ່ຊຸກຍູ້, ສົ່ງເສີມນັກທຸລະກິດມາລົງທຶນ ຢູ່ ສປປ ລາວ ລວມທັງ ຊຸກຍູ້ນັກທ່ອງທ່ຽວເກົາຫຼີ ມາທ່ຽວລາວນັບມື້ນັບຫຼາຍຂຶ້ນ. ຄຽງຄູ່ກັນນັ້ນ, ຍັງໄດ້ຊ່ວຍເຫຼືອ ສປປ ລາວ ໃນຂົງເຂດວຽກງານຕ່າງໆ ເປັນຕົ້ນ: ຂົງເຂດໂຍທາທິການ-ຂົນສົ່ງ, ສຶກສາ, ສາທາລະນະສຸກ... ເຊິ່ງບັັນດາການຊ່ວຍເຫຼືອເຫຼົ່ານັ້ນ ສາມາດເວົ້າໄດ້ວ່າ ລ້ວນແລ້ວແຕ່ມີປະສິດທິຜົນສູງ ແລະ ຕອບສະໜອງຕາມຄວາມຮຽກຮ້ອງຕ້ອງການ ໃນການພັດທະນາເສດຖະກິດ ຂອງ ສປປ ລາວ ເວົ້າລວມ, ເວົ້າສະເພາະ ສາມາດຕອບສະໜອງ ໃນການແກ້ໄຂຊີວິດການເປັນຢູ່ ຕິດພັນກັບການແກ້ໄຂຄວາມທຸກຍາກ ຂອງປະຊາຊົນລາວ. ອີກເທື່ອໜຶ່ງ ທ່ານນາຍົກລັດຖະມົນຕີ ຍັງໄດ້ສະແດງຄວາມຂອບໃຈຢ່າງຈິງໃຈ ຕໍ່ລັດຖະບານ ແລະ ປະຊາຊົນ ສ. ເກົາຫຼີ ທີ່ໄດ້ໃຫ້ການສະໜັບສະໜູນ, ຊ່ວຍເຫຼືອທາງດ້ານທຶນຮອນ ແລະ ສົ່ງອາສາສະໝັກ ມາເຮັດວຽກຮ່ວມກັບພາກສ່ວນທີ່ກ່ຽວຂ້ອງຂອງລາວ.
​ໃນໂອກາດພົບປະກັນຄັ້ງນີ້, ທ່ານ ທອງລຸນ ສີສຸລິດ ແລະ ທ່ານ ນ. ປາກ ຊຸນ ຈາ ຍັງໄດ້ຮ່ວມກັນປຶກສາຫາລື ບັນຫາທີ່ພົ້ນເດັ່ນ ແລະ ບັນຫາທີ່ສອງຝ່າຍ ຕ່າງມີຄວາມສົນໃຈ ຢູ່ໃນພາກພື້ນ ແລະ ສາກົນຕື່ມອີກ. 

ແຫລ່ງ: ຫ້ອງວ່າການສໍານັກງານນາຍົກລັດຖະມົນຕີ
ຂ່າວອື່ນໆ