ທ່ານຮອງນາຍົກລັດຖະມົນຕີ ຕ້ອນຮັບຄະນະຊ່ຽວຊານສາກົນດ້ານສັງຄົມ ແລະ ສິ່ງແວດລ້ອມ ປະຈໍາໂຄງການນໍ້າເທີນ 2

ຜູ້ຂຽນ: ​ອາ​ນິ​ຄົມ ວົ​ງເດືອນ

ວັນສຸກ, 06 ກ.ລ 2018 18:00

ໃນຕອນບ່າຍຂອງວັນທີ 6 ກໍລະກົດ 2018 ຢູ່ທີ່ສໍານັກງານນາຍົກລັດຖະມົນຕີ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ເດວິດ ແມັກໂດແວນ ຫົວໜ້າຄະນະຊ່ຽວຊານສາກົນດ້ານສັງຄົມ ແລະ ສິ່ງແວດລ້ອມ ປະຈໍາໂຄງການນໍ້າເທີນ 2 (POE) ພ້ອມດ້ວຍຄະນະ ໃນໂອກາດທີ່ເດີນທາງມາປະຕິບັດໜ້າທີ່ຢູ່ ສປປ ລາວ ແຕ່ວັນທີ 21 ມິຖຸນາ ຫາ 2 ກໍລະກົດ 2018.
ກ່ອນອື່ນ ທ່ານ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການຈັດຕັ້ງປະຕິບັດໂຄງການນໍ້າເທີນ 2 ຕະຫຼອດມາ ເຊິ່ງໄດ້ປະກອບສ່ວນສໍາຄັນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ໃຫ້ມີການຂະຫຍາຍຕົວຢ່າງຕໍ່ເນື່ອງຕະຫຼອດມາ ໂດຍສະເພາະແມ່ນການຍົກຍ້າຍຈັດສັນ ແລະ ປັບປຸງຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບຈາກໂຄງການດັ່ງກ່າວ ໃຫ້ນັບມື້ນັບດີຂຶ້ນ. ສໍາລັບຈຸດປະສົງຂອງການເຂົ້າຢ້ຽມ ຂໍ່ານັບ ຂອງຄະນະຊ່ຽວຊານສາກົນດ້ານສັງຄົມ ແລະ ສິ່ງແວດລ້ອມ ປະຈໍາໂຄງການນໍ້າເທີນ 2 ໃນຄັ້ງນີ້ ເພື່ອລາຍງານການປະເມີນຄືນ ຜົນສໍາເລັດບັນດາກິດຈະກໍາຄົງຄ້າງທີ່ໄດ້ສືບຕໍ່ຈັດຕັ້ງປະຕິບັດ ແຕ່ເດືອນ ມັງກອນ 2018 ເປັນຕົ້ນມາ ຕາມການຕົກລົງຮ່ວມກັນ ລະຫວ່າງ ຄະນະຊ່ຽວຊານ POE, ສະຖາບັນການເງິນສາກົນ, ລັດຖະບານ ສປປ ລາວ ແລະ ບໍລິສັດໄຟຟ້ານໍ້າເທີນ 2 ວ່າຈະປະຕິບັດບັນດາໜ້າວຽກສໍາຄັນ ທີ່ໄດ້ລະບຸໄວ້ໃນຂໍ້ກໍານົດ ແລະ ເງື່ອນໄຂວຽກງານຍົກຍ້າຍຈັດສັນໃຫ້ສໍາເລັດ ພາຍໃນ 6 ເດືອນຕົ້ນປີ 2018 ຈຶ່ງຈະສາມາດປະກາດປິດແຜນງານຍົກຍ້າຍຈັດສັນ ຢ່າງເປັນທາງການ.
ໂອກາດດັ່ງກ່າວ, ທ່ານ ເດວິດ ແມັກໂດແວນ ພ້ອມດ້ວຍຄະນະ ໄດ້ສະແດງຄວາມຂອບໃຈຕໍ່ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ທີ່ໄດ້ເສຍສະຫຼະເວລາອັນມີຄ່າ ໃຫ້ການຕ້ອນຮັບໃນຄັ້ງນີ້ ພ້ອມທັງຢັ້ງຢືນຕື່ມວ່າຈະສືບຕໍ່ໃຫ້ການປະສານສົມທົບ ​ກັບພາກສ່ວນທີ່ກ່ຽວຂ້ອງ ເພື່ອເຮັດໃຫ້ໂຄງການດັ່ງກ່າວ ສໍາເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້.

ແຫລ່ງ: ຫ້ອງວ່າການສໍານັກງານນາຍົກລັດຖະມົນຕີ
ຂ່າວອື່ນໆ