ທ່ານນາຍົກລັດຖະມົນຕີ ເນັ້ນໜັກໃຫ້ນັກທຸລະກິດລາວ ຕ້ອງເປັນເຈົ້າການ ແລະ ຫັນປ່ຽນດ້ວຍຕົນເອງຫຼາຍຂຶ້ນ

ຜູ້ຂຽນ: ​ອາ​ນິ​ຄົມ ວົ​ງເດືອນ

ວັນສຸກ, 06 ກ.ລ 2018 17:00

     ໃນຕອນເຊົ້າຂອງວັນທີ 05 ກໍລະກົດ 2018 ຢູ່ທີ່ໂຮງແຮມດອນຈັນພາເລັດ, ນະຄອນຫຼວງວຽງຈັນ ໄດ້ຈັດກອງປະຊຸມທຸລະກິດລາວ ຄັ້ງທີ 11 ຂຶ້ນ, ໂດຍການເປັນປະທານຂອງ ທ່ານ ນ. ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ, ໃຫ້ກຽດເຂົ້າຮ່ວມຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ, ມີບັນດາທ່ານລັດຖະມົນຕີ, ບັນດາທູຕານຸທູດ, ປະທານສະພາການຄ້າ ແລະ ອຸດສາຫະກໍາ ແຫ່ງຊາດລາວ, ບັນດາຜູ້ປະກອບການນັກທຸລະກິດ ທັງພາຍໃນ ແລະ ຕ່າງປະເທດ ເຂົ້າຮ່ວມຢ່າງພ້ອມພຽງ.
     ໃນໂອກາດກ່າວເປີດກອງປະຊຸມ ທ່ານ ນ. ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ ໄດ້ລາຍງານໃຫ້ຊາບວ່າ: ພາຍຫຼັງທີ່ສໍາເລັດການຈັດກອງປະຊຸມທຸລະກິດລາວ ຄັ້ງທີ່ 10 ກະຊວງອຸດສາຫະກໍາ ແລະ ການຄ້າ ໄດ້ປະສານສົມທົບກັບສະພາການຄ້າ ແລະ ອຸດສາຫະກໍາແຫ່ງຊາດລາວ ໄດ້ຈັດຕັ້ງຜັນຂະຫຍາຍແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 1194/ຫສນຍ.ກຄສ, ລົງວັນທີ 09/08/2017 ກ່ຽວກັບທິດຊີ້ນໍາຕໍ່ການແກ້ໄຂ 4 ບັນຫາທີ່ກອງປະຊຸມທຸລະກິດລາວ ຄັ້ງທີ 10 ໄດ້ຍົກຂຶ້ນ. ພ້ອມດຽວກັນນັ້ນ, ຍັງໄດ້ສືບຕໍ່ປຶກສາຫາລື ລະຫວ່າງ ພາກລັດ ແລະ ພາກເອກະຊົນຢ່າງຕໍ່ເນື່ອງ ລວມທັງມີການປຶກສາຫາລືຂັ້ນແຂວງ, ເຊິ່ງໃນໄລຍະໜຶ່ງປີຜ່ານມາ ສາມາດຍາດໄດ້ຜົນສໍາເລັດໃນຫຼາຍດ້ານ ເປັນຕົ້ນ ໄດ້ຮັບຮອງ ແລະ ຈັດຕັ້ງປະຕິບັດແຜນພັດທະນາວິສາຫະກິດຂະໜາດນ້ອຍ ແລະ ຂະໜາດກາງ (SMEs) ໄລຍະໃໝ່ ໃນນັ້ນ ລວມມີ ການຈັດຕັ້ງປະຕິບັດໂຄງການສົ່ງເສີມການເຂົ້າຫາແຫຼ່ງທຶນໄລຍະຍາວ, ສ້າງກອງທຶນເພື່ອໃຫ້ການຊ່ວຍເຫຼືອ ທາງດ້ານວິຊາການແກ່ທຸລະກິດ, ການຈັດຝຶກອົບຮົມ ແລະ ໃຫ້ຄໍາປຶກສາຕໍ່ ວິສາຫະກິດຂະໜາດນ້ອຍ ແລະ ຂະໜາດກາງ; ໄດ້ປັບປຸງສະພາບແວດລ້ອມໃນການດໍາເນີນທຸລະກິດ ພົ້ນເດັ່ນແມ່ນການຈັດຕັ້ງຜັນຂະຫຍາຍ ຄໍາສັ່ງຂອງທ່ານນາຍົກລັດຖະມົນຕີ ສະບັບເລກທີ 02/ນຍ ວ່າດ້ວຍການປັບປຸງລະບຽບການ ແລະ ກົນໄກປະສານງານ ໃນການດໍາເນີນທຸລະກິດ ຢູ່ ສປປ ລາວ ໂດຍສະເພາະແມ່ນ ການປັບປຸງຕົວຊີ້ວັດໃນການກໍ່ຕັ້ງທຸລະກິດ ແລະ ຕົວຊີ້ວັດການຄ້າຂ້າມແດນ; ໄດ້ມີການສົ່ງເສີມການເຊື່ອມໂຍງທາງດ້ານເສດຖະ ກິດກັບພາຍນອກ. 
     ສຳລັບກອງປະຊຸມທຸລະກິດລາວ ຄັ້ງທີ 11 ໃນຄັ້ງນີ້, ໄດ້ນໍາເອົາ 03 ເອກະສານສໍາຄັນ ເພື່ອປຶກສາຫາລືກັນ ເປັນຕົ້ນ 1). ອາກອນສໍາລັບທຸລະກິດ; 2). ການອໍານວຍຄວາມສະດວກດ້ານການຄ້າ ແລະ ການຂົນສົ່ງໃນ ສປປ ລາວ ແລະ 3). ບັນດາອຸປະສັກຕໍ່ການພັດທະນາວຽກງານການທ່ອງທ່ຽວ.
     ໂອກາດເຂົ້າຮ່ວມກອງປະຊຸມ ໃນຄັ້ງນີ້, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ມີຄໍາເຫັນຊີ້ນໍາ ແລະ ເນັ້ນໜັກຕໍ່ຂະແໜງການທີ່ກ່ຽວຂ້ອງ ໂດຍສະເພາະແມ່ນບັນດານັກທຸລະກິດ, ຜູ້ປະກອບການ ໃຫ້ເອົາໃຈໃສ່ເປັນຕົ້ນ ສືບຕໍ່ປຶກ ສາຫາລືກົນໄກໃນການພົບປະ ແລະ ພັດທະນາທຸລະກິດ ລະຫວ່າງ ພາກລັດ ແລະ ພາກທຸລະກິດ ໃຫ້ດີຂຶິ້ນ; ປັບປຸງສະພາການຄ້າ ແລະ ອຸດສາຫະກໍາແຫ່ງຊາດລາວຢູ່ສູນກາງ ແລະ ທ້ອງຖິ່ນ; ໃຫ້ຂະແໜງການທີ່ກ່ຽວຂ້ອງປະສານສົມ ທົບກັນ ເພື່ອຍົກລະດັບການພັດທະນາສະພາການຄ້າ ໃຫ້ໄປສູ່ຕ່າງປະເທດໃຫ້ຫຼາຍຂຶ້ນ, ເອົາໃຈໃສ່ປັບປຸງກົນໄກການບໍລິຫານໃຫ້ວ່ອງໄວ, ໂປ່ງໃສ ແລະ ທະລຸໂລ່ງ ໂດຍຕິດພັນກັບການປະຕິບັດນະໂຍບາຍ 03 ເປີດຂອງລັດຖະບານ ຄື: ເປີດປະຕູ, ເປີດສິ່ງກີດຂວາງ ແລະ ເປີດໃຈ; ປະຕິບັດກົນໄກຜ່ານປະຕູດຽວ. ສຳຄັນແມ່ນບັນດານັກທຸລະກິດ-ຜູ້ປະ ກອບການ ຕ້ອງເປັນເຈົ້າຕົນເອງ, ບຸກບືນຜ່ານຜ່າຄວາມຫຍຸ້ງຍາກ ແລະ ຫັນປ່ຽນດ້ວຍຕົນເອງ ຕາມກົນໄກເສດຖະກິດຕະຫຼາດ ໃຫ້ຫຼາຍຂຶ້ນ.


ແຫລ່ງ: ກົມ​ປະ​ຊາ​ສຳ​ພັນ, ພະ​ແນກ​ໂຄ​ສະ​ນາ