ທ່ານນາຍົກລັດຖະມົນຕີ ຕ້ອນຮັບປະທານຜູ້ຈັດການອົງການພັດທະນາພະລັງງານໃໝ່ຍີ່ປຸ່ນ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນພະຫັດ, 05 ກ.ລ 2018 13:00

​​ໃນຕອນບ່າຍ ຂອງວັນທີ 4 ກໍລະກົດ 2018 ທີ່ ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂ່ຳນັບ ຂອງທ່ານ Yoshiteru SATO, ປະທານຜູ້ຈັດການອົງການພັດທະນາພະລັງງານໃໝ່ ແລະ ເຕັກໂນໂລຊີອຸດສາຫະກໍາ ແຫ່ງ ປະເທດຍີ່ປຸ່ນ (NEDO) ພ້ອມດ້ວຍຄະນະ.

ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ການມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ຂອງທ່ານ Yoshiteru SATO ພ້ອມດ້ວຍຄະນະ ໃນຄັ້ງນີ້. ພ້ອມທັງ ສະແດງຄວາມຂອບໃຈ ຕໍ່ການຊ່ວຍເຫຼືອ ໃນໂຄງການກໍ່ສ້າງສູນດາຕ໋າ ເຊັນເຕີ (Data Center) ໃຫ້ແກ່ກະຊວງວິທະຍາສາດ ແລະ ເຕັກໂນໂລຊີ ແຫ່ງ ສປປ ລາວ ລວມທັງ ການຊ່ວຍເຫຼືອດ້ານອື່ນໆ, ເຊິ່ງເປັນການຊ່ວຍເຫຼືອທີ່ມີປະສິດທິຜົນ ແລະ ສອດຄ່ອງກັບຄວາມຮຽກຮ້ອງຕ້ອງການ ໃນການພັດທະນາຢ່າງແທ້ຈິງ, ອັນກາຍເປັນສ່ວນສຳຄັນ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ໃນປະຈຸບັນ ກໍ່ຄື ອະນາຄົດ ໂດຍສະເພາະ ໃນເງື່ອນໄຂ ການຫັນເປັນອຸດສາຫະກຳ ແລະ ທັນສະໄໝ ຂອງ ສປປ ລາວ ໃຫ້ນັບມື້ປະກົດຜົນເປັນຈິງ. ນອກຈາກນັ້ນ, ທ່ານນາຍົກລັດຖະມົນຕີ ຍັງສະເໜີໃຫ້ພາກສ່ວນທີ່ກ່ຽວຂ້ອງ ຂອງຍີ່ປຸ່ນ ສືບຕໍ່ໃຫ້ການຊ່ວຍເຫຼືອແກ່ ສປປ ລາວ ຕື່ມອີກ ໂດຍສະເພາະ ການສ້າງບຸກຄະລະກອນ ໃນການຄຸ້ມຄອງ ແລະ ນຳໃຊ້ສູນດາຕ໋າ ເຊັນເຕີ ດັ່ງກ່າວ ໃຫ້ສາມາດສືບຕໍ່ດຳເນີນໄປຢ່າງມີປະສິດທິຜົນ, ປອດໄພ, ນຳໃຊ້ໄດ້ຢ່າງຍາວນານ ແລະ ເກີດປະໂຫຍດສູງສຸດ.
​ໃນໂອກາດດຽວກັນ, ທ່ານ Yoshiteru SATO ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານນາຍົກຍົກລັດຖະມົນຕີ ແຫ່ງ ສປປ ລາວ. ພ້ອມທັງ ນຳສະເໜີໃຫ້ທ່ານນາຍົກລັດຖະມົນຕີ ໄດ້ຮັບຊາບຕື່ມ ກ່ຽວກັບ ຈຸດປະສົງ ແລະ ຜົນສຳເລັດ ໃນການມາຢ້ຽມຢາມ ແລະ ເຄື່ອນໄຫວເຮັດວຽກຢູ່ ສປປ ລາວ ໃນຄັ້ງນີ້.


ແຫລ່ງ: ຫ້ອງວ່າການສໍານັກງານນາຍົກລັດຖະມົນຕີ
ຂ່າວອື່ນໆ