ທ່ານນາຍົກລັດຖະມົນຕີ ຕ້ອນຮັບການນຳກະຊວງພາຍໃນ ສສ ຫວຽດນາມ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນພະຫັດ, 05 ກ.ລ 2018 13:00

​​​ໃນຕອນບ່າຍ ຂອງວັນທີ 4 ກໍລະກົດ 2018 ທີ່ ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂ່ຳນັບ ຂອງທ່ານ ເລ ວິ້ງ ເຕິນ  ລັດຖະມົນຕີກະຊວງພາຍໃນ ແຫ່ງ ສສ ຫວຽດນາມ ພ້ອມດ້ວຍຄະນະ.

ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ການມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ຂອງທ່ານ ເລ ວິ້ງ ເຕິນ ພ້ອມດ້ວຍຄະນະ ໃນຄັ້ງນີ້, ເຊິ່ງເປັນການປະກອບສ່ວນ ເສີມສ້າງສາຍພົວພັນສາມັກຄີພິເສດ ແລະ ການຮ່ວມມືຮອບດ້ານ ທີ່ເປັນມູນເຊື້ອ ຂອງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ຈະເລີນງອກງາມ ແລະ ແຕກດອກອອກຜົນເປັນກ້າວໆ ເວົ້າລວມ, ເວົ້າສະເພາະ ກໍ່ແມ່ນການພົວພັນຮ່ວມມື ຂອງກະຊວງພາຍໃນ ລາວ ແລະ ຫວຽດນາມ ນັບມື້ນັບແໜ້ນແຟ້ນ, ທັງມີຄວາມໜັກແໜ້ນ-ເຂັ້ມແຂງ ຢ່າງບໍ່ຢຸດຢັ້ງ ແລະ ກາຍເປັນເສນາທິການທີ່ດີ ໃນການບໍລິຫານລັດ ໃຫ້ແກ່ລັດຖະບານ ຂອງສອງປະເທດ. ພ້ອມດຽວກັນນັ້ນ, ທ່ານນາຍົກລັດຖະມົນຕີ ຍັງໄດ້ສະແດງຄວາມຂອບໃຈ ຕໍ່ການສະໜັບສະໜູນຊ່ວຍເຫຼືອ ຂອງຝ່າຍຫວຽດນາມ ເຂົ້າໃນການພັດທະນາດ້ານຕ່າງໆ ຂອງ ສປປ ລາວ ເປັນຕົ້ນ: ການຖ່າຍທອດບົດຮຽນ-ເຕັກນິກວິຊາການ, ການພັດທະນາຊັບພະຍາກອນມະນຸດ, ການພັດທະນາພື້ນຖານໂຄງລ່າງ ວຽກງານການປົກຄອງ ແລະ ອື່ນໆ. ນອກຈາກນັ້ນ, ທ່ານຍັງໄດ້ກ່າວໃຫ້ການສະໜັບສະໜູນ ການຈັດຕັ້ງປະຕິບັດບັນດາເນື້ອໃນ ກໍ່ຄື ບົດບັນທຶກ ກອບການຮ່ວມມືສອງຝ່າຍ ຂອງຂະແໜງການພາຍໃນ ສອງປະເທດ. ໃນຕອນທ້າຍ, ທ່ານຍັງໄດ້ຝາກຄວາມຢ້ຽມຢາມຖາມຂ່າວ ໄປຍັງທ່ານນາຍົກລັດຖະມົນຕີ ແລະ ການນຳຂັ້ນສູງ ຂອງ ສສ ຫວຽດນາມ ຕື່ມອີກ.
​ໃນໂອກາດດຽວກັນ, ທ່ານລັດຖະມົນຕີກະຊວງພາຍໃນ ແຫ່ງ ສສ ຫວຽດນາມ ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານນາຍົກຍົກລັດຖະມົນຕີ ແຫ່ງ ສປປ ລາວ ໃນຄັ້ງນີ້. ພ້ອມທັງ ນຳສະເໜີໃຫ້ທ່ານນາຍົກລັດຖະມົນຕີ ໄດ້ຮັບຊາບ ກ່ຽວກັບ ສະພາບການຈັດຕັ້ງປະຕິບັດວຽກງານ ຂອງກະຊວງພາຍໃນ ແຫ່ງ ສສ ຫວຽດນາມ ໂດຍສະເພາະ ບັນດາວຽກງານທີ່ກຳລັງສຸມໃສ່ປັບປຸງໃນປະຈຸບັນ ກໍ່ຄື ອະນາຄົດ ເພື່ອເຮັດໃຫ້ໂຄງປະກອບກົງຈັກການຈັດຕັ້ງ ແລະ ພະນັກງານ ໃນການບໍລິຫານລັດ ມີຄວາມກະທັດຮັດ, ມີປະສິດທິຜົນ… ລວມທັງ ການບໍລິຫານ ແລະ ຄຸ້ມຄອງລັດ ໄປສູ່ທັນສະໄໝ, ຕະຫຼອດຮອດ ແຜນການພົວພັນຮ່ວມມື ຂອງກະຊວງພາຍໃນ ແຫ່ງ ສສ ຫວຽດນາມ ແລະ ສປປ ລາວ ທີ່ຈະນຳເຂົ້າພິຈາລະນາຮັບຮອງ ໃນກອງປະຊຸມ ຄະນະກຳມາທິການ ຮ່ວມມືຫວຽດນາມ-ລາວ, ລາວ-ຫວຽດນາມ ທີ່ຈະຈັດຂຶ້ນໃນຕໍ່ໜ້າ.​


ແຫລ່ງ: ຫ້ອງວ່າການສໍານັກງານນາຍົກລັດຖະມົນຕີ
ຂ່າວອື່ນໆ