ເປີດການນໍາໃຊ້ສາຍສົ່ງ ແລະ ສະຖານີ 230 ກິໂລໂວນ ຫີນເຫີບ-ນໍ້າງື່ມ 1-ນາບົງ ຢ່າງເປັນທາງການ

ຜູ້ຂຽນ: ​ອາ​ນິ​ຄົມ ວົ​ງເດືອນ

ວັນພຸດ, 04 ກ.ລ 2018 17:00

ໃນວັນທີ 4 ກໍລະກົດ 2018, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ໃຫ້ກຽດເຂົ້າຮ່ວມພິທີ ເປີດການນໍາໃຊ້ສາຍສົ່ງ ແລະ ສະຖານີ 230 ກິໂລໂວນ ຫີນເຫີບ-ນໍ້າງື່ມ 1-ນາບົງ ຢ່າງເປັນທາງການ. ພິທີ່ດັ່ງກ່າວໄດ້ຈັດຂຶ້ນຢູ່ທີ່ ບ້ານແສງສະຫວ່າງ, ເມືອງແກ້ວອຸດົມ, ແຂວງວຽງຈັນ, ໂດຍການໃຫ້ກຽດຕ້ອນຮັບຂອງ ທ່ານ ບຸນສອນ ເພັດລາວັນ ຮອງເຈົ້າແຂວງໆວຽງຈັນ, ມີບັນດາທ່ານຮອງລັດຖະມົນຕີ, ທ່ານທູດເສດຖະກິດ ແລະ ການຄ້າ ສປ ຈີນ ປະຈໍາລາວ, ແຂກຖືກເຊີນ ພ້ອມດ້ວຍ ພາກສ່ວນທີ່ກ່ຽວຂ້ອງ ເຂົ້າຮ່ວມເປັນສັກຂີພິຍານ.
ໂອກາດກ່າວເປີດພິທີ, ທ່ານ ຄໍາມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ລາຍງານໃຫ້ຊາບວ່າ: ໂຄງການກໍ່ສ້າງສາຍສົ່ງ 230 ກິໂລໂວນ ຫີນເຫີບ-ນໍ້າງື່ມ 1-ນາບົງ ເປັນໂຄງການໜຶ່ງທີ່ໄດ້ກໍານົດໄວ້ໃນບູລິມະສິດ ໃນການພັດທະນາຂອງລັດຖະບານ ກໍ່ຄື ລັດວິສາຫະກິດໄຟຟ້າລາວ. ຈຸດປະສົງຂອງໂຄງການ ແມ່ນເພື່ອຮອງຮັບພະລັງງານຈາກບັນດາເຂື່ອນພາກເໜືອ ແລະ ພາກກາງ ໂດຍສະເພາະ ເຂື່ອນໄຟຟ້ານໍ້າງື່ມ 1 ແລະ ເຂື່ອນໄຟຟ້ານໍ້າງື່ມ 1 ພາກຂະຫຍາຍ ເພື່ອຕອບສະໜອງໃຫ້ແກ່ການຊົມໃຊ້ໄຟຟ້າ ຢູ່ພາຍໃນແຂວງວຽງຈັນ ແລະ ນະຄອນຫຼວງວຽງຈັນ ພ້ອມທັງ ເຊື່ອໂຍງກັບລະບົບສາຍສົ່ງໄຟຟ້າພາກໃຕ້ ແລະ ເຊື່ອມໂຍງກັບລະບົບສາຍສົ່ງຂອງປະເທດໃກ້ຄຽງ ທີ່ຈຸດສະຖານີ ນາບົງ ແລະ ສະຖານີດົງໂພສີ. ເຊິ່ງໂຄງການດັ່ງກ່າວ ໄດ້ຮັບການເຊັນສັນຍາກໍ່ສ້າງ ລະຫວ່າງ ລັດວິສາຫະກິດໄຟຟ້າລາວ ແລະ ບໍລິສັດ China Nation Heavy Machinery Corporation ເປັນຜູ້ຮັບເໝົາກໍ່ສ້າງ ແລະ ໄດ້ເລີ່ມ ດໍາເນີນການກໍ່ສ້າງໃນວັນທີ 24 ພຶດສະພາ 2015 ແລະ ສໍາເລັດການກໍ່ສ້າງໃນວັນທີ 22 ພຶດສະພາ 2018, ໃຊ້ເວລາໃນການກໍ່ສ້າງ 36 ເດືອນ, ມູນຄ່າການກໍ່ສ້າງທັງໝົດແມ່ນ 191 ລ້ານກວ່າໂດລາສະຫະລັດ ໂດຍແມ່ນທຶນກູ້ຢືມຈາກທະນາຄານ ສົ່ງອອກ-ນໍາເຂົ້າ ສປ ຈີນ. ສໍາລັບການກໍ່ສ້າງສາຍສົ່ງ 230 ກິໂລໂວນ ຈາກສະຖານີໄຟຟ້າຫີນເຫີບ ຫາ ສະຖານີ ໄຟຟ້ານໍ້າງື່ມ1, 02 ວົງຈອນ ແມ່ນມີຄວາມຍາວ 32 ກິໂລແມັດ ແລະ ຈາກສະຖານີ ໄຟຟ້ານໍ້າງື່ມ 1 ຫາສະຖານີ ນາບົງ 02 ວົງຈອນ ແມ່ນມີຄວາມຍາວທັງໝົດ 58 ກິໂລແມັດ. ພ້ອມດຽວກັນນີ້, ໂຄງການດັ່ງກ່າວ ຍັງໄດ້ຈ່າຍຄ່າຊົດເຊີຍໃຫ້ຄອບຄົວ ກໍ່ຄື ປະຊາຊົນຜູ້ທີ່ໄດ້ຮັບຜົນກະທົບ ຈາກໂຄງການດັ່ງກ່າວ ກວມເອົາສອງແຂວງ ມີຈໍານວນ 41 ບ້ານ, 338 ຄອບຄົວ ລວມມູນຄ່າຊົດເຊີຍທັງໝົດ 2 ຕື້ກວ່າກີບ.
ໂອກາດເຂົ້າຮ່ວມພິທີໃນຄັ້ງນີ້, ທ່ານ ສອນໄຊ ສີພັນດອນ ໄດ້ໃຫ້ກຽດຕັດແຖບຜ້າ, ລັ່ນຄ້ອງເກົ້າບາດ ແລະ ເປີດການນໍາໃຊ້ສະຖານີສາຍສົ່ງ ແລະ ສະຖານີ 230 ກິໂລໂວນ ຫີນເຫີບ-ນໍ້າງື່ມ 1-ນາບົງ ຢ່າງເປັນທາງການ. ພ້ອມດຽວກັນນີ້, ທ່ານຮອງນາຍົກລັດຖະມົນຕີ ພ້ອມດ້ວຍຄະນະ ຍັງໄດ້ໄປຢ້ຽມຢາມເຂື່ອນໄຟຟ້ານໍ້າງື່ມ 1 ແລະ ເຂື່ອນໄຟຟ້ານໍ້າງື່ມ 1 ພາກຂະຫຍາຍ ຕື່ມອີກ.


ແຫລ່ງ: ຫ້ອງວ່າການສໍານັກງານນາຍົກລັດຖະມົນຕີ
ຂ່າວອື່ນໆ