ທ່ານນາຍົກລັດຖະມົນຕີ ຕ້ອນຮັບຮອງປະທານປະເທດ ຫວຽດນາມ

ຜູ້ຂຽນ: ​ອາ​ນິ​ຄົມ ວົ​ງເດືອນ

ວັນພຸດ, 20 ມິ.ຖ 2018 13:00

​​ .
        ໃນວັນທີ 19 ມິຖຸນາ 2018 ຢູ່ທີ່ ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ, ໄດ້ໃຫ້ກຽດຕ້ອນຮັບ ທ່ານ ນ. ດັ້ງ ຖິ ຫງ໋ອກ ທິ້ງ ຮອງປະທານປະເທດ ແຫ່ງ ສສ ຫວຽດນາມ ພ້ອມດ້ວຍຄະນະ ເນື່ອງໃນໂອກາດທີ່ເດີນທາງມາເຄື່ອນໄຫວຢ້ຽມຢາມ ສປປ ລາວ ຢ່າງເປັນທາງການເປັນຄັ້ງທຳອິດ ພາຍຫຼັງທີ່ໄດ້ຮັບຕຳແໜ່ງເປັນຮອງປະທານປະເທດ ແຫ່ງ ສສ ຫວຽດນາມ ເປັນຕົ້ນມາ.
ກ່ອນອື່ນ, ທ່ານ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການເດີນທາງມາຢ້ຽມຢາມ ໃນຄັ້ງນີ້ ເຊິ່ງເປັນການນຳເອົາໄມຕີຈິດມິດຕະພາບ ແຫ່ງສາຍພົວພັນ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ກໍ່ຄື ປະຊາຊົນສອງຊາດ ລາວ-ຫວຽດນາມ ທີ່ມີມາແຕ່ດົນນານແລ້ວນັ້ນໃຫ້ແໜ້ນແຟ້ນຍິ່ງໆຂຶ້ນ, ທັງເປັນການກະຕຸກຊຸກຍູ້ ການພົວພັນຮ່ວມມືຂອງສອງປະເທດ ໃຫ້ເກີດໝາກເກີດຜົນຕົວຈິງ. ນອກນັ້ນ, ທ່ານນາຍົກລັດຖະມົນຕີ ຍັງໄດ້ສະແດງຄວາມຍ້ອງຍໍຊົມເຊີຍ ຕໍ່ບັນດາຜົນສຳເລັດທີ່ລັດຖະບານ ກໍ່ຄື ປະຊາຊົນ ຫວຽດນາມສາມາດຍາດມາໄດ້ ພາຍໃຕ້ການນຳພາອັນຖືກຕ້ອງຂອງພັກກອມມູນິດຫວຽດນາມ ໃນໄລຍະທີ່ຜ່ານມາ. ພ້ອມດຽວກັນນີ້, ທ່ານນາຍົກລັດຖະມົນຕີ ໄດ້ຕີລາຄາສູງຕໍ່ໝາກຜົນຂອງພົວພັນຮ່ວມມື ລະຫວ່າງ ລາວ-ຫວຽດນາມ ໃນໄລຍະຜ່ານມາ ເປັນຕົ້ນ ດ້ານເສດຖະກິດ, ວັດທະນະທຳ-ສັງຄົມ, ວິທະຍາສາດ-ເຕັກນິກ, ການຄ້າ ແລະ ການລົງທຶນ ແລະ ອື່ນໆ ໂດຍສະເພາະແມ່ນ ການສຸມໃສ່ຈັດຕັ້ງຜັນຂະຫຍາຍ ບັນດາຂໍ້ຕົກລົງຂອງສອງກົມການເມືອງ ກໍ່ຄື ລັດຖະບານຂອງສອງປະເທດ ແມ່ນໄດ້ຮັບຜົນສຳເລັດຕາມລະດັບຄາດໝາຍ ສຳຄັນແມ່ນໄດ້ເຮັດໃຫ້ ນັກລົງທຶນຂອງຫວຽດນາມ ມີຄວາມສົນໃຈ ແລະ ເຂົ້າມາລົງທຶນຢູ່ ສປປ ລາວ ຫຼາຍຂຶ້ນ ອັນເປັນການປະກອບສ່ວນສຳຄັນ ເຂົ້າໃນການພັດທະນາ ເສດຖະກິດ-ສັງຄົມຂອງລາວ ໃຫ້ມີການຂະຫຍາຍຕົວຢ່າງຕໍ່ເນື່ອງຕະຫຼອດມາ. ນອກນັ້ນ, ທ່ານນາຍົກລັດຖະມົນຕີ ຍັງໄດ້ສະແດງຄວາມຂອບໃຈ ຕໍ່ລັດຖະບານຫວຽດນາມ ທີ່ຍາມໃດກໍ່ໃຫ້ການຊຸກຍູ້ ແລະ ຊ່ວຍເຫຼືອໃນດ້ານຕ່າງໆ ໃຫ້ແກ່ ສປປ ລາວ ຕະຫຼອດມາ.
ໃນໂອກາດດຽວກັນນີ້, ທ່ານຮອງປະທານປະເທດຫວຽດນາມ ໄດ້ສະແດງຄວາມຂອບໃຈ ຕໍ່ທ່ານນາຍົກລັດຖະມົນຕີ ທີ່ໄດ້ເສຍສະຫຼະເວອັນມີຄ່າໃຫ້ການຕ້ອນຮັບຢ່າງອົບອຸ່ນ ໃນຄັ້ງນີ້ ພ້ອມທັງ ໄດ້ແຈ້ງຜົນຂອງການພະປະກັບທ່ານຮອງປະທານປະເທດຂອງ ສປປ ລາວ ແລະ ສະແດງຄວາມຍິນດີຈະສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ຄວາມສາມັກຄີພິເສດ ທີ່ມີມາແຕ່ດົນນານ ລະຫວ່າງ ຫວຽດນາມ-ລາວ ໃຫ້ນັບມື້ເຂົ້າສູ່ລວງເລິກ ເພື່ອນຳເອົາຜົນປະໂຫຍດມາສູ່ປະຊາຊົນສອງຊາດ ລາວ-ຫວຽດນາມ ຢ່າງແທ້ຈິງ.

ແຫລ່ງ: ກົມ​ປະ​ຊາ​ສຳ​ພັນ, ພະ​ແນກ​ໂຄ​ສະ​ນາ
ຂ່າວອື່ນໆ