ພິທີປະກາດ ນະຄອນປາກເຊ ແຂວງຈໍາປາສັກ ຢ່າງເປັນທາງການ

ຜູ້ຂຽນ: ​ອາ​ນິ​ຄົມ ວົ​ງເດືອນ

ວັນສຸກ, 01 ມິ.ຖ 2018 16:00

​​ພິທີປະກາດນະຄອນປາກເຊ ໄດ້ຈັດຂຶ້ນໃນຕອນແລງວັນທີ 31 ພຶດສະພາ 2018, ທີ່ສະໜາມກິລາແຂວງຈໍາປາສັກ, ໂດຍເປັນກຽດເຂົ້າຮ່ວມຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ, ມີທ່ານ ບຸນຖອງ ດີວິໄຊ ເຈົ້າແຂວງໆຈໍາປາສັກ, ມີບັນດາທ່ານລັດຖະມົນຕີ, ຮອງລັດຖະມົນຕີ, ບັນດາເຈົ້າແຂວງ ພ້ອມດ້ວຍອໍານາດການປົກຄອງແຂວງ, ເມືອງ ແລະ ມວນຊົນເຂົ້າຮ່ວມເປັນຈໍານວນຫຼວງຫຼາຍ.
ໃນພິທີໄດ້ເລີ່ມຕົ້ນດ້ວຍຂະບວນກ້ອນກໍາລັງຂອງພະນັກງານ, ທະຫານ, ຕໍາຫຼວດ, ບັນດານັກຮຽນ, ນັກສຶກສາ ແລະ ມວນຊົນຊາວແຂວງຈໍາປາສັກ ຈໍານວນ 23 ກ້ອນກໍາລັງ ມີຈໍານວນພົນ 4.400 ຄົນ, ຂະບວນລົດທີຕົບແຕ່ງທີ່ເປັນເອກະລັກຂອງບັນດາພະແນກການ, ຫົວໜວ່ຍທຸລະກິດ ແລະມູນເຊື້ອຂອງແຂວງຈໍາປາສັກ ຈໍານວນ 35 ຄັນ, ຊົມລາຍການສະແດງສິລະປະວັນນະຄະດີ ໃນລາຍການຕ່າງໆເປັນຕົ້ນ: ຊົມເຊີຍແຄນລາວເປັນມໍລະດົກໂລກ, ຟ້ອນຂໍ່ານັບຊົມເຊີຍຕ້ອນຮັບນະຄອນປາກເຊ, ລໍາສີພັນດອນ ກຽ່ວກັບປະຫວັດເມືອງປາກເຊ ແລະ ການສ້າງຕັ້ງຄະຄອນປາກເຊ ພ້ອມດ້ວຍລາຍການອື່ນໆ ທີ່ສະແດງໃຫ້ເຫັນມູນເຊື້ອຂອງແຂວງຈໍາປາສັກ.

ພາຍຫຼັງສໍາເລັດການສະແດງສິລະປະວັນນະຄະດີແລ້ວ ທ່ານ ສົມສະນິດ ບຸດຕິວົງ ຮອງເຈົ້າແຂວງໆຈໍາປາສັກ, ປະທານຄະນະກໍາມະການກະກຽມປະກາດການສ້າງຕັ້ງນະຄອນປາກເຊ ຂຶ້ນຜ່ານປະຫວັດຂອງເມືອງປາກເຊ ແລະ ການກະກຽມການສ້າງຕັ້ງນະຄອນປາກເຊ ເຊິ່ງທ່ານໄດ້ກ່າວວ່າ: ປາກເຊ ເປັນເມືອງເທດສະບານ ຂອງແຂວງຈໍາປາສັກ ເຊິ່ງໄດ້ຮັບການສ້າງຕັ້ງຂື້ນມາແຕ່ປີ 1904  ຈົນເຖິງປະຈຸບັນ, ເປັນບ່ອນຕັ້ງສໍານັກງານອົງການຂອງແຂວງ, ເປັນສູນກາງທາງດ້ານເສດຖະກິດ, ວັດທະນະທໍາ-ສັງຄົມ, ເປັນເມືອງບໍລິການ-ການຄ້າ, ການທ່ອງທຽ່ວ,  ເປັນເມືອງທາງຜ່ານ ໄປສູ່ບັນດາແຂວງພາກກາງ-ໃຕ້ ແລະ ປະເທດໃກ້ຄຽງໃນອານຸພາກພື້ນ, ມີເນື້ອທີ່ທັງໜົດ 12 ພັນກວ່າເຮັກຕາ ມີ 42 ບ້ານ, ປະກອບມີ 5 ກຸ່ມ, ກວມເອົາ 26 ບ້ານ ມີ 6 ບ້ານໃຫຍ່ ແລະ 10 ບ້ານເທດ ສະບານ, ມີ 13 ພັນກວ່າຄອບຄົວ, ມີ 13 ພັນກວ່າຫຼັງຄາເຮືອນ, ມີປະຊາກອນ 81 ພັນກວ່າຄົນ, ພົນລະເມືອງສ່ວນໃຫຍ່ປະກອບອາຊີບ ດ້ານທຸລະກິດ-ຄ້າຂາຍ ແລະ ການບໍລິການ ກວມ 60%, ພະນັກງານລັດຖະກອນ 28% ແລະ ຊາວກະສິກອນ 12%, ຄວາມໜາແໜ້ນຂອງພົນລະເມືອງ ສະເລ່ຍ 652 ຄົນ/ຕໍ່ກິໂລຕາແມັດ. ໃນປີ 2017 ການພັດທະນາເສດຖະກິດ-ສັງຄົມ ສາມາດບັນລຸໄດ້ໄດ້ 1.346 ກວ່າຕື້ກີບ, ລາຍຮັບຂອງພົນລະເມືອງ ສະ ເລ່ຍໄດ້ປະມານ 2.065 ໂດລາສະຫະລັດ,  ໂຄງການຈັດຕັ້ງທົ່ວເມືອງ ມີ 24 ຫ້ອງການ, ມີພະນັກງານ-ລັດຖະ ກອນທັງໝົດ 963 ຄົນ, ໄດ້ປະກາດເປັນບ້ານພັດທະນາແລ້ວ ຈໍານວນ 41 ບ້ານ, ກວມ 97,6%, ມີຄອບຄົວພັດ ທະນາ 13.341 ຄອບຄົວ ເທົ່າກັບ 99%, ມີຫ້ອງການພັດທະນາ 24 ຫ້ອງການ ກວມ 82,75%. ພ້ອມດຽວກັນນັ້ນ, ທ່ານຍັງໄດ້ກ່າວຕື່ມວ່າ: ພາຍຫຼັງໄດ້ປະກາດສ້າງຕັ້ງເປັນນະຄອນປາກເຊແລ້ວ ຈະໄດ້ເອົາໃຈໃສ່ພັດທະນາໄປຕາມວິໃສທັດ ໂດຍສະເພາະແມ່ນ ການພັດທະນາຊັບພະຍາກອນມະນຸດ ໃຫ້ມີຄວາມຮູ້-ຄວາມສາມາດ ນໍາໃຊ້ວິທະຍາສາດເຕັກໂນໂລຊີ ເຂົ້າໃນການພັດທະນາ,  ເປັນສູນກາງ ການຄ້າຂາຍ-ບໍລິການ ແລະ ທ່ອງທຽ່ວ ມີຄວາມສະອາດ ແລະ ສະພາບແວດລ້ອມທີ່ດີ, ສັງຄົມມີຄວາມເປັນລະບຽບຮຽບຮ້ອຍ ໂດຍຈະຕ້ອງສຸມໃສ່ບາງບັນຫາເປັນຕົ້ນ ນໍາໃຊ້ທ່າແຮງບົ່ມຊ້ອນພາຍໃນນະຄອນ ເພື່ອພັດທະນາເສດຖະກິດ-ສັງຄົມໃຫ້ເຂັ້ມແຂງ ໂດຍສະເພາະ ແມ່ນດ້ານລາຍຮັບ ປັບປຸງທາງດ້ານການປົກຄອງ, ດ້ານເສດຖະກິດ, ວັດທະນະທໍາ-ສັງຄົມ, ພື້ນຖານໂຄງລ່າງໃຫ້ເຂົ້າສູ່ລະບົບໃນລະດັບສູງ ເຮັດໃຫ້ປະຊາຊົນເຂົ້າເຖິງການບໍລິການ ສາທາລະນະສຸກ ໄດ້ຢ່າງເຕັມສ່ວນ, ສ້າງນະຄອນປາກເຊ ກາຍເປັນຕົວເມືອງທີ່ມີທ່າແຮງຮອບດ້ານ, ມີຄວາມສີວິໄລ, ກາຍເປັນໃຈກາງ ທາງດ້ານການບໍລິການ-ຄ້າຂາຍ ເປັນທາງຜ່ານໃນການຕິດຕໍ່ພົວພັນເສດຖະກິດ-ການຄ້າ ວັດທະນະທໍາ-ສັງຄົມ ແລະ ການທອ່ງທຽ່ວ ເຊິ່ງຈະສາມາດດຶງດູດເອົາການລົງທຶນຂອງນັກລົງທຶນ ຈາກພາຍໃນ ແລະ ຕ່າງປະເທດ.  
ໃນໂອກາດດຽວກັນນີ້ ທ່ານ ຄໍາໜັ້ນ ສູນວິເລີດ ລັດຖະມົນຕີກະຊວງພາຍໃນ ກໍ່ໄດ້ຂຶ້ນຜ່ານດໍາລັດຂອງນາ ຍົກລັດຖະມົນຕີ ສະບັບເລກທີ 128/ນຍ, ລົງວັນທີ 11 ເມສາ  2018 ວ່າດ້ວຍການສ້າງຕັ້ງນະຄອນປາກເຊ .
​ພາຍຫຼັງໄດ້ຮັບຟັງການລາຍງານສໍາເລັດແລ້ວ, ທ່ານ ທອງລຸນ ສີສຸລິດ ນາຍົກລັດຖະມົນຕີ ກໍ່ໄດ້ໃຫ້ກຽດລັ່ນຄ້ອງ 9 ບາດ, ປ່ອຍນົກສັນຕິພາບ 9 ໂຕ, ປ່ອຍປູມເປົ້າ 99 ໜວ່ຍ. ຈາກນັ້ນ ກໍ່ໄດ້ເປີດປ້າຍ ແລະ ຈູດດອກໄມ້ໄຟ ສະເຫຼີມສະຫຼອງ ພິທີປະກາດສ້າງຕັ້ງນະຄອນປາກເຊ ຢ່າງປັນທາງການ.​


ແຫລ່ງ: ຫ້ອງວ່າການສໍານັກງານນາຍົກລັດຖະມົນຕີ