ທ່ານຮອງນາຍົກລັດຖະມົນຕີ ເຂົ້າຮ່ວມສະເຫຼີມສະຫຼອງວັນເດັກນ້ອຍສາກົນ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນພະຫັດ, 31 ພ.ພ 2018 19:00

ໃນຕອນບ່າຍ ຂອງວັນທີ 31 ພຶດສະພາ 2018 ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ປະທານຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ໄດ້ໃຫ້ກຽດເຂົ້າຮ່ວມສະເຫຼີມສະຫຼອງວັນເດັກນ້ອຍສາກົນ, ວັນປູກຕົ້ນໄມ້ແຫ່ງຊາດ ແລະ ວັນຢຸດຕິການໃຊ້ແຮງງານເດັກ ປະຈຳປີ 2018 ຢູ່ທີ່ຫໍວັດທະນະທຳແຫ່ງຊາດ; ມີທ່ານປະທານສູນກາງສະຫະພັນແມ່ຍິງລາວ; ລັດຖະມົນຕີ, ຮອງລັດຖະມົນຕີກະຊວງທີ່ກ່ຽວຂ້ອງ ພ້ອມດ້ວຍ ທູຕານຸທູດ, ຜູ້ຕາງໜ້າອົງການຈັດຕັ້ງສາກົນ, ຜູ້ຕາງໜ້າຄູ່ຮ່ວມພັດທະນາ, ຜູ້ປົກຄອງເດັກ, ນັກຮຽນ, ຫຼານນ້ອຍເຍົາວະຊົນ ແລະ ສື່ມວນຊົນ ເຂົ້າຮ່ວມຢ່າງຫຼວງຫຼາຍ.

​ໃນພິທີດັ່ງກ່າວ, ໄດ້ມີການຈັດຫຼາຍກິດຈະກຳ ເປັນຕົ້ນ ຢອດຢາໃຫ້ແກ່ເດັກນ້ອຍ, ຂຶ້ນທະບຽນການເກີດ ໃຫ້ແກ່ເດັກ ທີ່ມີອາຍຸແຕ່ແລກເກີດ ຮອດ 18 ປີ, ຮັບຊົມການສະແດງລະຄອນຂອງເດັກນ້ອຍ ໃນຫົວຂໍ້ “ສິດຂອງຂ້ອຍ”, ຮັບຊົມວີດີໂອ “ກິດຈະກຳເວທີເດັກ”, “ສັງຄົມທີ່ດີສຳລັບເດັກ”, ຮັບຟັງການຈັດກິດຈະກຳວັນເດັກນ້ອຍສາກົນ ໃນໄລຍະ 3 ມື້ທີ່ຜ່ານມາ, ຮັບຟັງການນຳສະເໜີ ຄວາມຫວັງຂອງເດັກລາວ ເພື່ອກ້າວໄປສູ່ປີ 2020, ຮັບຟັງການເຜີຍແຜ່ແຜນບຸລິມະສິດ ການຮ່ວມມືຂອງຫຼາຍຂະແໜງການ ໃນການແກ້ໄຂການໃຊ້ຄວາມຮຸນແຮງຕໍ່ເດັກ ໃນສປປ ລາວ, ຮັບຟັງການສະແດງຮ້ອງເພງ, ການມອບຂອງຂວັນໃຫ້ແກ່ເດັກ ແລະ ອື່ນໆ.
ໃນໂອກາດດຽວກັນ, ທ່ານ ສອນໄຊ ສີພັນດອນ ໄດ້ມີຄຳເຫັນກ່າວຕໍ່ງານສະເຫຼີມສະຫຼອງດັ່ງກ່າວວ່າ: ໃນໄລຍະຜ່ານມາ ພັກ ແລະ ລັດຖະບານລາວ ຍາມໃດກໍ່ໃຫ້ຄວາມສຳຄັນ ແລະ ເອົາໃຈໃສ່ຢ່າງຕັ້ງໜ້າ ໃນການຊຸກຍູ້, ພັດທະນາ ແລະ ສົົ່ງເສີມເດັກນ້ອຍລາວ ໃຫ້ເຕີບໃຫຍ່ໃນສະພາບແວດລ້ອມທີ່ມີຄວາມປອດໄພ, ໄດ້ຮັບການສຶກສາ ແລະ ການບໍລິການສຸຂະພາບ ໃນຂັ້ນພື້ນຖານທີ່ດີ. ເພື່ອບັນລຸຈຸດປະສົງ ແລະ ເປົ້າໝາຍດັ່ງກ່າວ ລັດຖະບານ ໄດ້ກຳນົດແນວທາງນະໂຍບາຍ, ນິຕິກຳ ແລະ ຈັດສັນງົບປະມານ ຈຳນວນໜຶ່ງ ໂດຍມອບໃຫ້ຂະແໜງການທີ່ກ່ຽວຂ້ອງ ທັງສູນກາງ ແລະ ທ້ອງຖິ່ນ ເປັນເຈົົ້າການຮ່ວມກັນຈັດຕັ້ງປະຕິບັດ ໂດຍສະເພາະແມ່ນການໂຄສະນາເຜີຍແຜ່, ການປ້ອງກັນ ແລະ ລຶບລ້າງການໃຊ້ຄວາມຮຸນແຮງຕໍ່ເດັກ, ການຄ້າ-ຂາຍປະເວນີເດັກ ແລະ ການໃຊ້ແຮງງານເດັກ. ຜ່ານການຈັດຕັ້ງປະຕິບັດ ໃນໄລຍະ 1 ປີຜ່ານມາເຫັນວ່າ ພວກເຮົາປະສົບຜົນສຳເລັດໃນຫຼາຍດ້ານ ຊຶ່ງອັນທີ່ພົົ້ນເດັ່ນແມ່ນຄວາມຮັບຮູ້ ແລະ ເຂົົ້າໃຈຂອງສັງຄົມ ທີ່ເຫັນວ່າ ເດັກນ້ອຍມີບົດບາດສຳຄັນ, ເດັກນ້ອຍຍັງເປັນຕົວແທນຂອງການປ່ຽນແປງ ເພື່ອສືບທອດພາລະກິດໃນການປົກປັກຮັກສາ, ພັດທະນາ ແລະ ສ້າງສາປະເທດຊາດ ໃນອະນາຄົດ. ພ້ອມດຽວກັນນັ້ນ, ທ່ານຮອງນາຍົກລັດຖະມົນຕີ ຍັງໄດ້ກ່າວຮຽກຮ້ອງມາຍັງບັນດາການຈັດຕັ້ງພັກ-ລັດ ທຸກຂັ້ນ ລວມທັງບັນດາຫົວໜ່ວຍທຸລະກິດ, ຜູ້ປະກອບການ, ພໍ່ແມ່ປະຊາຊົນ ແລະ ເດັກນ້ອຍລາວບັນດາເຜົົ່າ ໃນຂອບເຂດທົົ່ວປະເທດ ຈົົ່ງຍົກສູງຄວາມຮັບຜິດຊອບຂອງຕົນ ແລະ ເພີ່ມທະວີອອກແຮງແຂ່ງຂັນກັນ ຈັດຕັ້ງປະຕິບັດວຽກງານກ່ຽວກັບເດັກນ້ອຍ, ຮັບປະກັນການດູແລເອົາໃຈໃສ່, ການພັດທະນາ, ການປົກປ້ອງ ແລະ ການມີສ່ວນຮ່ວມຂອງເດັກນ້ອຍ ທີ່ເປັນລູກຫຼານຂອງພວກເຮົາ ໃຫ້ເປັນໄວທີ່ມີຄວາມສົດໃສ, ປອດໄພ ແລະ ແຂງແຮງ ເພື່ອກ້າວເປັນຜູ້ໃຫຍ່ ທີ່່ມີຄວາມຮູ້ຄວາມສາມາດ, ມີຄວາມສົມບູນທາງດ້ານຮ່າງກາຍ ແລະ ຈິດໃຈ ສາມາດປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ໃນອະນາຄົດ.​


ແຫລ່ງ: ຫ້ອງວ່າການສໍານັກງານນາຍົກລັດຖະມົນຕີ