ເປີດໂຄງການກໍ່ສ້າງໂຮງໝໍກະເສມຣາດ ອິນເຕີເນຊັ້ນແນວ ວຽງຈັນ

ຜູ້ຂຽນ: ຄຳວົງສັກ ບັນດິດ

ວັນເສົາ, 26 ພ.ພ 2018 12:00


ໃນຕອນແລງຂອງວັນທີ 25 ພຶດສະພາ 2018 ທີ່ໂຮງແຮມແລນມາກ ໄດ້ຈັດພິທີເປີດໂຄງການກໍ່ສ້າງ ໂຮງໝໍກະເສມຣາດ ອິນເຕີເນຊັ້ນແນວ ວຽງຈັນ ຂຶ້ນ ໂດຍການໃຫ້ກຽດເຂົ້າຮ່ວມຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ເຊິ່ງມີທ່ານລັດຖະມົນຕີ, ຮອງລັດຖະມົນຕີ, ກົມກອງທີ່ກ່ຽວຂ້ອງ, ທູຕານຸທູດ, ອົງການຈັດຕັ້ງສາກົນ ແລະ ພະນັກງານທີ່ກ່ຽວຂ້ອງ ເຂົ້າຮ່ວມ.
ໂອກາດນີ້, ທ່ານ ຮສຈ. ດຣ. ສະເຫຼີມ ຫານພານິດ ຜູ້ອຳນວຍການໃຫຍ່ ບໍລິສັດ ບາງກອກ ເຊັນ  ອິນເຕີເນຊັນແນວ (ລາວ) ຈຳກັດ ໄດ້ກ່າວລາຍງານໃຫ້ຊາບວ່າ: ໂຄງການກໍ່ສ້າງ ໂຮງໝໍກະເສມຣາດ ອິນເຕີເນຊັ້ນແນວ ວຽງຈັນ ຕັ້ງຢູ່ບ້ານດອນນົກຂຸ້ມ ເມືອງສີສັດຕະນາກ ນະຄອນຫຼວງວຽງຈັນ ເຊິ່ງຈະດຳເນີນການກໍ່ສ້າງໂດຍການຮັບຮອງມາດຕະຖານຄຸນນະພາບ ຈາກສະ ຖານພະຍາບານລະດັບສາກົນ ຫຼື JCI ແລະ ສະຖາບັນສະຖາປະນິກອາເມລິການ (AIA), ຄາດວ່າຈະໃຊ້ງົບໃນການລົງທຶນປະມານ 70 ລ້ານໂດລາສະຫະລັດ. ໃນນັ້ນ, 50 ລ້ານໂດລາສະຫະລັດ ຈະເປັນການລົງທຶນໄລຍະທຳອິດ ໂດຍສຸມໃສ່ການກໍ່ສ້າງ ແລະ ການໃຫ້ບໍລິການທາງດ້ານການປິ່ນປົວແບບຄົບວົງຈອນ ປະກອບດ້ວຍ: ການບໍລິການຜູ້ປ່ວຍນອກ, ການບໍລິການຜູ້ປ່ວຍ ອຸບັດເຫດສຸກເສີນ, ການບໍລິການຜູ້ປ່ວຍວິກິດ, ການບໍລິການຜູ້ປ່ວຍໃນ ແລະ ຂະແໜງສະໜັບສະໜູນທາງດ້ານການແພດອື່ນໆ. ຊຶ່ງທາງໂຮງໝໍ ຈະໄດ້ທຸ່ມເທເຂົ້າໃສ່ການບໍລິການທາງດ້ານການແພດ ນັບຕັ້ງແຕ່ການກວດພະຍາດ, ການບົ່ງມະຕິ ແລະ ການປິ່ນປົວແບບຄົບວົງຈອນ ດ້ວຍເຄື່ອງມືທີ່ທັນສະໄໝ, ມີແພດໝໍທີ່ຊ່ຽວຊານ ແລະ ມີປະສົບການສູງ ໃນແຕ່ລະດ້ານ ເພື່ອໃຫ້ມີການ ບໍລິການທີ່ດີທີ່ສຸດ ແກ່ຜູ້ປ່ວຍທຸກລະດັບ ດ້ວຍຈັນຍາບັນຂອງວິຊາຊີບ. ສ່ວນໄລຍະທີສອງ ແມ່ນຈະທຸ່ມເທເຂົ້າໃນການກໍ່ສ້າງຕຶກບໍລິການຜູ້ປ່ວຍ, ສະຖານທີ່ຈອດລົດ ແລະ ສິ່ງອຳນວຍຄວາມສະ ດວກອື່ນໆທີ່ຈຳເປັນ. ຄາດວ່າ ໂຄງການຈະສຳເລັດ ໃນໄລຍະເວລາ 20-24 ເດືອນ ແລະ ຈະເປີດບໍລິການໄດ້ ໃນປີ 2020.

 

ໃນພິທີ, ທ່ານ ຮສ. ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ໄດ້ກ່າວວ່າ: ຕາງໜ້າການນຳກະຊວງສາທາລະນະສຸກ ຂໍສະແດງຄວາມຊົມເຊີຍ ຕໍ່ການຮ່ວມທຶນ ລະຫວ່າງ ຜູ້ລົງທຶນຝ່າຍລາວ ແລະ ຝ່າຍໄທ ທີີ່ໄດ້ຕັດສິນໃຈ ລົງທຶນເຂົ້າໃນຂະແໜງການສາທາລະນະສຸກ ໂດຍສະເພາະ ແມ່ນການລົງທຶນກໍ່ສ້າງໂຮງໝໍບໍລິການປິ່ນປົວ ເພື່ອເບິ່ງແຍງສຸຂະພາບ ຂອງປະຊາຊົນ. ຊຶ່ງຕາມແນວທາງສາທາລະນະສຸກນັ້ນ ພັກ ແລະ ລັດຖະບານລາວ ໄດ້ຖືເອົາວຽກງານປິ່ນປົວ-ຟື້ນຟູໜ້າທີ່ການ ເປັນວຽກງານໜຶ່ງທີ່ສຳຄັນ ເພື່ອເຮັດໃຫ້ການບໍລິການປິ່ນປົວທີ່ມີ ຄຸນນະພາບ ໄປໄດ້ທົ່ວເຖິງ ແລະ ຍຸດຕິທຳ. ໃນໄລຍະຜ່ານມາ, ລັດຖະບານແຫ່ງ ສປປ ລາວ ໄດ້ໃຫ້ບູລິມະສິດ ແລະ ລົງທຶນໃສ່ການປັບປຸງກໍ່ສ້າງໂຮງໝໍລັດ ໃຫ້ທັນສະໄໝ ຢູ່ນະຄອນຫຼວງວຽງຈັນ ແລະ ຕົວເມືອງໃຫ່ຍ ໃນຂອບເຂດທົ່ວປະເທດ ທັງໄດ້ເປີດໂອກາດໃຫ້ພາກສ່ວນເອກະຊົນ ມີສ່ວນຮ່ວມໃນການບໍລິການດ້ານສາທາລະນະສຸກ ເພື່ອເປັນທາງເລືອກໃຫ້ແກ່ພໍ່ແມ່ປະຊາຊົນ ຕອບສະໜອງກັບຄວາມຮຽກຮ້ອງຕ້ອງການ ຂອງການບໍລິການທາງດ້ານການແພດ ທີ່ນັບມືນັບສູງຂຶ້ນ ເຊິ່ງຫວັງຢ່າງຍິ່ງວ່າ ໂຄງການກໍ່ສ້າງໂຮງໝໍກະເສມຣາດ ອິນເຕີເນຊັ້ນແນວ ວຽງຈັນ ຈະເປັນໂຄງການກໍ່ສ້າງໂຮງໝໍທີ່ທັນສະໄໝ ລະດັບສາກົນ ຊ່ວຍໃຫ້ພໍ່ແມ່ປະຊາຊົນລາວບັນດາເຜົ່າ, ຜູ້ມີເງື່ອນໄຂ ບໍ່ຕ້ອງເສຍເວລາ ແລະ ເສຍຄ່າໃຊ້ຈ່າຍສູງ ໃນການເດີນທາງໄປປິ່ນປົວ ຢູ່ຕ່າງປະເທດ ແລະ ຈະສາມາດຕອບສະໜອງໄດ້ ນະໂຍບາຍ 5 ດີ 1 ພໍໃຈ ຂອງກົມປິ່ນປົວ ຄື: 1) ຕ້ອນຮັບດີ ດ້ວຍອັດທະຍາໄສດີ, 2) ມີຄວາມຮູ້-ຄວາມສາມາດດີ, 3) ມີຄວາມສະອາດ ງາມຕາ-ສິ່ງແວດລ້ອມທີ່ດີ, 4) ການບົ່ງມະຕິດີ ແລະ 5) ການປິ່ນປົວດີ; 1 ພໍໃຈ ແມ່ນພໍ່ແມ່ ແລະ ຍາດຕິພີ່ນ້ອງຂອງຄົນເຈັບ ມີຄວາມພໍໃຈ ລາຄາຍຸຕິທຳ.


ແຫລ່ງ: ກົມປະຊາສຳພັນ, ຫ້ອງວ່າການສຳນັກງານນາຍົກລັດຖະມົນຕີ