ປຸກລະດົມການຊ່ວຍເຫຼືອຜູ້ປະສົບອັກຄີໄພ ທີ່ບ້ານສັນແຟນ

ຜູ້ຂຽນ: ຄຳວົງສັກ ບັນດິດ

ວັນອາທິດ, 20 ພ.ພ 2018 19:00

ຈາກເຫດການໄຟໄໝ້ບ້ານປະຊາຊົນ ທີ່ບ້ານສັນແຟນ, ກຸ່ມນ້ຳລ້ຽງ, ເມືອງຄຳ, ແຂວງຊຽງຂວາງ ໃນວັນທີ 7 ພຶດສະພາ 2018 ທີ່ຜ່ານມາ ອັນໄດ້ສ້າງຄວາມເສຍຫາຍ ໃຫ້ແກ່ ພໍ່ແມ່ປະຊາຊົນໃນບ້ານດັ່ງກ່າວ ທັງໝົດ 44 ຫຼັງຄາເຮືອນ, ພົນລະເມືອງ 324 ຄົນ ຍິງ138 ຄົນ. ໃນນັ້ນ, ໄຟໄໝ້ເຮືອນໝົດກ້ຽງ 32 ຫຼັງຄາເຮືອນ, ເຫຼືອນັ້ນແມ່ນໄຟໄໝ້ ແລະ ເປ່ເພເລັກນ້ອຍ, ບາດເຈັບ 2 ຄົນ, ເຂົ້າເສຍຫາຍ 8.240 ກິໂລກຣາມ, ລວມມູນຄ່າເສຍຫາຍກວ່າ 1 ຕື້ກີບ. ດັ່ງນັ້ນ, ໃນວັນທີ 19 ພຶດສະພາ 2018 ໂອກາດທີ່ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ເດີນທາງມາເຄື່ອນໄຫວ ແລະ ຢ້ຽມຢາມບັນດາແຂວງພາກເໜືອ, ທ່ານກໍ່ໄດ້ປຸກລະດົມການຊ່ວຍເຫຼືອ ຈາກບັນດາພາກລັດ ແລະ ພາກທຸລະກິດ ເພື່ອມາຊ່ວຍເຫຼືອປະຊາຊົນຜູ້ປະສົບ ອັກຄີໄພດັ່ງກ່າວ ລວມມູນຄ່າ 350 ລ້ານກີບ ແລະ ຕາງໜ້າຮັບໂດຍ ທ່ານ ບຸນຕົ້ນ ຈັນທະພອນ ຮັກສາການເລຂາພັກແຂວງ, ເຈົ້າແຂວງໆຊຽງຂວາງ.

 

ການຊ່ວຍເຫຼືອຄັ້ງນີ້, ປະກອບມີ: ກະຊວງພະລັງ ແລະ ບໍ່ແຮ່ 50 ລ້ານກີບ, ບໍລິສັດ ທີ່ປຶກສາດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈຳກັດຜູ້ດຽວ 200 ລ້ານກີບ ແລະ ທະນາຄານເອສທີກຣຸບ 100 ລ້ານກີບ. ໂອກາດນີ້, ທ່ານຮອງນາຍົກລັດຖະມົນຕີ ກໍ່ໄດ້ສະແດງຄວາມເສຍໃຈ ຕໍ່ເຫດການອັກຄີໄພທີ່ເກີດຂຶ້ນໃນ ອັນໄດ້ສ້າງຄວາມເສຍຫາຍຢ່າງໜັກ ຕໍ່ພໍ່ແມ່ປະຊາຊົນບ້ານສັນແຟນ ຊຶ່ງຫວັງຢ່າງຍິ່ງວ່າ ການປະກອບສ່ວນຊ່ວຍເຫຼືອດັ່ງກ່າວນັ້ນ ຈະສາມາດບັນເທົາທຸກ ແລະ ຊ່ວຍຟື້ນຟູຊີວິດການເປັນຢູ່ ໃຫ້ກັບຄືນສູ່ສະພາບປົກກະຕິໂດຍໄວ.



ແຫລ່ງ: ກົມປະຊາສຳພັນ, ຫ້ອງວ່າການສຳນັກງານນາຍົກລັດຖະມົນຕີ