​​1.   ໂຄງການກໍ່ສ້າງ ສູນການຄ້າ “ວຽງ​ຈັນ​ເຊັນ​ເຕີ”

ໂຄງການກໍ່ສ້າງ ສູນການຄ້າ "ວຽງຈັນເຊັນເຕີ" ​ຖື​ເປັນ​ໂຄງການ​ໜຶ່ງທີ່​ສຳຄັນຢ່າງ​ສູງ​ສຸດ ຂອງ​ອຳນາດ​ການ​ປົກຄອງ​ນະຄອນຫຼວງ​ວຽງ​ຈັນ ແລະ ແຂວງ​ຢຸນ​ນານ​. ໂຄງການດັ່ງກ່າວ ແມ່ນກຸ່ມບໍລິສັດວິສະວະກຳກໍ່ສ້າງ-ລົງທຶນຕ່າງປະເທດ ແຂວງ ຢູນນານ ຈຳກັດ ໄດ້ຈັບມືກັບ ກຸ່ມບໍລິສັດ ກຣິດຕະພົງ ຈຳກັດ ຮ່ວມ​ມື​ກັນ​ສ້າງ​ຕັ້ງ ບໍລິສັດ ພັດທະນາ ສູນເສດຖະກິດການຄ້າຄົບວົງຈອນໜອງຈັນຕອນເໜືອ ຈຳກັດ, ​ໂດຍ​ມີ​ບໍລິສັດ ທີ່​ປຶກສາ SCP ສິງ​ກະ​ໂປ ຈຳກັດ ​ເປັນ​ຜູ້​ອອກ​ແບບ, ຮູບ​ແບບ​ການ​ດຳ​ເນີນ ແລະ ​ພັດທະນາ​ໂຄງການ ​ແມ່ນ​ອີງ​ໃສ່​ປະສົບ​ການ​ຈາກ​ສາກົນ. ​ເປັນ​ໂຄງການ​ທີ່​ຮ່ວມ​ມື​ກັນ​ລະຫວ່າງ ນະຄອນຫຼວງ​ວຽງ​ຈັນ ​ແລະ ​ແຂວງ​ຢຸນນານ ສປ ຈີນ, ​​ແລະ​ ອົງການ​ປົກຄອງ​ຂອງທັງ​ສ​ອງຝ່າຍ ​ຕ່າງ​ກໍ່​ໃຫ້​ຄວາມ​ສຳຄັນ​ຕໍ່​ໂຄງການນີ້. ​ໂຄງການກໍ່ສ້າງ ​ສູນການຄ້າ  "ວຽງຈັນເຊັນເຕີ" ​ປະກອບ​ມີ​: ຫ້າງ​ສັບພະ​ສິນຄ້າ, ຄາ​ລາ​ໂອ​ເກ, ​ໂຮງ​ໜັງ, ສຳນັກງານ, ​ໂຮງ​ແຮມ​ສີ່​ດາວ, ສະ​ໂມ​ສອນ, ອາພັດ​ເມັນ​ ແລະ ​ອື່ນໆ. ເນື້ອທີ່​ໂຄງການ​ທັງ​ໝົດ​ມີ 5,3 ເຮັກຕາ ໃນ​ນີ້ ເຂດ​ການ​ກໍ່ສ້າງ​ຂອງ​ໂຄງການ​ມີ 120.000 ຕາ​ແມັດ (ໜ້າ​ພື້ນ​ດິນ 90.966 ຕາ​ແມັດ ພື້ນ​ດິນ​ມີ 30.852 ຕາ​ແມັດ) ເນື້ອທີ່​ດຳເນີນ​ທຸລະ​ກິດ ມີ 36.673 ຕາ​ແມັດ ບ່ອນ​ຈອດ​ລົດ​ທັງ​ໝົດ​ໄດ້ 902 ຄັນ ເນື້ອທີ່​ກໍ່ສ້າງ​ທັງ​ໝົດ​ຂອງ​ໄລຍະ​ທຳ​ອິດ ມີ 61.370 ຕາ​ແມັດ.

         ໂຄງການກໍ່ສ້າງ ​ສູນການຄ້າ “ວຽງ​ຈັນ​ເຊັນ​ເຕີ” ​ໄດ້​ແບ່ງ​ອອກ​ເປັນ 3 ໄລຍະ​ການ​ກໍ່ສ້າງ​ຄື: ໄລຍະ​ທີ 1 ໄດ້​ມີ​ແຜນການ​ພັດທະນາ​ຫ້າງ​ສັບ​ພະ​ສິນຄ້າ ແລະ ຕຶກ​ອາຄານ, ໄລຍະ​ທີ 2 ມີ​ແຜນການ​ພັດທະນາ​ໂຮງແຮມ ແລະ ສະໂມສອນ​ພົບ​ປະ, ໄລຍະ​ທີ 3 ແມ່ນ​ແຜນການ​ພັດທະນາ​ອາພາດ​ເມັນ. ມາຮອດປະຈຸບັນນີ້, ການ​ກໍ່ສ້າງ​ ແມ່ນ​ໄດ້​ສຳເລັດ​ໂຄງ​ຮ່າງ​ການ​ກໍ່ສ້າງ​ໄລຍະ​ທີ 1 ເປັນ​ທີ່​ຮຽບ​ຮ້ອຍ​ແລ້ວ ແລະ ຈະ​ເປີດ​ບໍລິການ​ຢ່າງ​ເປັນ​ທາງ​ການ ໃນ​ເດືອນ​ທັນວາ 2014 ທີ່​ຈະ​ມາ​ເຖິງ​ນີ້.

2.   ໂຄງການກໍ່ສ້າງ "ເຂດພັດທະນາກວມລວມໄຊເສດຖາ"

        ແມ່ນເຂດໜຶ່ງ ທີ່ຕັ້ງຢູ່ໃນນະຄອນຫລວງວຽງຈັນ ໂດຍໄດ້ຮັບການຍົກລະດັບຈາກເຂດສຳປະທານທົ່ວໄປ ໃຫ້ເປັນເຂດເສດຖະກິດສະເພາະ ໃນວັນທີ 17/8/2011 ຊຶ່ງເປັນການຮ່ວມທຶນ ລະຫວ່າງ ນະຄອນຫລວງວຽງຈັນ (ຕາງໜ້າໃຫ້ລັດຖະບານລາວ) ແລະ ບໍລິສັດ ລົງທຶນພັດທະນາຕ່າງປະເທດ ແຂວງຢຸນນານ ຈຳກັດ (ຕາງໜ້າລັດຖະບານ ສປ ຈີນ) ໃນມູນຄ່າ ການລົງທຶນ 128 ລ້ານໂດລາສະຫະລັດ ເພື່ອສ້າງເຂດດັ່ງກ່າວ ໃຫ້ກາຍເປັນເຂດອຸດສາຫະກຳປຸງແຕ່ງກະສິກຳ ແລະ ອຸດສາຫະກຳເພື່ອສົ່ງອອກ, ເຂດການຄ້າ ແລະ ການບໍລິການທີ່ທັນສະໄໝ ຢູ່ນະຄອນຫລວງວຽງຈັນ ຊຶ່ງມີເນື້ອທີ່ປະມານ 1.000 ເຮັກຕາ. ປະຈຸບັນ ໄດ້ສຳເລັດການກໍ່ສ້າງເສັ້ນທາງເບີ 01 ເປັນເສັ້ນທາງ ເຊື່ອມຕໍ່ລະຫວ່າງເສັ້ນທາງໂຄກສະອາດ (ທາງເລກ 03) ຫາເຂດພັດທະນາກວມລວມ ໄຊເຊດຖາ ມີມູນຄ່າການກໍ່ສ້າງ 6,5 ລ້ານໂດລາສະຫະລັດ; ສຳເລັດການກໍ່ສ້າງປະຕູໂຂງເຂົ້າເຂດດັ່ງກ່າວ ມູນຄ່າ 677.000 ໂດລາສະຫະລັດ; ກໍ່ສ້າງອາຄານຄະນະບໍລິຫານເຂດ, ອາຄານບໍລິສັດ ຮ່ວມທຶນລາວຈີນ ຈຳກັດ ແລະ ຫໍວາງສະແດງຮູບພາບຈຳລອງເຂດ ລວມມູນຄ່າທັງໝົດ 1,7 ລ້ານກວ່າ ໂດລາສະຫະລັດ; ກໍ່ສ້າງເສັ້ນທາງພາຍໃນເຂດ 02 ເສັ້ນ ມີຄວາມຍາວ 1.400 ແມັດ ແລະ ບຸກເບີກຖົມດິນໃຫ້ 03 ບໍລິສັດ ທີ່ເຂົ້າມາລົງທຶນມູນຄ່າ 3 ແສນໂດລາ; ກໍ່ສ້າງຕາຄ່າຍໄຟຟ້າເຂົ້າເຂດ ມູນຄ່າ 88 ພັນໂດລາສະຫະລັດ, ການກໍ່ສ້າງໂຮງງານຫົວອາຫານຂອງບໍລິສັດຄວາມຫວັງໃໝ່ ມູນຄ່າ 4 ລ້ານໂດລາ, ປະຈຸບັນ ສຳເລັດ 95%  ແລະ ສືບຕໍ່ສົມທົບຮ່ວມກັບພາກສ່ວນທີ່ກ່ຽວຂ້ອງ ສຸມໃສ່ຊົດເຊີຍເວນຄືນທີ່ດິນ ໃຫ້ແກ່ເຈົ້າຂອງສິດໃຊ້ ແລະ ສິດນຳໃຊ້ຈຳນວນໜຶ່ງທີ່ຍັງເຫລືອ.