ທ່ານ ຮອງນາຍົກລັດຖະມົນຕີ ຕ້ອນຮັບຄະນະຜູ້ແທນ ສະພາອົງການກາແດງ ສສ ຫວຽດນາມ

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນພະຫັດ, 27 ຕ.ລ 2022 18:00

​​​​ໃນຕອນບ່າຍວັນທີ 27 ຕຸລາ 2022 ທີ່ສໍານັກງານນາຍົກລັດຖະມົນຕີ, ທ່ານ ກິແກ້ວ ໄຂຄໍາພິທູນ, ຮອງນາ ຍົກລັດຖະມົນຕີ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບ ຂອງທ່ານ ນາງ ບຸ່ຍ ທິ ຮວາ, ປະທານສະພາອົງການກາ ແດງ ແຫ່ງ ສສ ຫວຽດນາມ ພ້ອມດ້ວຍຄະນະ.

​​​​​ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ທ່ານ ນາງ ບຸ່ຍ ທິ ຮວາ ພ້ອມດ້ວຍຄະນະ ທີ່ເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຮ່ວມກັບພາກສ່ວນກ່ຽວ ຂ້ອງ ຂອງ ສປປ ລາວ ທັງຢູ່ສູນກາງ ແລະ ທ້ອງຖິ່ນ ໃນຄັ້ງນີ້. ພິເສດ ໄດ້ສະແດງຄວາມຊົມເຊີຍ ຕໍ່ຜົນງານການ ເຄື່ອນໄຫວຂອງທ່ານ ນາງ ບຸ່ຍ ທິ ຮວາ ໃນໄລຍະຜ່ານມາ ເຊິ່ງໄດ້ຮັບຄວາມເຊື່ອໝັ້ນ ແລະ ໄວ້ວາງໃຈ ຈາກການນຳພັກ-ລັດ ແຫ່ງ ສສ ຫວຽດນາມ ຈົນໄດ້ຮັບການແຕ່ງຕັ້ງໃຫ້ດຳລົງຕຳແໜ່ງ ເປັນປະທານສະພາອົງການກາແດງ ແຫ່ງ ສສ ຫວຽດນາມ ຄົນໃໝ່ ແລະ ສະແດງຄວາມຊົມເຊີຍ ທີ່ໄດ້ເດີນທາງມາຢ້ຽມຢາມ ສປປ ລາວ ເປັນປະເທດທຳອິດ ພາຍຫຼັງທີ່ໄດ້ຮັບໜ້າທີ່ໃໝ່; ໄດ້ຕີລາຄາສູງ ຕໍ່ຜົນສຳເລັດການພົວພັນຮ່ວມມືສອງຝ່າຍ ໃນໄລຍະຜ່ານມາ ກໍ່ຄືຜົນສຳ ເລັດ ໃນການເຮັດວຽກຮ່ວມກັນ ຂອງສອງອົງການກາແດງສອງປະເທດ ຢູ່ ສປປ ລາວ ໃນຄັ້ງນີ້ ເຊິ່ງເປັນການປະກອບສ່ວນ ເພີ່ມພູນຄູນສ້າງສາຍພົວພັນສາມັກຄີພິເສດ ແລະ ການຮ່ວມມືຮອບດ້ານ ຂອງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ທີ່ມີມູນເຊື້ອອັນດີງາມ ມາແຕ່ດົນນານແລ້ວນັ້ນ ໃຫ້ນັບມື້ແໜ້ນແຟ້ນ, ຈະເລີນງອກງາມ ແລະ ເກີດດອກອອກຜົນຫຼາຍຂຶ້ນເປັນກ້າວໆ ເວົ້າລວມ, ເວົ້າສະເພາະ ໄດ້ປະກອບສ່ວນ ເຂົ້າໃນການສ້າງສາພັດທະນາສອງປະເທດ ລາວ-ຫວຽດນາມ ໃຫ້ນັບມື້ດີຂຶ້ນເປັນກ້າວໆ; ອີກດ້ານໜຶ່ງ ຍັງເປັນການປະກອບສ່ວນເຂົ້າໃນການຈັດຕັ້ງປະຕິບັດກິດຈະກຳສະເຫຼີມສະຫຼອງ ສອງວັນປະຫວັດສາດ ຂອງສອງຊາດ ໃຫ້ມີຄວາມໝາຍເລິກເຊິ່ງ, ມີບັນຍາກາດຟົດຟື້ນ ແລະ ມ່ວນຊື່ນ. ພ້ອມນີ້, ໄດ້ສະແດງຄວາມຂອບໃຈ ຕໍ່ການຊ່ວຍເຫຼືອດ້ານຕ່າງໆ ຂອງອົງການກາແດງ ແຫ່ງ ສສ ຫວຽດນາມ ໃຫ້ແກ່ອົງການກາແດງ ກໍ່ຄືພາກສ່ວນຕ່າງໆ ຂອງ ສປປ ລາວ ໃນໄລຍະຜ່ານມາ ກໍ່ຄືປັດຈຸບັນ. ນອກຈາກນີ້, ທ່ານຮອງນາຍົກລັດຖະມົນຕີ ຍັງໄດ້ຍົກໃຫ້ເຫັນ ພາລະບົດບາດ ແລະ ຄວາມໝາຍສຳຄັນ ຂອງວຽກງານກາແດງ ຕໍ່ພາລະກິດ ປົກປັກຮັກສາ ແລະ ສ້າງສາພັດທະນາປະເທດຊາດ; ໄດ້ສະເໜີ ໃຫ້ອົງການກາແດງສອງປະເທດ ສືບຕໍ່ພົວພັນປະສານງານ, ຮ່ວມມືກັນຢ່າງແໜ້ນແຟ້ນ ໃນຂອບສອງຝ່າຍ ແລະ ຫຼາຍຝ່າຍຕື່ມອີກ, ພ້ອມທັງ ສະເໜີຊຸກຍູ້ໃຫ້ອົງການກາແດງ ຂອງບັນດາແຂວງ ທີ່ມີຊາຍແດນຕິດກັນ ສືບຕໍ່ມີການຮ່ວມມື, ແລກປ່ຽນຂໍ້ມູນຂ່າວສານ ແລະ ຖອດຖອນບົດຮຽນ ເຊິ່ງກັນ ແລະ ກັນ ຫຼາຍຂຶ້ນ.
 
​​​​ໃນໂອກາດດຽວກັນ, ທ່ານປະທານສະພາອົງການກາແດງ ແຫ່ງ ສສ ຫວຽດນາມ ກໍ່ໄດ້ກ່າວສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານຮອງນາຍົກລັດຖະມົນຕີ ແລະ ພາກສ່ວນກ່ຽວຂ້ອງ ຂອງ ສປປລາວ ໃນຄັ້ງນີ້, ພ້ອມທັງ ລາຍງານໃຫ້ຊາບ ກ່ຽວກັັບຈຸດປະສົງ ແລະ ຜົນສຳເລັດ ໃນການເຮັດວຽກຮ່ວມກັບ ອົງການກາ ແດງ ຂອງ ສປປ ລາວ, ລວມທັງ ຜົນການເຄື່ອນໄຫວຢ້ຽມຢາມ ແລະ ເຮັດວຽກຢູ່ບາງທ້ອງຖິ່ນ ຂອງ ສປປ ລາວ ໃນຄັ້ງນີ້. ນອກຈາກນັ້ນ ກໍ່ໄດ້ລາຍງານໃຫ້ທ່ານ ຮອງນາຍົກລັດຖະມົນຕີ ຊາບ ກ່ຽວກັບບົດຮຽນ, ປະສົບການ, ຜົນ ສຳເລັດ, ຂໍ້ຫຍຸ້ງຍາກ ແລະ ສິ່ງທ້າທາຍ ໃນການຈັດຕັ້ງປະຕິບັດວຽກງານກາແດງ ຢູ່ ສສ  ຫວຽດນາມ; ພ້ອມທັງ ໄດ້ນຳເອົາຄຳຢ້ຽມຢາມຖາມຂ່າວ ຂອງການນຳຂັ້ນສູງ ແຫ່ງ ສສ ຫວຽດນາມ ມາຍັງທ່ານຮອງນາຍົກລັດຖະມົນຕີ ແລະ ການນຳຂັ້ນສູງ ຂອງ ສປປ ລາວ ຕື່ມອີກ.​
​​​​

ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ