ເປີດນຳໃຊ້ໂຄງການເຂື່ອນໄຟຟ້ານໍ້າງື່ມ 1 ພາກຂະຫຍາຍຈັກ ເບີ 6

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນອາທິດ, 28 ສ.ຫ 2022 12:00

​ໃນວັນທີ 27 ສິງຫາ 2022, ຢູ່ເຂື່ອນໄຟຟ້າ ນໍ້າງື່ມ 1, ເມືອງແກ້ວອຸດົມ, ແຂວງວຽງຈັນ ໄດ້ຈັດພິທີເປີດນຳໃຊ້ໂຄງການເຂື່ອນໄຟຟ້ານໍ້າງື່ມ 1 ພາກຂະຫຍາຍຈັກເບີ 6 ຢ່າງເປັນທາງການ ໂດຍໃຫ້ກຽດເຂົ້າຮ່ວມຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ຜູ້ຊີ້ນຳວຽກງານຂົງເຂດເສດຖະກິດ; ມີທ່ານ ລັດຖະມົນຕີກະຊວງພະລັງງານ ແລະ ບໍ່ແຮ່; ທ່ານເຈົ້າແຂວງໆວຽງຈັນ; ທ່ານ Kenichi Kobayashi ເອກອັກຄະລັດຖະທູດຍີ່ປຸ່ນ ປະຈໍາ ສປປ ລາວ; ທ່ານ ໂຕຊິໂອະ ນາກາເຊະ (Toshio Nagase) ຫົວໜ້າອົງການໄຈກາ JICA ປະຈຳ ສປປ ລາວ, ທ່ານ ຈັນທະບູນ ສຸກອາລຸນ ຜູ້ອຳນວຍການໃຫຍ່ ໄຟຟ້າລາວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.​

ໂຄງການເຂື່ອນໄຟຟ້ານ້ຳງື່ມ 1 ພາກຂະຫຍາຍຈັກເບີ 6 ນີ້, ແມ່ນໄດ້ເຈາະໂຕເຂື່ອນທີ່ມີຢູ່ ເພື່ອຕິດຕັ້ງທໍ່ສົ່ງນ້ຳ, ຂະຫຍາຍໂຮງຈັກເກົ່າອອກດ້ານຂ້າງ ແລະ ຕິດຕັ້ງເຄື່ອງຈັກໄຟຟ້າ ໃໝ່ອີກໜຶ່ງໜ່ວຍທີ່ມີກຳລັງການຜະລິດ  40 MW. ໂຄງການນີ້ ເຖິງແມ່ນວ່າຈະບໍ່ແມ່ນໂຄງການຂະໜາດໃຫຍ່ກໍຕາມ ແຕ່ແມ່ນໂຄງການທີ່ມີຄວາມຫຍຸ້ງຍາກສັບສົນ ໃນການກໍ່ສ້າງຫຼາຍ ເພາະຕ້ອງໄດ້ກໍ່ສ້າງຢູ່ໃຕ້ອ່າງນໍ້າ, ຢູ່ໃນເຂດບໍລິເວນກໍ່ສ້າງທີ່ຄັບແຄບ, ມີສິ່ງກີດຂວາງຕ່າງໆນາໆ ແລະ ມີເງື່ອນໄຂ ຕ້ອງບໍ່ສົ່ງຜົນກະທົບໃນທາງລົບຕໍ່ໂຄງສ້າງຂອງເຂື່ອນເດີມ ແລະ ຕໍ່ການຜະລິດຂອງເຂື່ອນໄຟຟ້ານໍ້າງື່ມ 1 ໃນປະຈຸບັນ. ສະນັ້ນຈຶ່ງໄດ້ຈັດຫາທີ່ປຶກສາ ແລະ ບັນດາຜູ້ຮັບເໝົາ ພາຍໃຕ້ມາດຕະຖານສາກົນ ຕາມລະບຽບການຂອງ ອົງການໄຈກາ ດ້ວຍຄວາມເອົາໃຈໃສ່ ແລະ ໄດ້ປະຕິບັດຢ່າງເຄັ່ງຄັດເປັນຕົ້ນ: ໄດ້ວ່າຈ້າງບໍລິສັດຮ່ວມທີ່ປຶກສາເລີ່ມເຮັດວຽກນັບແຕ່ເດືອນ 4/2014, ໄດ້ອອກແບບລະອຽດເພື່ອການກໍ່ສ້າງ ແລະ ຄວບຄຸມການກໍ່ສ້າງພາກສະໜາມຈົນສຳເລັດ; ໄດ້ເຮັດສັນຍາກັບ ບໍລິສັດ ໃນການເຮັດວຽກກໍ່ສ້າງ ແລະ ຕິດຕັ້ງກົນຈັກ, ໄດ້ເລີ່ມລົງມືພາກສະໜາມໃນເດືອນ 8/2017 ແລະ ສໍາເລັດໃນເດືອນ 12/2021; ໄດ້ສຳລັບວຽກຕິດຕັ້ງອຸປະກອນໄຟຟ້າ ແລະ ອຸປະກອນກົນຈັກ ໂດຍໄດ້ເລີ່ມລົງມື ນັບແຕ່ເດືອນ 2/2018 ແລະ ສໍາເລັດໃນເດືອນ 3/2022 ໃນໜ້າວຽກການອອກແບບ, ຜະລິດ ແລະ ຕິດຕັ້ງ ບັນດາອຸປະກອນທັງໝົດ ເພື່ອໃຫ້ສາມາດຜະລິດໄຟຟ້າໄດ້ ໃນກຳລັງຕິດຕັ້ງ 40 MW ເຊິ່ງເຮັດໃຫ້ເຂື່ອນໄຟຟ້ານໍ້າງື່ມ 1 ມີກຳລັງຕິດຕັ້ງທັງໝົດ 275 MW ສາມາດຜະລິດກະແສໄຟຟ້າສົ່ງເຂົ້າລະບົບຂອງໄຟຟ້າລາວເພີ່ມຂຶ້ນ. ຈຸດປະສົງຂອງການສ້າງເຂື່ອນໄຟຟ້ານ້ຳງື່ມ 1 ພາກຂະຫຍາຍຈັກເບີ 6 ນີ້ ມີ 4 ຈຸດປະສົງ ຄື: ຄວບຄຸມນ້ຳຖ້ວມ ໂດຍສະເພາະຊ່ວຍຄວບຄຸມລະດັບນຳ້ ຢູ່ຕອນລຸ່ມຂອງໂຮງຈັກໄຟຟ້າ ໃນຊ່ວງລະດູຝົນ ແລະ ປ້ອງກັນຜົນກະທົບຮຸນແຮງຈາກສະພາວະນ້ຳຖ້ວມຢູ່ລຸ່ມເຂື່ອນ; ການນຳໃຊ້ນ້ຳ ສຳລັບການດຳລົງຊີວິດ, ກະສິກຳ ແລະ ອຸດສາຫະກຳ; ການປົກປັກຮັກສາສິ່ງແວດລ້ອມ ໂດຍການສຳຫຼວດກວດສອບສະພາບນ້ຳຢ່າງເປັນປະຈຳ; ແລະ ການຜະລິດກະແສໄຟຟ້າ ສາມາດຜະລິດກະແສໄຟຟ້າສົ່ງເຂົ້າລະບົບຂອງໄຟຟ້າລາວເພີ່ມຂຶ້ນ.
ໂອກາດພິທີທີ່ມີຄວາມໝາຍນີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ກໍ່ໄດ້ໃຫ້ກຽດລັ່ນຄ້ອງ 9 ບາດ ເພື່ອເປີດນໍາໃຊ້ໂຄງການເຂື່ອນໄຟຟ້ານໍ້າງື່ມ 1 ພາກຂະຫຍາຍຈັກ ເບີ 6 ຢ່າງເປັນທາງການ ແລະ ໄດ້ຢ້ຽມຊົມເຂື່ອນໄຟຟ້ານໍ້າງື່ມ 1 ຕື່ມອີກ.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ