ທ່ານ ຮອງນາຍົກລັດຖະມົນຕີ ຊຸກຍູ້ວຽກງານຢູ່ແຂວງຫົວພັນ

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນເສົາ, 23 ມ.ສ 2022 18:00

​ພາຍຫຼັງສໍາເລັດການເຄື່ອນໄຫວວຽກງານຢູ່ທີ່ແຂວງຊຽງຂວາງແລ້ວ ໃນວັນທີ 23 ເມສາ 2022 ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ສືບຕໍ່ເຄື່ອນໄຫວຊຸກຍູ້ວຽກງານ ການພັດທະນາເສດຖະກິດ-ສັງຄົມ ຢູ່ແຂວງຫົວພັນ ໂດຍມີທ່ານ ວັນໄຊ ແພງຊຸມມາ ເຈົ້າແຂວງໆຫົວພັນ ພ້ອມດ້ວຍຄະນະນຳຂອງແຂວງ, ຜູ້ຕາງໜ້າພະແນກການ ແລະ ຄະນະນຳຂອງເມືອງທີ່ກ່ຽວຂ້ອງ ໃຫ້ການຕ້ອນຮັບຢ່າງອົບອຸ່ນ.
 
ໂອກາດນີ້, ທ່ານ ວັນໄຊ ແພງຊຸມມາ ໄດ້ລາຍງານໃຫ້ຊາບໂດຍຫຍໍ້ກ່ຽວກັບສະພາບການພັດທະນາເສດຖະ ກິ​​​ດ-ສັງຄົມຂອງແຂວງ ເຫັນວ່າ: ໂດຍລວມແລ້ວແຂວງຫົວພັນ ຍັງສືບຕໍ່ຮັກສາໄດ້ຄວາມໜັກແໜ້ນທາງດ້ານການເມືອງ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ ຊີວິດການປັນຢູ່ຂອງປະຊາຊົນ ໄດ້ຮັບການພັດທະນາດີຂື້ນເລື້ອຍໆ, ສໍາລັບວຽກງານທີ່ພົ້ນເດັ່ນໃນການພັດທະນາເສດຖະກິດ-ສັງຄົມຂອງແຂວງ ໃນປີ 2021 ເຫັນວ່າ ເສດຖະກິດຂະ ຫຍາຍ ຕົວ 3,41%, ລວມຍອດຜະລິດຕະພັນພາຍໃນ GDP ບັນລຸໄດ້ 3.532,52 ຕື້ກີບ, ສະເລ່ຍຕໍ່ຄົນໄດ້ 11.474.002 ກີບຕໍ່ຄົນຕໍ່ປີ; ພ້ອມດຽວກັນນີ້, ແຂວງໄດ້ສຸມໃສ່ຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ໃນຂົງເຂດສຶກສາ ແລະ ສາທາ ຢ່າງຕໍ່ເນື່ອງ, ເອົາໃຈໃສ່ຝຶກອົບຮົມພັດທະນາສີມືແຮງງານ ແລະ ຈັດຫາວຽກເຮັດງານທຳ ເພື່ອແກ້ໄຂບັນຫາໄພຫວ່າງງານ ແລະ ສຸມໃສ່ເກັບກູ້ລະເບີດບໍ່ທັນແຕກອອກຈາກພື້ນທີ່ທຳການຜະລິດຕ່າງໆ. ນອກນັ້ນ ແຂວງຍັງໄດ້ເອົາໃຈໃສ່ວຽກງານຈັດຕັ້ງຜັນຂະຫຍາຍ 2 ວາລະແຫ່ງຊາດ; ວຽກງານກໍ່ສ້າງຮາກຖານການເມືອງ, ວຽກງານ 3 ສ້າງ, ວຽກງານແຂ່ງຂັນຮັກຊາດ ແລະ ພັດທະນາ; ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ; ວຽກງານກະກຽມສະເຫຼີມສະຫຼອງ 2 ວັນປະຫວັດສາດ ລາວ-ຫວຽດນາມ.
 
​ໃນໂອກາດດຽວກັນ, ທ່ານ ສອນໄຊ ສີພັນດອນ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດທີ່ແຂວງສາມາດຍາດມາໄດ້ໄລຍະຜ່ານມາ, ຄຽງຄູ່ກັນນັ້ນ ກໍ່ຍັງມີຈຸດອ່ອນຂໍ້ຄົງຄ້າງຈໍານວນໜຶ່ງທີ່ແຂວງຕ້ອງໄດ້ສືບຕໍ່ແກ້ໄຂ. ພ້ອມກັນນັ້ນ ທ່ານຮອງນາຍົກລັດຖະມົນຕີ ກໍ່ໄດ້ເຈາະຈິ້ມ, ແລກປ່ຽນຄໍາເຫັນ, ທັງຍົກໃຫ້ເຫັນສະພາບການພາກພື້ນ,ສາກົນ ແລະ ຊີ້ນຳໃຫ້ແຂວງ ເອົາໃຈໃສ່ຕື່ມບາງດ້ານ ເປັນຕົ້ນ ສຶກສາອົບຮົມການເມືອງ-ແນວຄິດໃຫ້ພະນັກງານຢູ່ໃນແຕ່ລະຂະແໜງການ ໃຫ້ມີຄວາມຈົ່ງຮັກພັກດີ, ມີຈັນຍາບັນ, ຮັກວິຊາຊີບ, ຍົກສູງສະຕິຄວາມຮັບຜິດຊອບໜ້າທີ່ການເມືອງ ທີ່ໄດ້ຮັບມອບໝາຍ ແລະ ຖືເອົາຜົນປະໂຫຍດຂອງປະເທດຊາດເປັນກົກ; ເອົາໃຈໃສ່ຈັດຕັ້ງປະຕິບັດວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ໃຫ້ເປັນຮູບປະທຳ, ໂດຍນຳໃຊ້ທຸກນະໂຍບາຍ ແລະ ມາດຕະການແກ້ໄຂ ແລະ ຄຸ້ມຄອງເສດຖະກິດມະຫາພາກ ໃຫ້ມີສະຖຽນລະພາບ ໂດຍພື້ນຖານ, ແກ້ໄຂຄວາມກົດດັນດ້ານເສດຖະກິດໃຫ້ຜ່ອນເບົາລົງເທື່ອລະກ້າວ ເພື່ອເຮັດໃຫ້ເສດຖະກິດສືບຕໍ່ຂະຫຍາຍຕົວ ຕາມລະດັບຄາດໝາຍທີ່ວາງໄວ້; ເອົາໃຈໃສ່ຄຸ້ມຄອງ, ຕິດຕາມ ໂຄງການລົງທຶນຂອງລັດໃຫ້ດີ ເປັນຕົ້ນ ໂຄງການກໍ່ສ້າງພື້ນຖານໂຄງລ່າງ, ໂຄງການຄຸດຄົ້ນບໍ່ແຮ່ ແລະ ອື່ນໆ; ເອົາໃຈໃສ່ຄຸ້ມຄອງ ແລະ ນໍາໃຊ້ເຄື່ອງມືທີ່ທັນສະໄໝເຂົ້າໃນການຈັດເກັບລາຍຮັບ ໂດຍສະເພາະ ຢູ່ຕາມດ່ານຊາຍແດນຕ່າງ, ບັນດາທຸລະກິດ, ຜູ້ປະກອບການ ໃຫ້ເປັນລະບົບ, ຈຳກັດການໄຫຼຂອງງົບປະມານ; ຄຸ້ມຄອງລາຄາສິນຄ້າ, ການຂຶ້ນທະບຽນພາຫະນະໃຫ້ຖືກຕ້ອງ, ເອົາໃຈໃສ່ຈັດສັນທີ່ດິນໃຫ້ປະຊຸມທີ່ຖືກກະທົບຈາກໂຄງການລົງທຶນຂອງລັດໃຫ້ດີ; ເອົາໃຈໃສ່ວຽກງານກໍ່ສ້າງຮາກຖານການເມືອງ ຕິດພັນກັບວຽກງານ 3 ສ້າງ ແລະ ການຈັດສັນພູມລໍາເນົາໃຫ້ປະຊາຊົນ, ການຈັດຕັ້ງກຸ່ມການຜະລິດ. ພ້ອມດຽວກັນນັ້ນ, ໃຫ້ເອົາໃຈໃສ່ສືບຕໍ່ກະກຽມ, ປະສານງານກັບພາກສ່ວນທີ່ກ່ຽວຂ້ອງໃຫ້ດີ ເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ແລະ ຫວຽດນາມ-ລາວ ຄົບຮອບ 45 ປີ ໃຫ້ມີເນື້ອໃນ ແລະ ເປັນຂະບວນການຟົດຟື້ນ.
ພ້ອມດຽວກັນນີ້, ທ່ານ ສອນໄຊ ສີພັນດອນ ໄດ້ເດີນທາງໄປເຄື່ອນໄຫວຢ້ຽມຢາມໂຄງການ ແລະ ພື້ນຖານການຜະລິດຂອງແຂວງຫົວພັນຈໍານວນໜຶ່ງຕື່ມອີກ.

ໂອກາດເດີນທາງມາເຄື່ອນໄຫວວຽກງານໃນຄັ້ງນີ້, ທ່ານຮອງນາຍົກລັດຖະມົນຕີ ໄດ້ມອບເງິນໃຫ້ແຂວງຈຳ ນວນໜຶ່ງ ເພື່ອນໍາໃຊ້ເຂົ້າໃນວຽກງານລວມຂອງແຂວງ.


ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ