ສອງນາຍົກລັດຖະມົນຕີ ລາວ-ຫວຽດນາມ ສົນທະນາທາງໂທລະສັບ

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນອັງຄານ, 12 ມ.ສ 2022 17:00

​​​​​​​ໃນຕອນແລງວັນທີ 12 ເມສາ 2022, ທີ່ສໍານັກງານນາຍົກລັດຖະມົນຕີ ສະຫາຍ ພັນຄໍາ ວິພາວັນ, ນາຍົກ ລັດຖະມົນຕີ ແຫ່ງ ສປປ ລາວ ໄດ້ສົນທະນາທາງໂທລະສັບຮ່ວມກັບ ສະຫາຍ ຟ້າມ ມິງ ຈິງ, ນາຍົກລັດຖະມົນຕີ ແຫ່ງ ສສ ຫວຽດນາມ.
ເນື່ອງໃນໂອກາດບຸນປີໃໝ່ ປະຈໍາຊາດລາວ ພ.ສ 2565, ສະຫາຍ ນາຍົກລັດຖະມົນຕີ ຟ້າມ ມິງ ຈິງ ໄດ້ສົ່ງ ຄໍາອວຍພອນປີໃໝ່ ອັນອົບອຸ່ນມາຍັງສະຫາຍ ນາຍົກລັດຖະມົນຕີ ພັນຄໍາ ວິພາວັນ ພ້ອມທັງ ຝາກຄໍາອວຍພອນປີ ໃໝ່ ຂອງການນໍາຂັ້ນສູງພັກ-ລັດ ແຫ່ງ ສສ ຫວຽດນາມ ຜ່ານສະຫາຍນາຍົກລັດຖະມົນຕີ ພັນຄໍາ ວິພາວັນ ມາຍັງການນໍາຂັ້ນສູງພັກ-ລັດ ແຫ່ງ ສປປ ລາວ ແລະ ສະແດງຄວາມຊົມເຊີຍຜົນສໍາເລັດ ຂອງ ສປປ ລາວ ໃນການຈັດຕັ້ງປະຕິບັດມະຕິກອງປະຊຸມໃຫຍ່ ຂອງພັກປະຊາຊົນ ປະຕິວັດລາວ ຄັ້ງທີ XI ກໍ່ຄື ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX, ເຫັນວ່າ ພາຍໃຕ້ການນໍາພາຂອງພັກປະຊາຊົນ ປະຕິວັດລາວ ສາມາດຍາດໄດ້ຜົນສໍາເລັດໃໝ່ຫຼາຍດ້ານ, ຖານະບົດບາດຊື່ສຽງຂອງ ຂອງ ສປປ ລາວ ໃນເວທີພາກພື້ນ ແລະ ສາກົນ ນັບມື້ນັບສູງເດັ່ນຂຶ້ນ.
 
​​ໃນທ່າມກາງບັນຍາກາດ ແຫ່ງບຸນປີໃໝ່ລາວປີນີ້ ກໍ່ຄື ບັນຍາກາດ ການສະເຫຼີມສະຫຼອງປີສາມັກຄີມິດຕະ ພາບ ລາວ-ຫວຽດນາມ 2022 ຄື ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45, ສອງນາຍົກລັດຖະມົນຕີ ຮ່ວມກັນຕີລາຄາສູງ ການຂະຫຍາຍຕົວຂອງການພົວພັນສອງຝ່າຍ ຕະຫຼອດໄລຍະຜ່ານມາ, ບໍ່ວ່າຈະໃນເວລາໃດ ກໍ່ຄືສະພາບການໃດ ມິດຕະພາບ ອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ຫວຽດ ນາມ-ລາວ ກໍ່ສືບຕໍ່ຂະຫຍາຍຕົວຢ່າງບໍ່ຢຸດຢັ້ງ.
ສອງຝ່າຍ ໄດ້ສະແດງຄວາມເພິ່ງພໍໃຈ ທີ່ເຫັນວ່າ ບົນພື້ນຖານ ການຕົກລົງຂອງການນໍາຂັ້ນສູງສອງຝ່າຍ ກໍ່ຄື ຜົນການພົບປະຂອງສອງນາຍົກລັດຖະມົນຕີ ຢູ່ ນະຄອນຫຼວງຮ່າໂນ້ຍ, ສສ ຫວຽດນາມ ແລະ ຜົນຂອງກອງປະຊຸມ ຄະນະກໍາມະການຮ່ວມມືທະວິພາຄີ ລາວ-ຫວຽດນາມ ຄັ້ງທີ 44 ທີ່ໄດ້ຈັດຂຶ້ນໃນເດືອນມັງກອນ 2022 ຢູ່ນະຄອນ ຫຼວງຮ່າໂນ້ຍ ທີ່ຜ່ານມາ, ໄດ້ຮ່ວມກັນຊຸກຍູ້ການພົວພັນຮ່ວມມື ດ້ານເສດຖະກິດ ລະຫວ່າງ ສອງປະເທດ ໃຫ້ມີປະສິດທິຜົນຂຶ້ນສູ່ລະດັບສູງໃໝ່, ຂະແໜງການກ່ຽວຂ້ອງໄດ້ເອົາໃຈໃສ່ ຈັດຕັ້ງປະຕິບັດຢ່າງຕັ້ງໜ້າ ໃນການພະຍາຍາມເຮັດວຽກຮ່ວມກັນ ທັງແບບເຊິ່ງໜ້າ ແລະ ແບບທາງໄກ ຕະຫຼອດໃນໄລຍະ 3 ເດືອນຕົ້ນປີ 2022, ໄດ້ມີຄະນະຜູ້ແທນຂັ້ນສູງ ຂອງ ສສ ຫວຽດນາມ ເດີນທາງມາຢ້ຽມຢາມເຮັດວຽກ ຢູ່ ສປປ ລາວ ເປັນຕົ້ນ: ຄະນະຜູ້ແທນຂັ້ນສູງ ຈາກກະຊວງ ແຜນການ ແລະ ການລົງທຶນ, ຄະນະກໍາມະການຮ່ວມມື ຫວຽດນາມ-ລາວ; ຄະນະຜູ້ແທນສະຫາຍເລຂາພັກນະຄອນຫຼວງຮ່າໂນ້ຍ ແລະ ກະຊວງອຸດສາຫະກໍາ ແລະ ການຄ້າ.
​​​ສອງຝ່າຍໄດ້ເປັນເອກະພາບກັນ ຈັດກິດຈະກໍາສະເຫຼີມສະຫຼອງ ປີສາມັກຄີ ມິດຕະພາບ ລາວ-ຫວຽດນາມ ຮ່ວມກັນ ຢ່າງເປັນຂະບວນຟົດຟື້ນ, ສືບຕໍ່ແລກປ່ຽນປຶກສາຫາລືຮ່ວມກັນໃນທຸກລະດັບ, ສືບຕໍ່ຈັດຕັ້ງຜັນຂະຫຍາຍການຕົກລົງຂອງການນໍາຂັ້ນສູງສອງຝ່າຍ, ສືບຕໍ່ເພີ່ມທະວີການຮ່ວມມືດ້ານເສດຖະກິດ-ສັງຄົມ ການເຊື່ອມໂຍງພື້ນ ຖານໂຄງລ່າງ ໃຫ້ນັບມື້ນັບມີປະສິດທິຜົນຍິ່ງຂຶ້ນ ເພື່ອຜົນປະໂຫຍດຂອງປະຊາຊົນສອງຊາດ, ສືບຕໍ່ເອົາ ໃຈ ໃສ່ເພີ່ມທະວີ ການ ສຶກ ສາ ອົບ ຮົມ ມູນ ເຊື້ອ ຄວາມ ສາ ມັກ ຄີ ພິ ເສດ ລາວ-ຫວຽດ ນາມ ໃນ ຖັນ ແຖວ ພະ ນັກ ງານ ແລະ ປະ ຊາ ຊົນ ເປັນ ຕົ້ນ ແມ່ນ ຖັນ ແຖວ ຊາວ ໜຸ່ມ-ເຍົາ ວະ ຊົນຂອງ ສອງ ປະ ເທດ ; ສືບຕໍ່ຮ່ວມມື ແລະ ສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ.
​​​ໃນໂອກາດນີ້, ສະຫາຍ ພັນຄໍາ ວິພາວັນ ກໍໄດ້ສະແດງຄວາມຂອບໃຈ ມາຍັງສະຫາຍ ຟ້າມ ມິງ ຈິງ ທີ່ໄດ້ສົ່ງ ຄໍາອວຍພອນໄຊອັນປະເສີດ ໃນຄັ້ງນີ້, ຊຶ່ງສະແດງໃຫ້ເຫັນເຖິງໄມຕີຈິດມິດຕະພາບອັນດູດດື່ມ, ຄວາມສາມັກຄີຮັກ ແພງອັນສະໜິດສະໜົມ ແລະ ຄວາມສາມັກຄີພິເສດຂອງສອງຊາດ, ພ້ອມທັງຕ່າງໜ້າການນໍາຂັ້ນສູງ ພັກ-ລັດ ແຫ່ງ ສປປ ລາວ ຝາກຄວາມຂອບໃຈຜ່ານສະຫາຍ ຟ້າມ ມິງ ຈິງ ໄປຍັງການນໍາຂັ້ນສູງພັກ-ລັດ ແຫ່ງ ສສ ຫວຽດນາມ ຕໍ່ກັບຄໍາອວຍພອນປີໃໝ່ອັນອົບອຸ່ນທີ່ສຸດ. ໃນໂອກາດດຽວກັນ, ສະຫາຍ ພັນຄໍາ ວິພາວັນ ກໍໄດ້ເຊື້ອເຊີນສະຫາຍ ຟ້າມ ມິງ ຈິງ ພ້ອມດ້ວຍພັນລະຍາ ມາຢ້ຽມຢາມ ສປປ ລາວ ໃນເວລາອັນຄວນອີກດ້ວຍ.
​​​

ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ